Rəsul Quliyev öz vahid namizədliyi üzərində israr edir

Rəsul Quliyev:

Mitinq dalğaları kükrər, coşarsa,

Kütlələr get-gedə aşıb-daşarsa,

Hərəkat başına kim toplaşarsa,

Lider başqası yox, olaram özüm.

Arif Hacıyev:

Gəlsən "Müqavimət Hərəkat"ınla,

Boğaza bağlansan mənfur çatınla,

Olsan əgər lider pul-barıtınla,

Göstərə bilmərəm "İP"-də mən dözüm.

Rəsul Quliyev:

Bədnam kütlələrin zatı qırıqsa,

İsası, Əlisi həlqəni sıxsa,

Onlarla namizəd qarşıma çıxsa,

Geri çəkilərəm, qurtarar sözüm.

Arif Hacıyev:

Namizəd sıxlığı kəsib nəfəsi,

İtib radikalın ərəb dəvəsi,

Artır Müsavatda lider həvəsi,

Özümü yandırır közərmiş közüm.

Rəsul Quliyev:

Mən cavantəhərəm, uca olacam,

Sizlərə dəstəkçi, baca olacam,

Növbəti seçkidə qoca olacam,

Namizəd olmalı, belədi çözüm.

Arif Hacıyev:

Belə kisəçiylə boldu hamamlar,

Radikal düşərgə dolu yam-yamlar,

İsa əməlini Rəsul tamamlar,

Mən nə eşidirəm, kor olsun gözüm.

Rəsul Quliyev:

Məni lider seçin, xəstə, şəkərəm,

Külli-radikala sadiq nökərəm,

Namizəd olarsam, tütün əkərəm,

Çoxlu pul yığıram, əkərək üzüm.

Arif Hacıyev:

Nə etdin, ABŞ-a uçmaqdan başqa,

Oğurluq pulları qucmaqdan başqa,

Bir iş görməmisən qaçmaqdan başqa,

Bu cür danışmağa açıqdı üzüm.

Rəsul Quliyev:

Mat qalmasanız da, onda pat durun,

Sakitəm, sizlərsə narahat durun,

Siz mənim önümdə farağat durun,

Özüm önünüzə qrantlar düzüm.

Arif Hacıyev:

Sənin tərəfindən xəcalətdi bu,

Əgər dəqiq desək, qəbahətdi bu,

Nə günə düşmüsən, nə halətdi bu?

Bəlkə təklifinlə mən dodaq büzüm?

Rəsul Quliyev:

Peşəniz boş yerə xəyala dalmaq,

Çətin, rəqiblərə qələbə çalmaq,

Məqsədim radikal başçısı olmaq,

İndi ərinməyib səndənmi küsüm?

Arif Hacıyev:

Vüsət, əzm bizdə mətanətdədi,

Nüfuzun enişdə, fəlakətdədi,

Sənin hərəkatın ətalətdədi,

Bu azman Müsavat "İP" ilə bizim.

Rəsul Quliyev:

Sizə pul payladım mən ətək-ətək,

Bir anda xərcləyib yedin, a pəltək,

Yaxın tarixlərdə xoş xatirə tək,

Küçə-meydanlarda qalmaqda izim.

Arif Hacıyev:

Qərbi məftun etdim hər sifətimlə,

Ad da qazanmışam mən zəfərimlə,

Qazandım pulları alın tərimlə,

Qarşında asfaltda qanadı dizim.

Rəsul Quliyev:

Barmaqlıq altından alaraq səni,

Zəhərli əqrəb tək çalaraq səni,

Barmaq arasına salaraq səni,

Elə eləmə ki, milçək tək əzim.

Arif Hacıyev:

Susmuşdum, sən rüşvət alanda, sözsüz,

Sevindim ofsaytda qalanda, sözsüz,

Sənin milyonların olanda, sözsüz,

Yox idi əynimdə bir cırıq bezim.

Rəsul Quliyev:

Sən get kameranda hapını aşır,

Çıxsan, Müsavatda qapını aşır,

Mən söz söyləyəndə, özünü yığşır,

Bu cür ittihamdan, çətin ki, bezim.

Arif Hacıyev:

Azad restoranda vurursan meyi,

Türmədə yeyirəm makaron, düyü,

Yaman pis ağrıyır çənəmin çüyü,

İçimi göynədir həm böyrək vəzim.

Rəsul Quliyev:

Səni yedirtməyə meyilliyəm, sən

Nahaqdan sancırsan, sənə beş əhsən,

Məni hövsələdən çıxarma ki, mən

Armud boğazını hirslənib üzüm.

Arif Hacıyev:

Başqan edəcəkdi məni bu bucaq,

Artıq Müsavatda çatmışam ocaq,

Sənin istəklərin alınmayacaq,

İstəyin odur ki, türmədə çezim.

Rəsul Quliyev:

Çox susdum, siz mənə atan məqamda,

Güldünüz, mən dərdə batan məqamda,

Mən gəlib oraya çatan məqamda,

Hazır olmalıdı stolum, mizim.

Arif Hacıyev:

Yalandan özünü yaman öymüsən,

Çox olub, alnınla yerə dəymisən,

Həmişə sən bizə boyun əymisən,

Mənmi etməliyəm qarşında təzim?

MİRZƏ QƏRƏNFİL