Partiyalarını “ana müxalifət” adlandıranlar nəinki “ana”,  heç “xala müxalifət” olmağa da layiq deyillər

Eldar Namazov:

Son anda sayılar böyüyü sayan,

Bir çoxu durmadan etməkdə bəyan,

"Ana müxalifət" eşqi yaşayan,

Heç layiq də deyil "xala" olmağa.

Nurəddin Məmmədli:

"Ana" adlananlar keçibdi yüzü,

Opponent rəqiblər də çaşıb, düzü,

"İP"-də "ana bəylər" toplaşıb, düzü,

Layiq bir alınmaz qala olmağa.

Eldar Namazov:

Çoxunun xaricdən biş-düşü gəlmir,

Dişi qırılanın saf dişi gəlmir,

Məclislərinə heç bir kişi gəlmir,

Bir çoxu hazırdı bəla olmağa.

Nurəddin Məmmədli:

"İP"-də yığışmağı o, topa bilmir,

Doğru yola doğru heç sapa bilmir,

"Ana müxalifət" pul tapa bilmir,

Özünü atmaqçün çala almağa.

Eldar Namazov:

Qərbdən pul gözləyər o, söyə-söyə,

İstər ki, bossları salsın ilgəyə,

Sığmaz iddiası nə yerə, göyə,

Onda pul tapılmır mala almağa.

Nurəddin Məmmədli:

Adama xoş gəlir birincilik, ilk,

Dərhal yada düşür təbəqə və silk,

İstərlər xaricdə bir neçə ev, mülk,

Həm də allı-güllü tala almağa.

Eldar Namazov:

Daim radikallar küncdə yatardı,

Qərb kömək etməsə, yəqin batardı,

Sizin "ana" "İP"-in pulu çatardı,

Bir parça çörəklə sala almağa.

Nurəddin Məmmədli:

Gecə yarısı da, xoruz banı da,

Lazım gəlsə qəlbdə şirin canı da,

Ən baha, ən ucuz bir əşyanı da,

Bizdə öyrəşiblər pula almağa.

Eldar Namazov:

"İP"-də İsa, Əli maraqda yatar,

Sizə Qərbdə bosslar, xaric də atar,

Narahat olmayın, sözsüz ki, çatar,

Qəpik-quruşunuz tala almağa.

Nurəddin Məmmədli:

Yüzlərcəsi bilməz, bilsə də beşi,

İşlər zərərinə çərxin gərdişi,

Liderlərin baxmaz erkəkdi-dişi,

Cəhd edər öküzdən bala almağa.

Eldar Namazov:

"İP"-də hər bir lider xatadı-şərdi,

Nədən üstünüzə Qərb qanad gərdi,

Sizin radikallar dəymədüşərdi,

Başlar verdiyini dala almağa.

Nurəddin Məmmədli:

Alıcı quş olur çox mey alanda,

Yaman keyləşirlər, bil, key alanda,

Bizim radikallar bir şey alanda,

Onu bacarırlar əla almağa.

Eldar Namazov:

Olmamış, heç olmaz ərən əliniz,

Sağlammı-şikəstmi görən, əliniz?

Olmamış heç zaman verən əliniz,

Alanda da pəl vur, dola, almağa.

Nurəddin Məmmədli:

Kiminsə köndələn yatışı yoxdu,

Arada heç güllə atışı yoxdu,

İndi torpaq, sərvət satışı yoxdu,

Çalış ki, nəqşinlə cila almağa.

Eldar Namazov:

Qərb qəbul etmədi tağ yalanları,

"İp"-sə təsdiqlədi sağ yalanları,

Bosslar da sizdəki ağ yalanları,

Rəsmi imzasıyla qola almadı.

Nurəddin Məmmədli:

Guya yer verdilər gözləri üstə,

"İP"-i oturtdular bizləri üstə,

Bizim yükümüzü dizləri üstə,

Ya da ki, bir kimsə qola almadı.

Eldar Namazov:

Üstlərə icbari qanad sərənlər,

Qərbdən qrant alıb ömür sürənlər,

Sizə iyirmi il qrant verənlər,

Liderlərinizi nola almadı.

Nurəddin Məmmədli:

Diz üstə durmaqdan dizləri getdi,

Bossların ardınca gözləri getdi,

Liderlər xaricə özləri getdi,

Mənim kimiləri yola almadı.

Eldar Namazov:

Elə zənn etdi ki, sayıb-sayıldı,

Mitinqsiz hər bir gün qayıb sayıldı,

Sağçılığa meyil ayıb sayıldı,

Nə mərkəzçiliyə, sola almadı.

Nurəddin Məmmədli:

Çoxusu daldada iki büküldü,

Radikal nəsnələr sökdü-söküldü,

Dəymişi dalbadal yerə töküldü,

Biz sabiq bəyləri kala almadı.

Eldar Namazov:

Ayağa qaldırdı boss çökənləri,

Çəkdi ətrafına kef çəkənləri,

Çıxardı başına pul tökənləri,

Sənin tək kasıbı rola almadı.

Nurəddin Məmmədli:

Bosslar heç qoymurlar çağa yerinə,

Layiq olsa belə dığa yerinə,

Özünü sırıdı ağa yerinə,

Bizi heç dəyərsiz qula almadı.

Mirzə QƏRƏNFİL