Müxalifət partiyaları və onların QHT-ləri

Əhməd Oruc:

"İP"-in öz məxsusi uçurumu var,

Tam iflas olmaqçün ay yarımı var,

Ən zəifinin də bu qurumu var,

İndi QHT-siz radikal yoxdu.

Arzu Səmədbəyli:

Onlarla yetkili eşqi təmiz var,

"İP"-də İsa üçün böyük bir miz var,

Partiyada çoxlu QHT-miz var,

Bizim Müsavatda puç sual yoxdu.

Əhməd Oruc:

Narıncı rəngli bir tent də buraxmır,

İsaya "Malbro", "Kent" də buraxmır,

Xaric QHT-siz sent də buraxmır,

İndi radikalda pak amal yoxdu.

Arzu Səmədbəyli:

Uğura heç zaman vermədik xitam,

Bizə yaxınlaşır liberal "madam",

Başqan olmaq istər 10-dan çox adam,

Guya qalib gələn bir kamal yoxdu.

Əhməd Oruc:

Bizim radikala qrant çatır gec,

Çətin məqamlarda dalğınlaşır vec,

QHT vermədi potensial heç,

Yetkili cismində heç zülal yoxdu.

Arzu Səmədbəyli:

Bizim QHT-nin mənası dərin,

Maliyyəçisi boss şeytanın-şərin,

Nə başqan olmağa namizədlərin,

Nə İsa qəlbində qara xal yoxdu.

Əhməd Oruc:

İsanın, Əlinin həvəsi haram,

Dubayda dəmlənən qəhvəsi haram,

Müsavatı haram, cəbhəsi haram,

QHT-lərində bir halal yoxdu.

Arzu Səmədbəyli:

Əlisi, İsası miskindi bizdə,

Həmişə qalmaqal, pis gündü bizdə,

Şərik, Qərb amili üstündü bizdə,

Deməyək "İP" üstə bir Şimal yoxdu.

Əhməd Oruc:

İstefa vermirlər, kəllələrdə daz,

Küçədə-meydanda səslənir rep, caz,

İsa da, Əli də olub tündməcaz,

Burda bir sifətdə xoş camal yoxdu.

Arzu Səmədbəyli:

Bulaşıb İsanın özünün altı,

Düz məna verməmiş sözünün altı,

Qaralıb hamının gözünün altı,

Nəzərlər önündə bir şümal yoxdu.

Əhməd Oruc:

Radikal üzməkdə gur ləpələrdə,

Gəzib tapmazsınız azca təpər də,

Müxalifətdəki QHT-lərdə,

Nə bir möhkəm arxa, nə də dal yoxdu.

Arzu Səmədbəyli:

İsa, Əli olub Məşədi İbad,

Qərbin də xoşuna gəlməkdə bu ad,

QHT-lər edir hər yanı abad,

İşlər çox yaxşıdı, nəhs pamal yoxdu.

Əhməd Oruc:

Bahar bayramında hər "Yurd", hər oba,

Durub arxamızda Karakas, Kuba,

Müsavat günəşi enib qüruba,

"İP"-də Aylarda da bir hilal yoxdu.

Arzu Səmədbəyli:

Siyasi meydandan aralı çoxdu,

İfratın turş alma xaralı çoxdu,

"Yurd"da Haqverdiyev "maralı" çoxdu,

"İP"-də, Müsavatda bir maral yoxdu.

Əhməd Oruc:

İfrat radikallar labüd günündə,

Çoxdan olmamışlar sabit günündə,

Müsavatın özü, "İP" it günündə,

Orda bir bər-bəzək, cah-cəlal yoxdu.

Arzu Səmədbəyli:

Yaxşı lider yoxdu, şurum-burum var,

"Mu-mu" deyən kəslər, başdan bum-bum var,

Burda QHT var, digər qurum var,

Nə avro, nə dollar, nə də mal yoxdu.

Əhməd Oruc:

İsa tərəfindən təklənib Əli,

Çoxu elə bilir tükənib Əli,

Burda qəm üstündə yüklənib Əli,

Həm də İsa adlı bir məlal yoxdu.

Arzu Səmədbəyli:

O biri ağacı bu biri çırpmır,

Çırpsa da, anidən gözünü qırpmır,

Burda narıncı rəng nəzərə çarpmır,

Xeyi alabəzək saf emal yoxdu.

Əhməd Oruc:

Yetən pajar edib tüstünə çıxıb,

Qərbin, Kremlin büstünə çıxıb,

QHT QHT üstünə çıxıb,

Burda aqil yüklü bir xammal yoxdu.

Arzu Səmədbəyli:

Qərbə meyillənir oğuzlar burda,

Çatmır ünvanına kağızlar burda,

Yumulmur açılan ağızlar burda,

Qara-ağ çeşidli nə də fal yoxdu.

Əhməd Oruc:

Hər biri hazırlar özünü hərbə,

İstəyir dəyməsin özünə zərbə,

Hamı ləbbeyk deyir xaricə, Qərbə,

Öz yükünü çəkən bir hambal yoxdu.

Arzu Səmədbəyli:

İsası-Əlisi "bəşər"dən yüksək,

Aparar özünü hər serdən yüksək,

Tullanmaq istərlər baryerdən yüksək,

Qərbi qane edən müsbət bal yoxdu.

MİRZƏ QƏRƏNFİL