Müxalifətin qoca liderləri siyasi səhnədən getməlidir

Rəsul Quliyev:

"En" qədər xülyaya uyub miflənən,

Burda ayıq azdı, çoxdu keflənən,

İfratlar içində qalıb kiflənən,

Liderlər meydandan çıxmalıdırlar.

İsa Qəmbər:

Xeyli fərqləndirəm narıncı çulla,

Qalaram yerimdə min bir üsulla,

Qoy hamısı getsin müxtəlif yolla,

Başqanlı həmkarlar tıxmalıdırlar.

Rəsul Quliyev:

Öyünün narıncı üst-başınızla,

Nümunə deyilsiz siz yaşınızla,

Gedən deyilsiniz öz xoşunuzla,

Sizləri daxildən yıxmalıdırlar.

İsa Qəmbər:

Hər bir yetkiliyə çox demişəm tuş,

Yeyib-içdikləri qarınlara nuş,

Həmkarlar viskidən olmalı meyxoş,

Kazinoda qumar sıxmalıdırlar.

Rəsul Quliyev:

Yalnız istəyiniz avrolar, dollar,

Gəzməli yeriniz göydələn hollar,

Gəlsin burnunuzdan verdiyim pullar,

Müf yeyən nakəslər pıxmalıdırlar.

İsa Qəmbər:

Bərkisin deyirəm yel qanadları,

Xaricdən, aldığım dəst qrantları,

Mənim verəcəyim mükafatları,

Yetkililər döşə taxmalıdırlar.

Rəsul Quliyev:

Sonda düyünləşib iplər, qaytanlar,

Dolub ürəklərə iblis-şeytanlar,

Liderlərin deyil küçə-meydanlar,

Onlar zibilliyə axmalıdırlar.

İsa Qəmbər:

Bossları vəsf etdim nəsr, nəzmimlə,

Onlar qane oldu azman həzmimlə,

Yetkililər mənim hökmüm, əzmimlə,

Sıçrayıb ayağa qalxmalıdırlar.

Rəsul Quliyev:

Sizə ənam verdim neçə gəmilər,

Doymaz qarnınızda itdi zəmilər,

Verdiyi pulları, mənim kimilər,

Sizlərin başına qaxmalıdırlar.

İsa Qəmbər:

Düşübdü başıma hələ yeni dən,

Məni sevməməli yetkili nədən?

Əvvəl başqan seçib məni yenidən,

Sonra gələcəyə baxmalıdırlar.

Rəsul Quliyev:

Dodaqlarınızda hələ mey-məzə,

Qəhərlər göndərdim xaricdən sizə,

Kütlələr tökülüb, əleyhinizə,

Meydanda şimşək tək çaxmalıdırlar.

İsa Qəmbər:

Zirvəyə ucalıb dünyada sonlar,

İndi yaxşılaşıb narıncı donlar,

Məni başqan seçib yenidən onlar,

Silkinib nehrə tək çalxmalıdırlar.

Rəsul Quliyev:

Bostanın olmadı heç vaxt bitkili,

Getdiyin Müsavat, "İP"-in itkili,

Özünə bənzəyən beş-üç yetkili,

Sənin tək yerində qoxmalıdırlar.

İsa Qəmbər:

Bosslardan alaram saf əqiqləri,

Davam etdirərəm mən təqibləri,

Onlar sənin kimi pis rəqibləri,

Cırnadıb yandırıb-yaxmalıdırlar.

Rəsul Quliyev:

Çox edib yanında səbir yetkili,

Axırda alıbdı qəbir yetkili,

Sənə xidmət edən hər bir yetkili,

Demə ki, çörəkli-yaxmalıdırlar.

İsa Qəmbər:

Qərb qrant göndərdi, çıxdıq çətindən,

Qorusun bizləri Tanrı bədindən,

Yetkililər, bossun səxavətindən,

Hər biri çörəkli-loxmalıdırlar.

Rəsul Quliyev:

Dilini, ay İsa, sən az nəmişlə,

Sənin fərqin çox az çürümüş leşlə,

Boyunu ölçərik sənin qəmişlə,

Səni yerdən yerə soxmalıdırlar.

İsa Qəmbər:

Sərdar səni burdan qovanda uddu,

Odur ki, danışma çox xoddu-xoddu,

Yetkili deyilən yanar bir oddu,

Onlar vulkan kimi maqmalıdırlar.

Rəsul Quliyev:

Sən özün təndirə düşmüş bir kündə,

Get tamadalıq et toyda-düyündə,

Yetkili deyir ki, başqan pis gündə,

Vəziyyətindən də tam halıdırlar.

İsa Qəmbər:

Xeyli tündməcazlıq vardı canında,

Haqsızsan özünün həyəcanında,

Mən cavan oğlanam sənin yanında,

Sizlər qocaların xam malıdırlar.

Rəsul Quliyev:

Sən öndən çıxıbsan, ard hissəsisən,

Liderlərin ölgün, qart hissəsisən,

Eşşək quyruğunun alt hissəsisən,

Ətrafda olanlar pak dalıdırlar.

İsa Qəmbər:

Gedəndə getmisən boş bir dibçəklə,

Çarterlə qayıtdın kobud əlcəklə,

Səni dəstəkləyən güllə-çiçəklə,

Boz qatır boynunun sıx yalıdırlar.

MİRZƏ QƏRƏNFİL