Müxalifət liderlərinin dairəsi genişlənir

Nurəddin Məmmədli:

Liderlər get-gedə durub ayılır,

Köhnələr qorxudan donub bayılır,

İsa da, Əli də köhnə sayılır,

Təzyiqlər artmaqda "İP" əleyhinə.

Əhməd Oruc:

Burda Mirmahmud var, Qulamhüseyn var,

Vaqifin dalınca Rəsul yol açar,

Fuadın mənimlə hövsələmiz dar,

Güclər toparlanıb tip əleyhinə.

Nurəddin Məmmədli:

Köhnənin kürəyi yorğana dəyir,

Yenilər köhnəni güc ilə əyir,

Köhnələr maşınlı olmaq istəyir,

Təzələr döyüşür cip əleyhinə.

Əhməd Oruc:

"İP"-də yaşamaqda maraq əksilir,

İsa da, Əli də artıq əkilir,

Yenilər köhnəyə qənim kəsilir,

Məqsədlər yönəlir cib əleyhinə.

Nurəddin Məmmədli:

Köhnələr xarici tuman sevirlər,

Dollarlar sevirlər, şampan sevirlər,

"İP"-də milçəklər tək yaman sevirlər,

Toplaşıb duralar müf əleyhinə.

Əhməd Oruc:

Kürsünü vermədi heç biri təhvil,

İsanı, Əlini yenməz heç dəlil,

Bacara bilmədi biri 20 il,

Ki, duruş gətirsin kef əleyhinə.

Nurəddin Məmmədli:

"İP"-də hökmranlıq artıq laxlayır,

İsanı, Əlini süqut haqlayır,

Köhnələr nostalji hissi saxlayır,

Təzələr çıxırlar mif əleyhinə.

Əhməd Oruc:

Köhnələr pislərin sırasındadı,

Mübahisə dəstə arasındadı,

Qovğa iki xəstə arasındadı,

Dava da güclənib tif əleyhinə.

Nurəddin Məmmədli:

Mirmahmud birləşib Qulamhüseynlə,

"İP"-də iş görülmür heç də beynilə,

İşgüzar mühit yox açıq eynilə,

Həvəslər köklənib kif əleyhinə.

Əhməd Oruc:

Kobud qəlbliləri yuxa biləcək,

Təzələr köhnəni yıxa biləcək,

Nə İsa, nə Əli çıxa biləcək,

Daş-qaş ilə dolu küp əleyhinə.

Nurəddin Məmmədli:

İndi radikalın gətirib təbi,

Yıxıb sürüyürlər Qərbdə ərəbi,

Hər iki tərəfin kini, qəzəbi,

Sürət götürübdü rif əleyhinə.

Əhməd Oruc:

Yenilər bunları bir hədəf seçib,

Onlar liderlikdə son həddi keçib,

İsa da, Əli də sanki and içib,

Hətta çıxa bilmir ip əleyhinə.

Nurəddin Məmmədli:

Əgər baş verərsə nələr-nələrsə,

O da qübarlanıb bağrı dələrsə,

Bir qurtuma içmək lazım gələrsə,

Getməz mübahisə həb əleyhinə.

Əhməd Oruc:

Əli də, İsa da baş sarıdan daz,

Bosslar da etmirlər onlar ilə naz,

Obyekt olsa əgər çox şirinməcaz,

Çıxan da tapılmaz ləb əleyhinə.

Nurəddin Məmmədli:

Yenilər köhnəyə gözucu baxmaz,

Ancaq onlar kimi tərsinə axmaz,

Təbi olmayanlar, sözsüz ki, çıxmaz,

Bir qədər mükəmməl təb əleyhinə.

Əhməd Oruc:

Yeni olub köhnə səmtinə axsaq,

Bədxahlar üzünə meh təki çaxsaq,

"İP"-çilər üzünə səmimi baxsaq,

Çıxan da tapılar dəb əleyhinə.

Nurəddin Məmmədli:

Olmasa da belə biliyi iti,

Söz deyə bilsəydi yerində qəti,

Əslində, olsaydı səlahiyyəti,

Üsyan qaldırardı çəp əleyhinə.

Əhməd Oruc:

"İP"-ə tətbiq elə qotur buxuru,

Ölü diriltməyə qadir buxuru,

Ovcunda tutduğun nadir buxuru,

Götür cəsarətlə səp əleyhinə.

Nurəddin Məmmədli:

Elə ki, öyrəndin, zilə-biməsən,

Xəncər sən, tüfəng sən, bıçaq, qəmə sən,

Zəhəri bədxahdan əsirgəmə sən,

Götür tərəddüdsüz təp əleyhinə.

Əhməd Oruc:

Səbr eylə həmkarın səbr eyləsə,

Xəbr eylə bədxahlar cəbr eyləsə,

Səni sevənlərin təqdir eyləsə,

Götür təbərrükü öp əleyhinə.

Nurəddin Məmmədli:

Öyündük kiçiklə, həm ulumuzla,

Həm də qane olduq biz pulumuzla,

Həmişə getmişik öz yolumuzla,

Bizə biz sancanın çöp əleyhinə.

Əhməd Oruc:

Çalışın olasız bir qədər fəal,

Sizi qaranlığa aparır xəyal,

Ay İsa, ay Əli, xaricdən pay al,

Onu tənha yeyib köp əleyhinə.

MİRZƏ QƏRƏNFİL