Müxalifət birlikləri effekt gətirməyən şouya çevrilib

Elçin Mirzəbəyli:

İkilik-üçlüklər kralsız-tuzsuz,

Radikal liderlər erməni-russuz,

Birliklər yaranır faydasız-duzsuz,

Çəkir ağuşuna onları iflas.

Pənah Hüseynov:

Cümlə radikala lazımdı para,

Kiminsə qəlbinə vuranda yara,

Sən öz qurumunu çəkmə kənara,

Səbət deşiyindən tökülmür gilas.

Elçin Mirzəbəyli:

Uğursuz liderlər yarışıb burda,

"Cırtdan"lar şəkərə daraşıb burda,

Vəziyyət o qədər qarışıb burda,

Çətin ki, ifratlar olsunlar xilas.

Pənah Hüseynov:

İdeya ixracı adi həb deyil,

Barışıq bu yerdə heç də dəb deyil,

Vəziyyət o qədər mürəkkəb deyil,

Təzadlı danışıb, söyləmə cinas.

Elçin Mirzəbəyli:

Qulağın dibinə çatıb lığ, əlbət,

Dirənib boğaza çoxlu tıx, əlbət,

Sizin nəsibiniz bataqlıq, əlbət,

"İP"-ə yığışsa da çoxsaylı ünnas.

Pənah Hüseynov:

Çoxlu bədgümanı vuracaqdı tok,

Sən inanmasan da, olacaq bir şok,

Biz də yaradarıq məxsusi blok,

Qırğızlar qədimdə yaradıb "Manas".

Elçin Mirzəbəyli:

"Soros" diqqət vermir "İP" yeməyinə,

Sizlər məhkumsunuz qul əməyinə,

Yaratmaq bağlıdı boss köməyinə,

Qəbrə köməcəkdi sizləri finans.

Pənah Hüseynov:

Hələ hökmrandı "İP"-də iki rac,

Yəqin birləşməyə verilər əlac,

İsti şəraitə verilər rəvac,

Birliyə təminat verəcək təmas.

Elçin Mirzəbəyli:

Sizlərdə birliyə çatmaz heç səbat,

Burda yas ruhu var, olmaz toy-büsat,

"İP"-də birləşməyə yoxdu mümkünat,

Sizdə birdəfəlik pozulub balans.

Pənah Hüseynov:

Quzu da üzv olsa şirləşər burda,

Şadlıq rəvac verər, bitər şər burda,

İnşallah, ifratlar birləşər burda,

Vacibdi bu yerdə verək bir anons.

Elçin Mirzəbəyli:

Bir zaman çox məşhur heyətlər itib,

Arada olan xoş niyyətlər itib,

Dava-qalmaqaldan cəhətlər itib,

Sizdə son həddinə çatıb basabas.

Pənah Hüseynov:

Dönüb Qərbə doğru dəstəyə baxın,

Olmaz heç bir yana buradan axın,

Gəlməz heç qalmaqal bizlərə yaxın,

Birlik toxumudu bizlərə miras.

Elçin Mirzəbəyli:

Sənin üstündə də böyük babal var,

"İP"-də hökm sürən süst bir əhval var,

Qarşısıalınmaz bir qalmaqal var,

Çıxmasın yadından adi bir nüans.

Pənah Hüseynov:

Bizim məhlədə də söküləcək dan,

Həmrəyliyə gələr "İP"-də hər insan,

Yəqin hər bir lider durar yuxudan,

Hələ bundan sonra mümkündü trans.

Elçin Mirzəbəyli:

Tam nəticəsizdi qurumun səyi,

Sizdə müflis gördüm hər adi bəyi,

Cibidolu bosslar təam mənbəyi,

"İP"-in liderləri müflis bir alfons.

Pənah Hüseynov:

Qərb avro verəndə onu şax verər,

Bizə varlı bosslar pulu çox verər,

Nikbin nağıllarla bizə ruh verər,

Qrimm qardaşları və Anderson Hans.

Elçin Mirzəbəyli:

Yalandan közərtmə heç közü belə,

Yoxdu bu birliyin heç izi belə,

Sizə əlac etməz Sarkozi belə,

Heç işə yaramaz Anatol Frans.

Pənah Hüseynov:

Olmayan bir şeyi həm beş edərək,

Birləşməyə meyli vərdiş edərək,

Biz "İP"-in zalında gərdiş edərək,

Əsil rəqqaslar tək oynayırıq tans.

Elçin Mirzəbəyli:

Mübhəm sakitlikdə fikrə dalacaq,

Həmişə xaricdən vüsət alacaq,

"İP"-iniz daima tənha qalacaq,

Yoxdu bu birliyə adi gözəl şans.

Pənah Hüseynov:

Ahımız oxuyla daşı dələrək,

A qərbli boss deyib zülmlə mələrək,

Birləşə bilməsək, qeyzə gələrək,

Birgə bədxahlardan alarıq qisas.

Elçin Mirzəbəyli:

Ata bilməzsiniz serlik addımı,

Əvvəl atılmalı dirlik addımı,

Birgə atmaq üçün birlik addımı,

Sizin əlinizdə yoxdur bir əsas.

Pənah Hüseynov:

Heç zaman düşmərik dərin yarığa,

Əvvəl cəlb edilib böyük qoruğa,

Bizlər qoşularıq boyunduruğa,

Bizə yardım edən hansısa şünas.

MİRZƏ QƏRƏNFİL