Müxalifət heç cür bir araya gələ bilmir

Nüşabə Sadıqova:

İsa üzərinə götürüb qəmi,

İanə istəyi sarır aləmi,

Müsavatın sədr müavini kimi,

Bəyanat verirəm: birlik görünmür.

Gözəl Bayramova:

Radikal gözləyir Qərbdən bal, pətək,

Qrant əvəzinə alırlar kötək,

Dedim Əli bəyin dəstəkçisi tək,

Birlik olmayanda, dirlik görünmür.

Nüşabə Sadıqova:

İsa da yalandan təriflər "İP"-i,

Basıbdı yetkili həriflər "İP"-i,

Təngə gətiribdi təkliflər "İP"-i,

Yersizlər çoxalıb, yerlik görünmür.

Gözəl Bayramova:

İsa dayansa da koslar önündə,

Əriyib-yumşalır "as"lar önündə,

Əli yalmansa da bosslar önündə,

Adının önündə serlik görünür.

Nüşabə Sadıqova:

Başqan başdan-başa şərdi-xatadı,

O, elə bilir ki, tənha adadı,

İsa daha böyük iddiadadı,

Heç ona liderlik, merlik görünmür.

Gözəl Bayramova:

İşdə-əməlimdə nər xislətliyəm,

Əli mis, mən isə zər xislətliyəm,

Qadınlığım ilə ər xislətliyəm,

Sədrin durumunda ərlik görünmür.

Nüşabə Sadıqova:

Bunların köməyi olmayacaq haqq,

Birini isitmir ən isti otaq,

İsa materialı çürük bir budaq,

Onda heç pərdlik, tirlik görünmür.

Gözəl Bayramova:

Yoxdu bu fərasət dilsiz qoynunda,

İsa da, Əli də başdı oyunda,

Hamısı dəmirdi qızıl suyunda,

"Yurd"da birilyantlıq, zərlik görünmür.

Nüşabə Sadıqova:

Özü Qərbə baxan qrant oğrusu,

Bossları ac qoyur onu, doğrusu,

Bizlərdə yaradıb ürək ağrısı,

İsada bir qətrə çərlik görünmür.

Gözəl Bayramova:

Maşallah, İsa bəy zəlidən fəal,

Bütün yetkililər dəlidən fəal,

İsa görünməkdə Əlidən fəal,

Əlidə azacıq fərlik görünmür.

Nüşabə Sadıqova:

İsa zildə bədğur əməllərilə,

Ölkədə tanınır Əli şərilə,

Liderlər barışıb talelərilə,

Qrant az olanda, kürlük görünmür.

Gözəl Bayramova:

Uzun ayları da, həm illəri şər,

Kobud ayaqları, həm əlləri şər,

Bizim liderlərin əməlləri şər,

Ancaq özlərinə şərlik görünmür.

Nüşabə Sadıqova:

Təqdim olunurlar əsil pir kimi,

Ayaqlar altında onlar tir kimi,

Kükrərlər mitinqdə pələng, şir kimi,

Əsil həqiqətdə şirlik görünmür.

Gözəl Bayramova:

İsanın, Əlinin başlarına daş,

Edə bilmədilər heç kəsi sirdaş,

Bunların planı hər gün olur faş,

Burda bir məxfilik, sirlik görünmür.

Nüşabə Sadıqova:

Onlar yalnız bossu, Qərbi gördülər,

Küncdə-bucaqlarda ömür sürdülər,

Elə bilirlər ki, xalis dürdülər,

Hərəkətlərində dürlük görünür.

Gözəl Bayramova:

Bir cürə girləyir başını hərə,

Belələri ilə dolu dağ-dərə,

Barışa bilmirlər bunlar heç cürə,

Bu yandan necəlik, cürlük görünmür.

Nüşabə Sadıqova:

İsa qrant deyib zar-zar ağlayır,

Onun bu fəryadı könül dağlayır,

Liderəm deyərək basıb-bağlayır,

Ancaq Cavanşirlik, Kirlik görünmür.

Gözəl Bayramova:

Düzdü, aparanda yavaş aparır,

Onları daxili savaş aparır,

"İP"-i, qurumları qan-yaş aparır,

Tərləyən olsa da, tərlik görünmür.

Nüşabə Sadıqova:

Özləri naəlac pat timsalında,

Bütün qurumları mat timsalında,

İsa, Əli qaçar at timsalında,

Ancaq nə qatırlıq, xərlik görünmür.

Gözəl Bayramova:

Sürünüb düşüblər yalağa kimi,

Onlar gedib çatmaz bulağa kimi,

Çirk-pas içindədi qulağa kimi,

Elə bilirlər ki, kirlik görünmür.

Nüşabə Sadıqova:

Bəylər tanınırlar "şər bala" deyə,

Bədnam iş görərlər Kərbəla deyə,

Döyər sinəsinə Nərbəla deyə,

Ancaq hərəkətdə nərlik görünmr.

Gözəl Bayramova:

Ağıl yox birində heç bircə qram,

İsanın hər püşkü, hər mərci dram,

Umub ermənidən cib xərci-dram,

Ter-Əliyəm deyir, terlik görünmür.

MİRZƏ QƏRƏNFİL