İsa Qəmbərov başqanlıq sevdasından əl çəkmir

Arzu Səmədbəyli:

Gətirmir bir faktı tutarlı İsa,

Bossdan pul çəkməkçün azarlı İsa,

Postunda qalmaqda israrlı İsa,

Dönmür o, başqanlıq iddiasından.

Rauf Arifoğlu:

Başqanlıq postuyçün lap çox döyükdü,

Bu məxluq İsadan cəlddi, çevikdi,

Arifin ah-vayı daha böyükdü

İsa Qəmbərovun adi kosundan.

Arzu Səmədbəyli:

O, başqan olacaq, çünki varlıdı,

Özü də hamıdan etibarlıdı,

Bu yolda İsa bəy çox israrlıdı,

Hamı əl üzsə də tale tasından.

Rauf Arifoğlu:

İsa bədxahları sürüyüb getsin,

Digər namizədlər hürüyüb getsin,

Arif qoy türmədə çürüyüb getsin,

İsa qərargahda pörtsün yasından.

Arzu Səmədbəyli:

Həmkarlarla heç görüşmək istəmir,

Bizlər ilə o, yürüşmək istəmir,

İsa artıq başa düşmək istəmir,

Heç nə çıxmaz bihudə "boş-bas"ından.

Rauf Arifoğlu:

Digər liderlərlə cidalda-cəngdə,

20 il uladı eyni ahəngdə,

İsa bəy tünd-açıq narıncı rəngdə,

Əyninə geyinib köynək yosundan.

Arzu Səmədbəyli:

Yalandan deyir ki, işığı görür,

Bossun uzatdığı qaşığı görür,

Hamını özündən aşağı görür,

Bir özünü sayır lider "as"ından.

Rauf Arifoğlu:

Narıncı köynəyi geyib yosundan,

Çəkmir təpiyini o öz kosundan,

Yapışıb dördəlli kreslosundan,

İndi pay da almır İsa bossundan.

Arzu Səmədbəyli:

Arzular ömürlük, o, qaza versin,

İstər ki, xaricə yüz baza versin,

Hazırdı yetkili güdaza versin,

Bu adam əl çəkmir xısın-xısından.

Rauf Arifoğlu:

Bosslar toplusunun boynunu qucmaq,

Peşəsi xülyalar qoynunda uçmaq,

İsanın xobbisi boş-boş danışmaq,

Heç vaxt yapışmayıb sözün "sus"undan.

Arzu Səmədbəyli:

Dözə bilməyərək bu yerdə Bıdı,

Deyərdi bədxahdı İsanın adı,

İfratlar o qədər təxribatçıdı,

Bir şey çıxmayacaq basabasından.

Rauf Arifoğlu:

Müsavatda müsibətlər daldadı,

Çoxu deyir, lider deyil, halqadı,

İndi İsa elə bir pis haldadı,

Yapışardı ermənidən, rusundan.

Arzu Səmədbəyli:

Qərb qrantla yazığı başdan alıb,

Dram haydan, qripi quşdan alıb,

İsa payı bir vaxtlar Buşdan alıb,

Pul alardı Obama Texasından.

Rauf Arifoğlu:

Boğazında milçək, gənə qalıbdı,

Qərargahda o, deyinə qalıbdı,

İsa artıq zəif günə qalıbdı,

Bir kar aşmır kətməni, toxasından.

Arzu Səmədbəyli:

İsa gedir Qərbə mırışmaq üçün,

Namizədlər hazır vuruşmaq üçün,

İsa bəydən hesab soruşmaq üçün,

Gərəkdi yapışaq biz yaxasından.

Rauf Arifoğlu:

Son illər kütləşib iti qılıncı,

İsa Müsavatda olub zarıncı,

Bütün geyimləri mavi-narıncı,

Məhrum olmaq istəmir sovxasından.

Arzu Səmədbəyli:

20 il nə yeyib, qusan görünür,

Daim yanımızda susan görünür,

İsaya qələbə asan görünür,

Ona içirərik öz dovğasından.

Rauf Arifoğlu:

Həpəndlər adına əsil lox deyib,

Bizi bezdirdiniz yaman çox deyib,

Ona və Arifə birgə yox deyib,

Pay da ayırarıq öz qovğasından.

Arzu Səmədbəyli:

Peydər qazandığı maya getməli,

Ayağı altından qaya getməli,

Digər namizədlər toya getməli,

İsa, sədrlərin ən lovğasından.

Rauf Arifoğlu:

Digər namizədlər təmiz adam ki,

Onu tanıyırlar xəbis adam ki,

İsa bəy o qədər naqis adam ki,

Olmaz faydalanmaq heç yuxasından.

Arzu Səmədbəyli:

İsa bəy olubdu yüzlərdən biri,

Onu udacaqdır düzlərdən biri,

Gərək başqan olsun bizlərdən biri,

Qərb qaçır İsanın düz arxasından.

Rauf Arifoğlu:

İsa bir lider ki, köməksiz, aciz,

Dərhal da yerini tutmalıyıq biz,

Hər bir hərəkəti olsa da ucuz,

Yapışıb qrantın ən bahasından.

MİRZƏ QƏRƏNFİL