Radikalların “ərəb baharı”nı “Azərbaycan baharı”na çevirmək cəhdləri

Rauf Arifoğlu:

Xaricdən gəlməkdə xek, sardin deyir,

Arxada çeçen, rus, qabardin deyir,

İsa mətbuatda qabardın deyir,

Sürət götürməkdə "ərəb baharı".

Nurəddin Məmmədli:

Qərb təlqin etməkdə min təblər bizə,

Veriblər cürbəcür ləqəblər bizə,

Rəğbət göstərirlər ərəblər bizə,

Qüvvəmiz onlarla yarıbayarı.

Rauf Arifoğlu:

Tapıbdı falçıda, maqda çörəyi,

Üyüdür üsullu bağda çörəyi,

İsa özü yeyir buğda çörəyi,

Bizə təklif edir çovdarla darı.

Nurəddin Məmmədli:

Yeyir kabab üstdən suxarı deyir,

Baxır o, başından yuxarı deyir,

Gələr "Azərbaycan baharı" deyir,

Tutubdu İsanın yeni azarı.

Rauf Arifoğlu:

Yaz gələr, İsanın özü pat olar,

İnanıram, "İP"-də xeyli çat olar,

İsa bəy qorxur ki, narahat olar,

Artar günü-gündən dərdi-qübarı.

Nurəddin Məmmədli:

Çoxaldaq başqanın az qədəmini,

Yamsılayaq onun qaz qədəmini,

Bakıya qoyanda yaz, qədəmini,

Meydana çevirək bütün bulvarı.

Rauf Arifoğlu:

İsa deyir Qərbə dollarçün çapaq,

Pul qatdığı küpə qoyubdu qapaq,

Gəlir gələn yerə dirəməz papaq,

Tutur qrant altda bomboş xalvarı.

Nurəddin Məmmədli:

Mətbəxindən quzu, kəvələr asır,

Başının üstündən gəvələr asır,

Çoxları talvardan meyvələr asır,

Pul ilə doldurur İsa talvarı.

Rauf Arifoğlu:

Qərbdən avro alır İsa hər ayda,

Artıq bu olubdu adi bir qayda,

"Ərəb baharı" da verməz bir fayda,

Yazda dolduracaq İsa şalvarı.

Nurəddin Məmmədli:

Eyləyər avro da, dollar inqilab,

İnşallah, ətrafa dolar inqilab,

Bizim küçədə də olar inqilab,

Yazda eyləyəcək İsa nübarı.

Rauf Arifoğlu:

"İP"-i reklam edən "Deyli-meyli" var,

İsanın həmişə pula meyli var,

Hələ yaz fəslinə, sözsüz, xeyli var,

İsanın indidən sınıb vüqarı.

Nurəddin Məmmədli:

Dünyanın varlısı və bici bosslar,

Pul buraxanların ən gici bosslar,

Ən böyük insanlar xarici bosslar,

İsa radikalın bəyi, kübarı.

Rauf Arifoğlu:

Deyirəm, qoy batsın radikal boyun,

"Ərəb baharı"nda baş tutmaz oyun,

Əli yaz gələndə otarar qoyun,

Qatar qabağına İsa davarı.

Nurəddin Məmmədli:

Mənə yuxumda da olmuşdu əyan,

Çox ağır seyidlər ediblər bəyan,

Tezliklə başlanar iğtişaş, üsyan,

"Vətən baharı"nın bizdə açarı.

Rauf Arifoğlu:

Xaric sindromundan hər biri dəli,

"İP"-in bir bossa da qovuşmur əli,

İsa adamlara yovuşmur, Əli

İntim həyatında keçib Qacarı.

Nurəddin Məmmədli:

Başqan aşar hər boss dolayınadək,

"Vətən baharı"nın qolayınadək,

Pul üçün dəryanın o tayınadək,

İsa bəy tək-tənha çəkər avarı.

Rauf Arifoğlu:

Enişə aparan yolu çox qısa,

Başqanın əlindən çıxmaqda masa,

Elə qalmaqallı zümrə ki, İsa

Pul qazandırmayıb əlin qabarı.

Nurəddin Məmmədli:

Ayaqlar narıncı çox tenti belə,

Öyər öz yararlı kliyenti belə,

Başqan heç buraxmaz bir senti belə,

Gözaltı etməkdə daim civarı.

Rauf Arifoğlu:

Qərbin tez tutardı kultunu gözü,

Götürməz özgənin pultunu gözü,

Görməz ayağının altını gözü,

İsanın tamahı deşər divarı.

Nurəddin Məmmədli:

Könüllü versəydi, doyardı yəqin,

Onu öz qanına boyardı yəqin,

İsa düşünmədən soyardı yəqin,

Qərargaha gələn varlı macarı.

Rauf Arifoğlu:

İsa sədr postunu, düzü, götürməz,

Boss yerə pul atsa, özü götürməz,

Xarici viskini gözü götürməz,

Arzular kif verən əla macarı.

Nurəddin Məmmədli:

İsa səddi yarar, önü sədd bilsə,

Bədxahlıq püskürər işi bəd bilsə,

Yerində qalmağı fəlakət bilsə,

Anidən arxada qoyar Ucarı.

Mirzə QƏRƏNFİL