ADP, Müsavat və AXCP (i) arasında ciddi fikir ayrılıqları var

Həsrət Rüstəmov:

Nizamnamə heç uzlaşmır bir qram,

Kökündən fərqlidi bizim proqram,

Natamamdı Müsavat, "Yurd", bizik tam,

İsadan, Əlidən öndədi Sərdar.

Tofiq Yaqublu:

ADP işləmir, qoyulub dincə,

Əlinin özündə rəftar çox incə,

İsada genişdi məntiq, düşüncə,

Sərdarda ağıl da, düşüncə də dar.

Həsrət Rüstəmov:

20 il ərzində bir xəyanət yox,

Guya heç birində bir cinayət yox,

Bunlarda nə əzm, nə mətanət yox,

Nə də həmkarlarla olub düz ilqar.

Tofiq Yaqublu:

Heç bossumuz yoxdu, guya arsızıq,

Mitinqlər sarıdan miskin, barsızıq,

İsalı-Əlili biz vüqarsızıq,

Guya bir Sərdarda tapılıb vüqar.

Həsrət Rüstəmov:

Əlinin gözündən itən gəmidi,

İsa qabağında bitən gəmidi,

ADP cəbhəni ötən gəmidi,

Keçər Müsavatı vursa on avar.

Tofiq Yaqublu:

Sərdar biz qoyunlar önündə quzu,

"İP"-in də İsadı, Əlidi tuzu,

Çoxmu ADP-nin gürcüsü, rusu?

Bizim Müsavatda çox çeçen, avar.

Həsrət Rüstəmov:

Onlar asılacaq bir vaxt payada,

Bizdə səhbəstlik var həddən ziyada,

Əli də, İsa da hələ piyada,

Sərdarla olmuşuq biz ata süvar.

Tofiq Yaqublu:

ADP-ylə qilü-qalımız açıq,

Kütləyə mülkümüz-malımız açıq,

Bizim qabağımız-dalımız açıq,

ADP önündə baryerdi divar.

Həsrət Rüstəmov:

ADP düşməzdi dərin quyuna,

Əlilər, İsalar düşüb oyuna,

Müsavat həsrətdi bulaq suyuna,

"Xırdalan" içmirik, pivəmiz bavar.

Tofiq Yaqublu:

Biz çələng hörürük Qərbin tacından,

İsa, Əli azad bossun bacından,

Sərdar qərargahda ölür acından,

Biz Soros puluyla edirik nahar.

Həsrət Rüstəmov:

İsa Əli ilə yeməkdə qarğış,

"Bəylər" bir-birinə deməkdə alqış,

Bir hücum görmədik nə payız, nə qış,

Guya "Yaz hücumu" başlanar bahar.

Tofiq Yaqublu:

Rəsul da Sərdara çox dedi "səysən",

Pul buraxmayacam xətrimə dəysən,

Bizim nəsibimiz alqışla əhsən,

Sərdar ADP-də yeməkdə qübar.

Həsrət Rüstəmov:

Qazancları Qərbdən sentdir, qəpikdir,

Sümüklərə düşən şaqraq çəpikdir,

Onların nəsibi yumruq-təpikdir,

Hər bahar dadırlar bir zərbə nübar.

Tofiq Yaqublu:

ADP Müsavat önündə bir bit,

Liderlərin yeri siyasətdə xit,

Burada yaratdıq normal şərait,

Bizim sıralarda Sərdarçün yer dar.

Həsrət Rüstəmov:

Hər biri meydanda Həsən Turabdı,

İçdikləri içki viski, şərabdı,

İsa da, Əli də başdan xarabdı,

Təkrar eyləyirlər 20 il şüar.

Tofiq Yaqublu:

Salıb quyruğunu suya, nəmişə,

Daim mitinqlərdə dönüb qəmişə,

Bizim şeş qoşaya Sərdar həmişə

Dütdülü atıbdı, ya da dörd-çahar,

Həsrət Rüstəmov:

"İP" də radikalın qoçağı düşüb,

Altı aydan sonra uşağı düşüb,

"Bəy"lərin qiyməti aşağı düşüb,

Siyasi qiyməti öldürüb tavar.

Tofiq Yaqublu:

Bizdə iş rəvandı, Sərdar bəy çaşıb,

ADP sədrinin iştahı qaçıb,

Rəsul "ACP"-də "MMH" açıb,

İndi Sərdar üçün daralıb civar.

Həsrət Rüstəmov:

Vahid liderlikdən keçməkdə xətri,

Sonralar bilinər Sərdarın qədri,

Müsavat lideri, cəbhənin sədri,

Bossdan pul yığırlar, qurublar mağar.

Tofiq Yaqublu:

Üst-başa yapışan pıtırğan olub,

Bu ahıl vaxtında bağrı qan olub,

Bu Sərdar o qədər qudurğan olub,

Bizim işimizə yanpörtü baxar.

Həsrət Rüstəmov:

Söhbətləri Qərbdə, sözləri Qərbdə,

Elə zənn edirlər özləri Qərbdə,

"İP"-də oturublar gözləri Qərbdə,

İsa da, Əli də verməkdə buxar.

Tofiq Yaqublu:

Əsəbdən bu şəxsin əsir əlləri,

Elə bilir dollar kəsir əlləri,

Bir zaman gördüyü bəd əməlləri,

Sərdar bəy adamın başına qaxar.

Mirzə QƏRƏNFİL