Mirmahmud Fəttayev Lalə Hacıyevanın liderliyini qəbul etmək istəyir

Mirmahmud Fəttayev:

Payəndaz olaram ayağı altda,

Xoş gün keçirərəm dayağı altda,

Keçirəm Lalənin bayrağı altda,

"MBH" on "İP"-dən daha qüdrətli.

Lalə Hacıyeva:

Polad qılınc kimi Əvəz tək paslan,

Mənim gur çeşməmdə sən də gəl islan,

Bu gün siyasətdə mən diri aslan,

Məni məbəd bilən daha hörmətli.

Mirmahmud Fəttayev:

"MBH"-yə doğru çəkirəm avar,

"İP" ilə aramda sütunsuz divar,

Arvada qoşulma deyənlər də var,

Mənim məramımdan çoxu heyrətli.

Lalə Hacıyeva:

"İP"-çilər tabedi bossdakı gücə,

Qalanı yanıma qaçar bir gecə,

Qeyrətsizlər ağız açar xaricə,

Böyrümə qısılar sən tək qeyrətli.

Mirmahmud Fəttayev:

Qərb bizə köməyi müs-müftə edir,

Lalə də xaricdən həm siftə edir,

"MBH"-yə çoxlu boss qibtə edir,

Hazırda Lalədi, mənəm sürətli.

Lalə Hacıyeva:

"İP"-də bir çoxunu girləyib əcəl,

Bu qurumdan sən də Əvəz tək üz əl,

Baxma "İP" tərəfə, "MBH"-yə gəl,

İndii sənin kimi azdı cürətli.

Mirmahmud Fəttayev:

Önündə dayanıb "İP"-in uçurum,

Xeyli yaxşılaşıb hazırda durum,

Lalədən, Əvəzdən ibarət qurum,

Duzlu-çörəklidi, həm də nemətli.

Lalə Hacıyeva:

Zər atdım yekimi çox şeşə vurdum,

Bir vaxt "Altılar"ı mən "5-ə" vurdum,

İsanı, Əlini çox dişə vurdum,

Mirmahmud mənimçün daha qiymətli.

Mirmahmud Fəttayev:

Artıq liberallar yeməkdə qovud,

Lalə, sən Əlini, İsanı ovut,

"İP" onun yanında yöndəmsiz, kobud,

Lalə "MBH"-si qəşəng, zinətli.

Lalə Hacıyeva:

Düzü, çoxusunu heç əfv etmədik,

Səhv edən kəsləri tez məhv etmədik,

Uzun illər boyu biz səhv etmədik,

Səhv edən düşməli önə minnətli.

Mirmahmud Fəttayev:

İndi "MBH" də çox dəb olunur,

Çoxusundan hasil mətləb olunur,

Quruma girəndən tələb olunur,

O adam olmalı ancaq sünnətli.

Lalə Hacıyeva:

"İP"-in liderləri görür pis yuxu,

Mənim birliyimdə gəl sərbəst oxu,

Hümmətsiz radikal qurumun çoxu,

Bir mənim qurumum ancaq hümmətli.

Mirmahmud Fəttayev:

Radikal durumu basıb kədər-qəm,

Onların alt-üstü tamam olub nəm,

"İP" özü çevrilib olub cəhənnəm,

"MBH" çiçəkli-güllü, cənnətli.

Lalə Hacıyeva:

Bosslar da qoyubdu "İP"-i nemətsiz,

"İP" mənim yanımda çürük, qiymətsiz,

Liberal əsilli mənəm lənətsiz,

Əli, İsa adı bu gün lənətli.

Mirmahmud Fəttayev:

İfrat qurumlarda küləklər əsir,

Liberal durumda artmaqda kəsir,

Başqa qurumlarda sərvət nə gəzir,

Lalə "MBH"-si əsil sərvətli.

Lalə Hacıyeva:

Qurumlar çoxdusa, yanaşma fərdi,

Üstünə tökərəm kədəri-dərdi,

Bir mənim qurumum vətənpərvərdi,

Qalan qurumlara dedim qürbətli.

Mirmahmud Fəttayev:

Bu qurum sünidi, həm də miyanə,

"İP" çox üzvlərə olub biganə,

Əliyə, İsaya baxanda yenə,

Lalədi onlardan çox mərifətli.

Lalə Hacıyeva:

Uysan "Yurd" Əliyə, demək, bəhməzsən,

İsa qurumunda nemət əkməzsən,

Mənim qurumumda xiffət çəkməzsən,

Radikal qurumlar xeyli xiffətli.

Mirmahmud Fəttayev:

"İP" tutub işgəncə, nalə yolunu,

Biz tutduq meyvəli "Jalə" yolunu,

Tutmuşam onunçün Lalə yolunu,

Lalədi insaflı, həm də mürvətli.

Lalə Hacıyeva:

Bosslarda verməyə zinət qalmayıb,

Dostda-sirdaşda da qiymət qalmayıb,

İndi bir kimsədə ibrət qalmayıb,

Bir mənəm füsunkar, həm də ibrətli.

Mirmahmud Fəttayev:

Heç kimdə bacarıq, zəhmət qalmayıb,

İndi ifratlarda hörmət qalmayıb,

Əlidə, İsada şöhrət qalmayıb,

Bir Laləni gördüm eldə şöhrətli.

Lalə Hacıyeva:

"İP" özü hazırda yaman haldadı,

İndi hər birisi məndən daldadı,

Əlinin, İsanın başı qaldadı,

Odur ki, olublar daim töhmətli.

MİRZƏ QƏRƏNFİL