Əvəz Temirxan ALP-ni “Beşlər”in tərkibindən çıxarır

Əli Əliyev:

Başlandı sırada qəfil qilü-qal,

Ardınca baş verdi xata hal, şər

"Altılar" "Beşlər"ə çevrildi dərhal,

Elə ki, sıradan çıxdı Etibar.

Əvəz Temirxan:

Burda yedirirlər dananı qurda,

Həm də tormozlanma qalıb şüurda,

Heç cür qala bilməz ALP burda,

"Beşlər"də üzvlərin iri biti var.

Əli Əliyev:

Onu bu işə sövq fərdlər eylədi,

Xətalar törətdi, dərdlər eylədi,

Bu nadan "Beşlər"i "Dördlər" eylədi,

Lalənin Əvəzi yeyən iti var.

Əvəz Temirxan:

İş görən deyildir əsla bir tipi,

"Beşlər" istərdi ki, dağıtsın "İP"-i

Əli Əliyevin sərsəm bir "VİP"-i,

Mirmahmud ağanın "DUİ" kiti var.

Əli Əliyev:

Aramızda möhkəm bir çəpər yoxdu,

Üstümüzdə güclü bir sipər yoxdu,

Qalan "Dördlər"də də bir təpər yoxdu,

Əlbəttə, Əvəzin Lalə xiti var.

Əvəz Temirxan:

"Altılar" ifratı xar edə bilər,

Meydanı nazildib dar edə bilər,

Bu fit qulaqları kar edə bilər,

Qalan dörd liderin Əli fiti var.

Əli Əliyev:

Tapıb çoxlu sayda adam şığıdır,

Bizim üstümüzə "Madam" şığıdır,

O, qalanları da vurub dağıdır,

Əlində tutduğu xəncər-iti var.

Əvəz Temirxan:

Onun mollasının, camisinin də,

Əli Əliyevin hamisinin də,

Qalan dörd nəfərin hamısının da,

Burun-boğazında artıq əti var.

Əli Əliyev:

ALP əyilə bilir halə tək,

O, səs də çıxarır çox küt nalə tək,

Vallah, Əvəzin də elə Lalə tək,

Başını örtməyə mestni çiti var.

Əvəz Temirxan:

Vəziyyəti daim nəm Mirmahmudun,

Kədər "VİP" sədrinin, qəm Mirmahmudun,

Əli Əliyevin, həm Mirmahmudun,

Vaxtında deyilmiş yesti-neti var.

Əli Əliyev:

Onu göməcəkdi qəbrə lal sonu,

Çatıbdı "Beşlər" tək liberal sonu,

Lalə dalda qoyub lənglikdə onu,

Sanmayın sözündə Əvəz qəti var.

Əvəz Temirxan:

Çoxları boğuldu kədərdə, kində,

Belədə sevinmək olmaz neçin də,

VİP özü iflasa gedir, içində

Əli timsalında miskin lütü var.

Əli Əliyev:

Almaz icazəsiz nəfəs Temirxan,

Çıxarmaz izinsiz bir səs Temirxan,

Lalədən asılı Əvəz Temirxan,

Qurumda çətin ki, ondan kütü var.

Əvəz Temirxan:

"Altılar" olmuşdu ondan da yaman,

"Beşlər" də əridi sanki sis duman,

Onu düzəldirlər əyilən zaman,

"VİP"-də Əli boyda qaynar ütü var.

Əli Əliyev:

Lalə də burada tamam lox zəif,

Liberal içində ac da, tox zəif,

Əvəzin "Beşlər"də yeri çox zəif,

Tikəni Lalənin əlindən qapar.

Əvəz Temirxan:

Meydanda tarazlıq tənasüb deyil,

"Altılar", "Beşlər"də adi "İP" deyil,

"Beşlər" onun üçün münasib deyil,

Əvəzi "Dördlər"in içinə apar.

Əli Əliyev:

"Beşlər"də də zəif şəxs tək sınandı,

Olmayıb, indi də yoxdu talantı,

Gözünün ucuyla görsə qrantı,

Liberal Əvəz də yolunu sapar.

Əvəz Temirxan:

"Beşlər" "Altılar" tək məzəli qala,

Yıxdımsa, çətin ki, özülü qala,

Qoymadım "Beşlər"i düzülü qala,

"Dördlər" kündəsini üsullu yapar.

Əli Əliyev:

Bu adam hər şeydən qalıb avara,

Onunçün "Altılar", həm "Beşlər" para,

Cəlb eyləmək çətin eşşək, qatıra,

Əvəz öz bildiyi bir atda çapar.

Əvəz Temirxan:

Orda əsəbləri tarım eylədim,

Mən onu lüzumsuz qurum eylədim,

"Beşlər"dən mən onu məhrum eylədim,

"Dördlər"də yerini o özü tapar.

Əli Əliyev:

Qapandı çıxışlar, həm də girişlər,

Etibarla Əvəz qıcırtdı dişlər,

Söküldü dalbadal "Altılar", "Beşlər",

"Yeddilər" olardı olsaydıq topar.

Əvəz Temirxan:

Səngimək bilməsə bu qalmaqallar,

Əlbəttə, çoxalar ətrafda lallar,

Bu müddət dözərik biz liberallar,

"VİP"-in tərkibində qiyamət qopar.

MİRZƏ QƏRƏNFİL