AMİP və “radikalizm siyasəti”

Arzuxan Əlizadə:

İfratlar qarşılar həyat dəbi tək,

Yerimiz həyatın xalis dibi tək,

Deyirəm qurumun baş katibi tək,

Radikalizm yıxıb sürüdü, vallah.

Yusif Bağırzadə:

İfadəm deyildir "Bonn qənaəti",

Saf-çürük etmişəm on qənaəti,

Budur çağdaş sədrin son qənaəti,

İflas üfunəti bürüdü, vallah.

Arzuxan Əlizadə:

Etibar yüksəkdə lider tək çoxdu,

Sən radikalsansa, problem çoxdu,

Burda hamı deyir, eşidən yoxdu,

Radikallar adi sürüdü, vallah.

Yusif Bağırzadə:

Ajiotaj, bir də səs və səmir çox,

Olanda, yetkili qrant əmir çox,

Burda qızıllar yox, paslı dəmir yox,

Radikal iflasın "dürüdü", vallah.

Arzuxan Əlizadə:

İfrat vurur üzə çovğun, qar kimi,

Aparır özünü canı var kimi,

AMİP-ə qudurmuş canavar kimi,

Radikal it kimi hürüdü, vallah.

Yusif Bağırzadə:

Qurum yasa batır vəfat olanda,

İflas yaxınlaşır çox çat olanda,

Pis olur mövqelər ifrat olanda,

Radikal "İP"-ləri kürüdü, vallah.

Arzuxan Əlizadə:

AMİP-də görməzsən pak amal ruhu,

Qranta köklənib "pak kamal" ruhu,

Çökəndə qurumda radikal ruhu,

Radikal, liberal əridi, vallah.

Yusif Bağırzadə:

Davamlı İsanın, Əlinin feli,

Bizi Etibarın əyildi beli,

AMİP-i də yıxdı radikal yeli,

Müsavat "İP"-iylə yeridi, vallah.

Arzuxan Əlizadə:

İflasa düşəndə onun qurumu,

Uçdu çarter ilə hər uçurumu,

İstədi düzəlsin biznes durumu,

Etibar Londonda kiridi, vallah.

Yusif Bağırzadə:

İndi hər partiya keçirməkdə yas,

Radikalizm gəlcək bağlanıbdı tas,

Bütün qurumları bürüyüb çirk-pas,

Bu, elə radikal kirdi, vallah.

Arzuxan Əlizadə:

AMİP əridikcə əsir bədənim,

Əriyir get-gedə AMİP vətənim,

Diri olan bir şey AMİP-ə qənim,

Çürük radikallıq diridi, vallah.

Yusif Bağırzadə:

O olub ən zəif, lüzumsuz bandan,

Salıbdı AMİP-i nüfuzdan, candan,

Radikalizm, düzü, yaranan andan,

AMİP-i sümürən pəridi, vallah.

Arzuxan Əlizadə:

Tamam dağılmayıb, hələ ki, dözür,

Bu qədər tükənməz selə ki, dözür,

Radikal təzyiqə belə ki, dözür,

AMİP möhkəmlərin biridi, vallah.

Yusif Bağırzadə:

Etibarda arzu-kam dağılmayıb,

Biznesdə qurduğu dam dağılmayıb,

AMİP indiyədək tam dağılmayıb,

Yəqin o, həddindən iridi, vallah.

Arzuxan Əlizadə:

Olacaq onlarla qurumun toyu,

Hələ ağzınadək dolmayıb quyu,

Çox xəmir aparıb radikal suyu,

Bu, azman Koroğlu tiridi, vallah.

Yusif Bağırzadə:

Hərə başa düşür bunu bir cürə,

İstər ki. əlində olsun bağ-bərə,

Əgər dağılmırsa, göz görə-görə,

AMİP-də Etibar miridi, vallah.

Arzuxan Əlizadə:

Hücumlar naqafil, həm də az olub,

AMİP də, o - bu da əsil qaz olub,

Radikal bizlərə yaman paz olub,

Bəlkə müxalifət şəridi, vallah.

Yusif Bağırzadə:

Çevirməz "İP"-dəki bəyə dal, virus,

AMİP-i çökürdü sakit, lal virus,

Artıb-çoxalmaqda radikal virus,

Bəlkə də parazit şiridi, vallah.

Arzuxan Əlizadə:

AMİP də "İP" kimi oldu lox qurum,

Onun fəsadından kənar yox qurum,

Bu çər aparıbdı, düzü, çox qurum,

Cəmi müxalifət çəridi, vallah.

Yusif Bağırzadə:

Sönüb getməkdədi mübarizlik, əzm,

Bizdə hökm sürür mey, bakalizm,

Çox fəsad törədir radikalizm,

Elə bil, erməni teridi, vallah.

Arzuxan Əlizadə:

Heç zaman radikal olmamış kamil,

Özü də edilmir müsbətə şamil,

Bəlkə də kiminçün lüzumsuz amil,

Kiminçün, müəmma pirdi, vallah.

Yusif Bağırzadə:

Sarsıdıb bu amil çox bəyi, gici,

Onu adlandıra bilərlər cücü,

Heç onun yenməyə çatmayıb gücü,

Bu da ifratların sirridi, vallah.

MİRZƏ QƏRƏNFİL