Xalq müxalifəti dəstəkləmir

Əhməd Oruc:

Xalqın əsəbləri deyildir dəmir,

Gözləmir o, ifrat liderdən əmr,

Radikal mövqeni xalq dəstəkləmir,

Kütlələr də getmir onun dalınca.

Araz Əlizadə:

Qrant da bossdan hər gedişdə gəlmir,

Qərbin özünün də ət dişdə gəlmir,

İndi əllərindən bir iş də gəlmir,

"Bəylər" də baş qoyub yumşaq balınca.

Əhməd Oruc:

İfrat bir meydana da girə bilmir,

Özü də heç vəchlə, heç cürə bilmir,

Nə mitinq, nə piket keçirə bilmir,

Radikal pul üçün çapır qılınca.

Araz Əlizadə:

"Bəylər" artıq çoxdan dikdən enibdi,

Şamı öləziyib, çıraq sönübdü,

Radikal liderlər xəstələnibdi,

"İP"-in liderləri düşüb qulunca.

Əhməd Oruc:

Zər arzulayırlar, sonu şər olur,

Bədənlər, sifətlər, üz qan-tər olur,

Onlar qərargahda lül-qəmbər olur,

İçirlər viskini kamın alınca.

Araz Əlizadə:

Gücləri çatanda qamçı olurlar,

Xalqa qarşı diliacı olurlar,

Gedirlər Məkkədə hacı olurlar,

"Bəy"in canı çıxır namaz qılınca.

Əhməd Oruc:

Daim "mənəm-mənəm" deyə bilərlər,

Özlərini xeyli öyə bilərlər,

Onlar döşlərinə döyə bilərlər,

Küçə-meydanlarda bir iz salınca.

Araz Əlizadə:

Həmişə kəfənlik ağ yanlarında,

Elə zənn edirlər dağ yanlarında,

Bir iz qoymadılar sağ yanlarında,

Nə də bir gedən yox "bəy"in solunca.

Əhməd Oruc:

Çox rəvan işləyir Qərbdə dilləri,

İllərə calandı durğun illəri,

Liderin simvolik qərənfilləri,

Əlbəttə, olmalı onun kolunca.

Araz Əlizadə:

Həmişə uduzub Tvister "bəylər",

Olmağa hazırdı Petros, ter "bəylər",

İşə yaramadı bu mister "bəylər",

Xalq qovdu onları bəniz solunca.

Əhməd Oruc:

Bunları Soros da adlandırdı gic,

Aşdı baryerləri xərc, məxaric,

Uğursuz "bəylər"ə nə Qərb, nə xaric,

Dəstək də vermədi qrant, pulunca.

Araz Əlizadə:

Axır zamanlarda tükəndi bunlar,

Qərb üçün işlətdi min fəndi bunlar,

Ömürləri boyu gücəndi bunlar,

Bir iş görmədilər "bəylər" qolunca.

Əhməd Oruc:

Bu "bəylər"dən boss da əl üzüşübdü,

İkisi də "İP"-də lap büzüşübdür,

Əli də, İsa da əldən düşübdü,

Canları çıxıbdı bir "bəy" olunca.

Araz Əlizadə:

Başları da çıxmır kolundan artıq,

Bir sent də verməzlər pulundan artıq,

Diqqət göstərməzlər çulundan artıq,

Hörməti edirlər "bəy"ə çulunca.

Əhməd Oruc:

Son vaxtlar dəyişib xeyli halı da,

Xaric qabağı da, "bəy"in dalı da,

Vallah, bu arının xalis balı da,

Ləzzətdə tən deyil "bəy"in balınca.

Araz Əlizadə:

Onun ürəyində şeytanlar, şərlər,

Əlinə keçəni udub-təpərlər,

O qədər yoxalıb seyrəkləşərlər,

"Bəy"in canı çıxar "bəylər" qalınca.

Əhməd Oruc:

Yığıbdı qrantı bol qucağına,

Kibrit də çəkibdi "bəy" ocağına,

Hər biri çəkilib "İP" bucağına,

"Bəylər" musiqini çalsın çalınca.

Araz Əlizadə:

İsanın, Əlinin "İP" xalı qaşda,

"Bəy" abır qoymadı qohum-qardaşda,

Xalq xal da qoymadı radikal başda,

İfrat radikala Qərbin xalınca.

Əhməd Oruc:

Biri xeyir verər, şər birisindən,

Çıxacaq bolluca tər birisindən,

Xaric əl götürər hər birisindən,

Radikallar gedib Qərbə dolunca.

Araz Əlizadə:

Radikal uğuru vəhylərdən uzaq,

Hər biri zəhmətdən, səylərdən uzaq,

Siyasi yetkinlik "bəylər"dən uzaq,

Bu məqam onlara çatar kalınca.

Əhməd Oruc:

Araz aşığından, topuqdan Kürdü,

İfratlar içində ötür-ötürdü,

"Bəy" yolu nahamar, kələ-kötürdü,

Yol olmaz radikal "bəy"in yolunca.

Araz Əlizadə:

Çox böyük bəladı radikal dərdi,

Onların hər biri Qərbə nökərdi,

"Bəy" keçəl başında tük əkdirərdi,

Radikal başında tükü yolunca.

MİRZƏ QƏRƏNFİL