Yusif Bağırzadə “MMH” ideyasının əleyhinə çıxır

Yusif Bağırzadə:

Etibarın başı dolubdu, guya,

Rəsul qoyacaqdı onunçün maya,

Əslində, "MMH" sərsəm ideya,

Etibar, nəhayət, bunu bilməli.

Etibar Məmmədov:

Yaxşı sədr olmadı bizim ocaqda,

Ən pisi Yusifdi, bilir bu haqda,

Çəkilib çox zaman güncdə-bucaqda,

Yusif danışmaqda çəfəng, gülməli.

Yusif Bağırzadə:

Pislərin boş başı çalmalı daim,

Xaricdən çox qrant almalı daim,

Mənim tək yaxşılar qalmalı daim,

Etibar kimilər qəfil ölməli.

Etibar Məmmədov:

Gözlərim dolusu qeybət etmişəm,

Rəsula sirr verib ülfət etmişəm,

Xaricdə onunla söhbət etmişəm,

Mənə olduqca xoş hər bir əməli.

Yusif Bağırzadə:

"MMH"-də çoxlu qullar olacaq,

Bellərində gümüş çullar olacaq,

Rəsulun əlində pullar olacaq,

Etibar dayanıb əli qəməli.

Etibar Məmmədov:

Yolumuz düppədüz-təpəsiz, diksiz,

Zərərli qoşa şeş, onlar du yeksiz,

AMİP "MMH"-yə girəcək, şəksiz,

Rəsulla qoymuşuq dostluq təməli.

Yusif Bağırzadə:

Etibar etina etməz dostuna,

Rəsul kimiləri çıxar rastına,

Çıxsam da hazırda sədr postuna,

Mən evsiz-eşiksiz, odur küməli.

Etibar Məmmədov:

Biri metaldandı, o biri kaşı,

Rəsul sərvətlidi, Yusifdi naşı,

Çıxmır siyasətdən Yusifin başı,

Rəsulda məhsul var dadlı-yeməli.

Yusif Bağırzadə:

Çəkə bilməyəcəm mən başa daraq,

Liderim içəcək viski, cin, araq,

Etibar Rəsula yaxınlaşaraq,

Mənim axırıma çıxır, deməli.

Etibar Məmmədov:

Pullanmaq-Yusifi yaşadır bu mif,

Siyasi zehnini örtübdü çirk, kif,

AMİP-i əməlli çökdürüb Yusif,

Rəsul "MMH"-si inək-məməli.

Yusif Bağırzadə:

Deyir ki, Rəsula qalıbdı güman,

Sifəti nurlanıb açılıb yaman,

İndi Etibara işləyir zaman,

Günlər ötüb keçir şənbə-cüməli.

Etibar Məmmədov:

Bənzəyişləri var Elam oğluna,

İlişdim Yusif tək xlam oğluna,

Yer verdim qoynumda xalam oğluna,

Mənə qarşı çıxdı "VİP"-çi dəm Əli.

Yusif Bağırzadə:

Rəsulun yanında üstünə ənbər

Ataraq, Etibar olub təzə-tər,

Bu gün gedir "İP"-də zil İsa Qəmbər,

Etibar susubdu sanki bəm Əli.

Etibar Məmmədov:

Su götürmək üçün tapmır o, bir qab,

Bunlara çox sadə gətirməkdə tab,

Onun içindədi siyasi çirkab,

Çirk-pasdan danışır Yusif çiməli.

Yusif Bağırzadə:

Burun deşiyini soxaraq tütün,

Qəşş edib özünü unudur bütün,

Etibar qurumu gücləndirməkçün,

Deyir ki, buraya Rəsul gəlməli.

Etibar Məmmədov:

Mən bir fil, Yusifsə adi böcəkdir,

Rəng yeddi olsa da, Yusif min rəngdir,

Elə bilir Rəsul pul verəcəkdir,

Yusif şüurundan bunu silməli.

Yusif Bağırzadə:

Vaxt-bivaxt Rəsulun cipinə girib,

İndi o, süqutun dibinə girib,

Etibar Rəsulun cibinə girib,

Aldığı pulları yarı bölməli.

Etibar Məmmədov:

Sərbəstəm, hər iki qolum açıqdı,

"MMH"-də məlum rolum açıqdı,

Rəsulla gedəcək yolum açıqdı,

Yusifin palçıqlı yolu gölməli.

Yusif Bağırzadə:

Lider danışmaqda sanki bir həpənd,

Bunu deyə bilər bütün şəhər-kənd,

Sədr postunda da mənim dilim qənd,

Etibar son vaxtlar acı kəlməli.

Etibar Məmmədov:

Bəyanat səslənir sərsəm sayağı,

Bir mənəm Rəsulun arxa-dayağı,

Rəsulla yol getməz Yusif ayağı,

Yollar kələ-kötür, həm də ilməli.

Yusif Bağırzadə:

Rəsuldan qaçarsan, yaxını görsən,

Çox tez uçacaqdır mənə bənd hörsən,

Lidersən, get lider işini gör sən,

Yapışma yaxamdan sanki bir zəli.

Etibar Məmmədov:

Yumruğa dözməyə saf dişim vardır,

Rəsulun yanına girişim vardır,

Liderəm, qulumla nə işim vardır,

Mən ağıllı adam, sən isə dəli.

MİRZƏ QƏRƏNFİL