Müxalifət liderlərinin siyasətdənkənar fəaliyyətləri

Araz Əlizadə:

Maraq doğurmaqda başın alveri,

Az qazanc gətirir daşın alveri,

"Ümid"in qisməti maşın alveri,

İqbal avtomobil satır, deyəsən.

Əhməd Oruc:

At alan birinci dişinə baxır,

Ət satan mal-qara leşinə baxır,

"VİP" Əli ticarət işinə baxır,

O da həmkarlara atır, deyəsən.

Araz Əlizadə:

Dolmur qrantlarla əllərdə sini,

Geriyə çəkilib bossların mini,

Etibar qurmaqçün öz biznesini,

Londonda, Berlində yatır, deyəsən.

Əhməd Oruc:

Möhkəm inam var ki, radikal sına,

Xarici dəstəkçi gələr yasına,

Müsavatda gəlir siyahısına,

İsa da marketinq qatır, deyəsən.

Araz Əlizadə:

Qazanc qazanmaqçün çox həb itibdi,

Radikal liderdə həm təb itibdi,

Artıq ara qatıb, məzhəb itibdi,

İfratlar çirkaba batır, deyəsən.

Əhməd Oruc:

Yoxa çəkilmirlər tiplə birlikdə,

Bir-bir yıxılırlar ciplə birlikdə,

İsanın, Əlinin, "İP"-lə birlikdə,

Süqut, iflas anı çatır, deyəsən.

Araz Əlizadə:

Zirvədən enirlər, vahə qalxırlar,

Liderlər raketsiz mahə qalxırlar,

Bəzisi Qırat tək şahə qalxırlar,

Bizisi də köksüz qatır, deyəsən.

Əhməd Oruc:

Üzür radikallar biznes gölündə,

Liderlər tutubdu xurcun əlində,

Əli İsa ilə "İP"-in çölündə,

Qurubdu narıncı çadır, deyəsən.

Araz Əlizadə:

Pul qırmaq radikal bəyin istəyi,

İndi biznes üstə köklənib rəyi,

Zirvədən enibdi Qərbin dəstəyi,

Bossun pulu zəhər dadır, deyəsən.

Əhməd Oruc:

Qazanmaq radikal qəlbə damanda,

Liderlər küçəyə çıxır tumanda,

Radikal biznesmen ahda-amanda,

Basıb hər birini qotur, deysən.

Araz Əlizadə:

Xaricdə İsaya deyilmir bir tuş,

Əli edə bilmir xaricə uçuş,

Əl atır vurmağa qripli bir quş,

Yerinə qurbağa tutur, deyəsən.

Əhməd Oruc:

Radikal durumda işə həvəs az,

Çoxu Qərb önündə etməkdədi naz,

Gəlir hər ağızdan axmaq bir avaz,

Bir deyən də yoxdu "otur", deyəsən.

Araz Əlizadə:

Lider yaxşı deyir əhvali-şərif,

Özü ünvanına yağdırır tərif,

Əlinə keçəndə pullu boss hərif,

Qrantları lüm-lüm udur, deyəsən.

Əhməd Oruc:

Hər biri cibinə qoyur pulları,

Olur çayxanada yaxşı halları,

Varsa bir liderin beş-üç dolları,

Ən fərasətlisi budur, deyəsən.

Araz Əlizadə:

Hər biri kommersant, Allaha pənah,

Adlar arxasında yüzlərlə günah,

Qərbə naz satmaqda radikal cinah,

Naz satır, şahzadə Budur, deyəsən.

Əhməd Oruc:

Radikal cəbhədə çatılıb qaşlar,

Düşməkdə ardıcıl başlara daşlar,

Yümşalıb-boşalıb radikal başlar,

Qərb tutmur başlara çətir, deyəsən.

Araz Əlizadə:

İfrat ətalətdə, səylər bəyənmir,

Çoxu Qərbdən gələn vəhylər bəyənmir,

Artıq peraşkini "bəylər" bəyənmir,

Yeyəcək axırda fətir, deyəsən.

Əhməd Oruc:

İndi radikallar qaçır mal üçün,

Onlarda yumurta yoxdu fal üçün,

Boss əkər bir zaman radikal üçün,

Bir ağac ki, adı qədir, deyəsən.

Araz Əlizadə:

"Bəylər" uzun yolu çox kəsə enib,

Kütləsevərlikdən "SS"-ə enib,

Siyasi pillədən biznesə enib,

Hər biri geriyə gedir, deyəsən.

Əhməd Oruc:

"Bəylər" uzun yolu gedərək kəsə,

Qərb qrantı üstə giriblər bəhsə,

Siyasi meydanda etməyə nəsə,

Deyil radikallar qadir, deyəsən.

Araz Əlizadə:

Qazana bilmirlər "bəylər" bir manat,

Bəyənmir onları indi bir fanat,

Radikal liderlər bir eksponat,

Özü də nadirdən nadir, deyəsən.

Əhməd Oruc:

Lider kürsüsünə mindi kütlələr,

"İP"-də acqarına dindi kütlələr,

"Bəylər"dən yan qaçır indi kütlələr,

Onlar buxarlanıb itir, deyəsən.

MİRZƏ QƏRƏNFİL