Etibar Məmmədov və Rəsul Quliyev nə fikirləşir?

Etibar Məmmədov:

Qrantlar dolaşdı məndən çox iraq,

Məni cəlb eylədi viski və araq,

Azalıb qəlbimdə siyasi maraq,

Londonda, Parisdə kommersiyam var.

Rəsul Quliyev:

Söndürər qəlbimdə kini siyasət,

Zirvəyə aparar yeni siyasət,

Dörd əllə çağırır məni siyasət,

Mənim də "ACP" adlı dünyam var.

Etibar Məmmədov:

Qazanar tərpənməz mülkə baş əyən,

Uduzub siyasət mənim söyləyən,

Məndən çıxmayacaq kütlə teyləyən,

Əlimdə çox sayda küllü mayam var.

Rəsul Quliyev:

İsa da Əli də küncdə yatıbdı,

Yaxşı dost-tanışlar rişə atıbdı,

Deyəsən, "İP"-in də sonu çatıbdı,

Yeni birliklər tək möhkəm qayam var.

Etibar Məmmədov:

Artıq meydanlara etmişəm tfu,

Qərb də tapdalayır yaxşını, safı,

Yalançı görüntü Rəsulun xofu,

Yaxın gələcəkdə "İP"-də qiyam var.

Rəsul Quliyev:

Ətrafı dövlətdə dəvə fəth edər,

Zehnimi erməni kirvə fəth edər,

Qurumum ucalıb zirvə fəth edər,

Tezliklə çin olan gözəl röyam var.

Etibar Məmmədov:

Xoşdur kommersantlar ilə görüşüm,

Mənə pul gətirir qızıl-gümüşüm,

Parıldamasa da qızıl-gümüşüm,

Daima alışıb-yanan ziyam var.

Rəsul Quliyev:

Meydana yazarıq minlərlə sütül,

Onun üzərinə qoyarıq kətil,

Bossların gözünə üfürməkçün kül,

Yalandan çox zorba böyük guyam var.

Etibar Məmmədov:

Malik olduğumu satıram baha,

Heç kəs də batırmaz məni günaha,

Yalan danışmaqdan bezmişəm daha,

Üzümdə abırım, qəlbdə həyam var.

Rəsul Quliyev:

Xarici banklarda tay-taydı param,

Rus rubl göndərir, erməni dram,

Mənə inanana pul buraxaram,

Neçə pul dərzlərim, neçə tayam var.

Etibar Məmmədov:

Özüm siyasətdən uzaqlaşdım tam,

Çətin ki, geriyə bir addım atam,

Söylədiyim kimi bir kommersantam,

Mənim siyasətdən iti payam var.

Rəsul Quliyev:

Gəlir limuzinim cipin yerinə,

Özüm İsa kimi tipin yerinə,

Qurumun gələcək "İP"-in yerinə,

Siyasi meydanda kamil dayəm var.

Etibar Məmmədov:

Çoxu siyasətdə etməkdə ax-ux,

Küçədə-meydanda işlər çox şulux,

Dəmir-dümürümlə edirəm çax-çux,

Məni çox qoruyan güclü ayəm var.

Rəsul Quliyev:

Çoxu çıxarmadan batanda məni,

Qoxumdan tanıyır şeytan da məni,

Çoxları gözləyir meydanda məni,

Dəstəkçilər üstə böyük sayəm var.

Etibar Məmmədov:

Küçələr, meydanlar gipgirdə qalıb,

Arada da qalın bir pərdə qalıb,

Siyasət beş addım geridə qalıb,

Pul qazanmaq üçün əzmim-qayəm var.

Rəsul Quliyev:

Varımdı Nyu-Yorkda atış sahəsi,

Vardır Baltiklərdə latış sahəsi,

Olsun Etibarın satış sahəsi,

Mənim də meydanda şəxsi sahəm var.

Etibar Məmmədov:

Meylim yox bossların verdiyi küpə,

Lider də demərəm İsa tək tipə,

Verdim siyasəti Rəsula, "İP"-ə,

Mənim də kiçicik satqı vahəm var.

Rəsul Quliyev:

Bu atdan düşən də, minən də olub,

Boğazdan yuxarı dinən də olub,

Siyasətə meylim dünən də olub,

Sabah da olacaq, daha bahəm var.

Etibar Məmmədov:

Kütləyə puç xəyal hörsün istəyən,

Meydanın dadını görsün istəyən,

"İP"-in meydanına girsin istəyən,

Mənim siyasətdən kənar kaham var.

Rəsul Quliyev:

Qopardım, kim verdi mənə əlini,

Meydanda çox qırdım onun belini,

Çox yaxşı bilirəm kütlə dilini,

Mənim həm pulbasdım, həm də baham var.

Etibar Məmmədov:

Bir az sındırıbdı kaha burnumu,

Satmazdım yadlara baha burnumu,

Soxmam siyasətə daha burnumu,

Qazanc yerim olan soyuq saxam var.

Rəsul Quliyev:

Mənim adamların payın çıxarar,

Hər kəs küçələrə tayın çıxarar,

Gəlməsəm, "İP" əlbət zayın çıxarar,

Meydana çıxmalı neçə sovxam var.

MİRZƏ QƏRƏNFİL