“İctimai Palata” xəstəxana palatası rolunda

Araz Əlizadə:

Üzvlər bir-birinə ziddi, asidi,

Morqda bu qurumun sabah yasıdı,

Bu "İP" xəstəxana palatasıdı,

Sosdemlər heç zaman girməyəcəkdir.

Qabil Hüseynli:

Sosdem on il əvvəl uduzub tası,

Qırxı o vaxt çıxıb, olubdu yası,

Arzunuz, əlbəttə, "İP"-in iflası,

Onu gözləriniz görməyəcəkdir.

Araz Əlizadə:

Qulaqlarınıza eyləyin sırğa,

Xaric "İP"-inizi qoyubdu torqa,

Reanimasiya olunub, morqa

Gedəndə, orada hürməyəcəkdir.

Qabil Hüseynli:

Hər kəs göstərməkdə öz nömrəsini,

Sən də xeyli azalt öz həvəsini,

Yetkili palata bünövrəsini,

Dediyiniz tərzdə hörməyəcəkdir.

Araz Əlizadə:

Reanamision, morqdu təməlli,

Ölü bir qurumdu aləmə bəlli,

Biabır etməkdə sizi əməlli,

Qurumlar içində "İP"-iniz "təkdir".

Qabil Hüseynli:

"İP"-in daxilində Müsavat coşar,

Fərəhim, sevincim kükrəyər, daşar,

"İP" olub, olacaq əbədiyaşar,

İfrat liderlərə arxa-dirəkdir.

Araz Əlizadə:

Qələti düzəldin qələt etməmiş,

İşin gedişinə qoyun siz qəmiş,

"İP"-iniz son məkan-morqa getməmiş,

Yolunu bağlamaq, kəsmək gərəkdir.

Qabil Hüseynli:

Kiçik görünsə də, iri çıxardı,

Döyülsə, üstünün kiri çıxardı,

Dəyirman gözündən diri çıxardı,

"İP" ölü deyildir, xeyli zirəkdir.

Araz Əlizadə:

Bu fürsət əlimdə bəhanə deyil,

"İP"-i pisləyənlər divanə deyil,

Nurun dövrəsində pərvanə deyil,

Sizin "İP" parazitsayaq böcəkdir.

Qabil Hüseynli:

ASDP günbəgün verir irinə,

Susardım, olsaydım sənin yerinə,

Çox da ağ eyləyib getmə dərinə,

Bəlkə azdan-uzdan bir bicənəkdir.

Araz Əlizadə:

Cavabdeh olmuşam doğru sözümə,

Əminəm həmişə özüm özümə,

Onu düyünləyib dürtmə gözümə,

"İP" otu biçilmiş bir biçənəkdir.

Qabil Hüseynli:

Özünü sınadın çox siyahıda,

Təmsil olunmusan lox siyahıda,

ASDP adları yox siyahıda,

Bizim "İP" bizlərə müsbət örnəkdir.

Araz Əlizadə:

Silinib "İP" adlı ləpirin, izin,

Sənə bildirərdim, versəydin izin,

Adi xəstəxana nəzdində, sizin,

"İP"-iniz lüzumsuz adi dərnəkdir.

Qabil Hüseynli:

Qərb bossları burda boşaltmaqda cib,

Bu ocaqdan keçsə yaxşıdı hər tip,

Elə müalicə ocağı ki, "İP",

Təcili sağaldır, kim döyənəkdir.

Araz Əlizadə:

Bosslar göndərməkdə dolu miskilər,

Səhərlər yediniz siz sosiskilər,

Nahar içkinizdi mestni viskilər,

Zakuskanız leşdi, həm siyənəkdir.

Qabil Hüseynli:

Ayaz əl uzatdı İvanə kimi,

Qaldın boynubükük divanə kimi,

ASDP dolaşdı pərvanə kimi,

"İP" ələ keçməyən dinc kəpənəkdir.

Araz Əlizadə:

Ay ağa, nə bəzək məlum boyağa?

Mum adı verirəm sizin dayağa,

"İP"-iniz, özünüz başdan-ayağa,

Bosslara yalmanan adi köpəkdir.

Qabil Hüseynli:

Əzəldən bəd olur üzü dönməyin,

"İP" bilmir dadını siz tək sönməyin,

Siz onu səhv edib morqa gömməyin,

"İP" ASDP-dən də yüngül, yüyrəkdir.

Araz Əlizadə:

Durumunuz çətin, ağır durumdu,

Önünüzdə duran sərt uçurumdu,

ASDP səbatlı, dözən qurumdu,

"İP"-in qanadları xeyli kövrəkdir.

Qabil Hüseynli:

Vəzifən daima qan qusmaq olar,

Sənin də nəsibin, hey susmaq olar,

ASDP-nin sonu uduzmaq olar,

Yerə verəciyi qoşa kürəkdir.

Araz Əlizadə:

O, həm çox mükəmməl, naqis oğrudur,

Sizin qurumunuz xalis oğrudur,

"İP"-inizin yönü morqa doğrudur,

O, hazır çürümüş iki böyrəkdir.

Qabil Hüseynli:

Qaldın mat, ağıllı söz qabağında,

İflic ASDP-nin döz qabağında,

Sənin susqunluğun göz qabağında,

İşinin gedişi təkəmseyrəkdir.

Mirzə QƏRƏNFİL