İslam partiyasının sədri “İctimai Palata”da ictimai bir şey görmür

Tahir Abbaslı:

Liderlər özünü göstərməkdə şən,

Guya Qərb bunlarla bölüşməkdə tən,

Düzü, "İctimai Palata"da mən,

Görə bilməmişəm xüsusi məna.

Rauf Arifoğlu:

"İP"-in liderləri keçmişdən qalma,

İlkin mərhələdə saralma-solma,

Tahir, sən yolunu heç İP-dən salma,

Qüvvəni başqa bir quruma sına.

Tahir Abbaslı:

Heç vaxt görməmişdim bundan bərbadı,

"İctimai" sözü qaçırır dadı,

Ona yaraşardı "ümumi" adı,

Qurum çəkilərdi bu adla qına.

Rauf Arifoğlu:

"İP"-çilər boğaza salsın çatını,

Hər biri səhv salıb kişi-qadını,

Lüzumsuz qurumun tutma adını,

Lazım da deyildi bu yerdə həna.

Tahir Abbaslı:

Nahamarlıq vardı "İP"-çi qəddində,

Qüsurlar çox olub xələf cəddində,

Deyillər nakəslər qanmaq həddində,

Çətin bundan sonra nəyisə qana.

Rauf Arifoğlu:

Ümid artıb bossu tez görə-görə,

Üzü padoşlaşıb üz görə-görə,

Çürüyüb "palata" göz görə-görə,

Onlarda qanqrena işləyib qana.

Tahir Abbaslı:

Heç birinin fərəh ənginliyi yox,

Qarşıda möhtəşəm bir hay-küyü yox,

Onların daxili zənginliyi yox,

"İP"-in liderləri bomboş bir xana.

Rauf Arifoğlu:

Güclərindən iraq yerə girdilər,

Elə zənn etdilər onlar şirdilər,

Xırda adlarını dəyişdirdilər,

Özlərindən uzaq bəylərə, xana.

Tahir Abbaslı:

İsa da, Əli də adi qıldılar,

Özü də meydanda naqis qaldılar,

Sözdə desələr də Herakldılar,

Ağılda hər biri öküz və dana.

Rauf Arifoğlu:

Onlar radikalın sərsəmi, gici,

Hər biri qüdrətsiz adi bir cücü,

Olmaz, əlbəttə ki, gücsüzün gücü,

Onlar güclərini çətin ki, dana.

Tahir Abbaslı:

Kədər zəmisini biçdikdən sonra,

Bossun viskisini içdikdən sonra,

20 il üstündən keçdikdən sonra,

Rəvac veribdilər hər biri sona.

Rauf Arifoğlu:

Nə qrupu xoşbəxt, nə də ki, fərdi,

Onları daxildən yeyən qurd çərdi,

İfratın günbəgün artmaqda dərdi,

"İP"-çilərin işi olmaqda fəna.

Tahir Abbaslı:

Radikal qurumlar bağlamır pətək,

Qüssələr artmaqda hey ətək-ətək,

Özləri radikal müxalifət tək,

Olmaq istədilər daxildə "ana".

Rauf Arifoğlu:

Alıb ürəkləri dərdlər-azarlar,

Bilirlər bağlanıb ifrat bazarlar,

Bu parazit tipli mərdimazarlar,

Bossun pullarına öyrənib qona.

Tahir Abbaslı:

Qərbin axıtdığı pulları udur,

Opponent desə də, ifrat, az qudur,

Əlbəttə, hər şeydən yaxşısı budur,

"İP"-də fəaliyyət tezliklə dona.

Rauf Arifoğlu:

"İP"-ə deyilsə də gic bəhanəsiz,

Keçmir, desələr də keç bəhanəsiz,

Getmək istəmirlər heç bəhanəsiz,

Xatırlatsalar da, vaxtı az sana.

Tahir Abbaslı:

Palaza bürünüb ellə sürünmür,

Fərəhə, şənliyə onlar bürünmür,

Radikalda qətrə uğur görünmür,

Buna baxmayaraq, çəkilmir yana.

Rauf Arifoğlu:

İflasa uğrayıb ölü yatacaq,

Nə qədər ki, boss var lövbər atacaq,

Radikal dağılıb sona çatacaq,

O vaxt ki, partladı güclü bir mina.

Tahir Abbaslı:

Gəldi dərd üstündən yeni bir bəla,

"İP" öz reytinqində qalıbdı dala,

Radikal çatacaq elə bir hala,

O zaman ömrünü iblislər yona...

Rauf Arifoğlu:

Dostlar nəzərə də almır heç şeyi,

Hər bir hortdadıb içməkdə meyi,

Qalmayıb yeriyə Əlinin heyi,

İsanın sinəsi lap şana-şana.

Tahir Abbaslı:

Ayaqlar altında dərin bir quyu,

Ay radikal, qərq ol, içində uyu,

Yoxdu radikalın üzünün suyu,

Üzdə deyiləni verirlər fona.

Rauf Arifoğlu:

Qrant azalıbdı, kədərə batıb,

Filin qulağında bu qurum yatıb,

"İP" artıq dəlilik həddinə çatıb,

Əhali əlindən doyubdu cana.

Mirzə QƏRƏNFİL