Müxalifətin mitinqi düyünə düşür

Qabil Hüseynli:

Əli də, İsa da yaman kövrəkdi,

Bizim dəstəkçilər fəal, zirəkdi,

Yazağzı "İP"-ə bir meydan gərəkdi,

Kütlələr küçəyə, meydana qalsın.

Araz Əlizadə:

Başda beyin yoxdu, dolubdu saman,

Xaricdəki kimi düşübdü tuman,

Sizdə potensial tükənib yaman,

Dilində bir lənət şeytana qalsın.

Qabil Hüseynli:

"İP" boss boğazına oxdu, keçibdi,

Artıq radikalın baxtı keçibdi,

Qıratın, Düratın vaxtı keçibdi,

Kütlələr yabıya, maydana qalsın.

Araz Əlizadə:

Qaytarmaq çətindi ötüb keçəni,

Get viski yerinə hörtdət cecəni,

Payızda sayarlar, düzü, cücəni,

Üzə gələn bahar faydana qalsın.

Qabil Hüseynli:

Qışda kütlələrin çoxu kürklüdü,

İsa da, Əli də hələ şərqlidi,

"İP"-in qaydaları xeyli fərqlidi,

Qoy sənin ASDP qaydana qalsın.

Araz Əlizadə:

Meydan radikala gətirər ziyan,

"İP"-in liderləri həmişə piyan,

Biri Paris deyir, biri slavyan,

Soyad həvəskarı soydana qalsın.

Qabil Hüseynli:

Ayağa durmaqdan bezib kəsiklər,

İndi siyasətdə artıb tezliklər,

Çoxalıb meydandan qaçan əskiklər,

Təzyiqin çoxusu qaytana qalsın.

Araz Əlizadə:

Xalqın başı üstü nurdu, ziyadı,

Sizin ürəyiniz xıltdı, riyadı,

Küçə yürüşləri bir fiksiyadı,

Çay içmək həvəsi çaydana qalsın.

Qabil Hüseynli:

Eyləmə özünə tuş gələcəyi,

Gözlə ASDP-də boş gələcəyi,

Sənin partiyanın xoş gələcəyi,

Bəlaya tuş gəlsin, ziyana qalsın.

Araz Əlizadə:

Zaman daraldıqca "İP" də qudurur,

Sizin liderlərdə yox azca qürur,

Arxada uzun süst bir boşluq durur,

Yürüş-mitinqlərin ziyana qalsın.

Qabil Hüseynli:

Bir qədər kütləşib paslanmış qafan,

Nə də ki, sinəndə çatışmır havan,

Vaşinqtonda qopan fırtına, tufan,

Sənin qurumdakı qayana qalsın.

Araz Əlizadə:

Yazda olacaqdır qəm yürüşləri,

Olacaq sizlərin dəm yürüşləri,

"İP"-in mitinqləri, həm yürüşləri,

Alkaşa-ulkaşa, piyana qalsın.

Qabil Hüseynli:

Küçə meydanları basar hürüşlər,

Planımızda var çoxlu görüşlər,

Bizi məşğul edir mitinq-yürüşlər,

Məlumat israrla yayana qalsın.

Araz Əlizadə:

Kütlə qəmi sizlə bölməyəcəkdir,

Bəxtiniz yazda da gülməyəcəkdir,

Əlinizdən bir iş gəlməyəcəkdir,

Təşkilati işlər həyana qalsın.

Qabil Hüseynli:

Yığırıq meydana şeytanı-şəri,

Yazda biz olarıq mitinqin əri,

Arvadı ər saxlar, pendiri dəri,

Soğanın acısı soyana qalsın.

Araz Əlizadə:

Sizlərə qıl verməz, əsla, ələkçi,

"İP"-ini bəyənməz heç bir məsləkçi,

Sizi qınamayan adi dəstəkçi,

Bu ağ yalanlara uyuna qalsın.

Qabil Hüseynli:

Küçə-meydanlarda qurarıq bardaş,

Taparıq kütlədən sevimli sirdaş,

Atarıq birtəhər başımıza daş,

Pənahın ilana-çayana qalsın.

Araz Əlizadə:

Üzüldü canınız lay arasında,

Arzunuz boss verən pay arasında,

Əli-İsa Qərblə hay arasında,

Qərb buna, Sarkisyan - hay ona qalsın.

Qabil Hüseynli:

Asudəlik buna, hərb ona məxsus,

Başqası vursa da zərb ona məxsus,

Bütün Amerika, Qərb ona məxsus,

Erməni göndərən pay buna qalsın.

Araz Əlizadə:

Fevral ötüb keçər, yazım gələcək,

Sizə dəstək ərəb Kazım gələcək,

Çoxlu pul xərcləmək lazım gələcək,

Mitinqin, piketin mayana qalsın.

Qabil Hüseynli:

Biz kinli, kütlələr havalı-cinni,

Mitinq keçirərik sənni, ya mənni,

Altdan çıxa bilməz heç bir müğənni,

Küçə şənliyiniz Ayana qalsın.

Araz Əlizadə:

Yaz gələnə kimi çıxmaz bığınız,

Tezlikdə artacaq puç dığdığınız,

Sizin kütlələrə qonaqlığınız,

Qoşa qulplu dəmir tiyana qalsın.

MİRZƏ QƏRƏNFİL