Müxalifət iqtidarla dialoqa girməyi təxirə salır

Sərdar Cəlaloğlu:

Məşğuldu beynimiz bir zəfər haqda,

Xaricdən axacaq dollar, zər haqda,

İndi düşünürük mitinqlər haqda,

Bu gün dialoqa yoxdu ehtiyac.

Araz Əlizadə:

Sizlərdən bir kəsin gəlməz heç xoşu,

Daim taqqıldadıb liderin boşu,

Üstün tutursunuz qəpik-quruşu,

Verərsiz torpağı bossa naəlac.

Sərdar Cəlaloğlu:

Yürüş-mitinqlərə çapmalı atı,

Ortada hallanır dialoq adı,

Bu gediş Rusiya variantıdı,

Bizə fayda verməz bu fitva, amac.

Araz Əlizadə:

Zaman sizi cavan yaşdan çıxarır,

İndi "İP" çörəyi daşdan çıxarır,

Qərb sizi tovlayıb başdan çıxarır,

Vermək həvəsində el boyda xərac.

Sərdar Cəlaloğlu:

Ehtiyac yox siz tək ayinbazlara,

İndi hamı gülür qoyunbazlara,

Bizi dəstəkləyən oyunbazlara,

Verrik Azərbaycan irilikdə bac.

Araz Əlizadə:

Bürünün narıncı rəngli əbaya,

Tapın özünüzçün zorba bir paya,

Sizdən xeyir gəlməz elə-obaya,

Tapın dərdinizə başqa bir əlac.

Sərdar Cəlaloğlu:

Salıb doğanağa uzun örkəni,

Ölçərik ayrıca hər bir bölgəni,

Satıb-sovurandan sonra ölkəni,

Qızıldan qoyarıq başımıza tac.

Araz Əlizadə:

Ağa simanızda görür qulunu,

Müqədəss bilərək bossun pulunu,

İllərlə tutdunuz xaric yolunu,

Yenə də qarnınız doymur, gözlər ac.

Sərdar Cəlaloğlu:

Əsas məqsədimiz kürsü davası,

Bizə pul gətirər xaric havası,

Gerçəkləşər Qərbin xeyir-duası,

Bizlər də olarıq hökmlü bir rac.

Araz Əlizadə:

Ehtikar tamahı tez əyləyin siz,

Kədər-qəminizi həm söyləyin siz,

Vətən yuxasından nuş eyləyin siz,

Qərargaha qoyub xudmani bir sac.

Sərdar Cəlaloğlu:

Vecə də almırıq ötəni belə,

Çətin dolandırmaq gedəni belə,

Pul üçün satarıq vətəni belə,

Hazırda onsuz da dəbdədi hərrac.

Araz Əlizadə:

Cinayət etdiniz eyni cinahda,

Daim işlətdiniz rəzil günah da,

Şah Abbas cildinə girdi Pənah da,

Olmadı biriniz heç Yusif Sərrac.

Sərdar Cəlaloğlu:

Çıxarıb verərdim sənə göz desən,

Dözərdim "İP"-də çox əgər döz desən,

Mənim ünvanıma şirin söz desən,

Sənə yeyərik kabablıq turac.

Araz Əlizadə:

Münasib deyildir həm bic amili,

Atın başınızdan bu gic amili,

Səni məhv edəcək xaric amili,

Sizi təqdir etmir bir saçı qulac.

Sərdar Cəlaloğlu:

Çoxlu qrant düşür yurist İsaya,

Nobel də verilər turist İsaya,

Dram verəcəkdir Paris İsaya,

Əlinin döşündən asacaqdı xaç.

Araz Əlizadə:

İsa son məqamda çal qoca çıxdı,

Alçaqdan danışdın, çox uca çıxdı,

Nə dedin sözlərin tam puça çıxdı,

Boş əngə verirsən, ağarsa da saç.

Sərdar Cəlaloğlu:

Sən bizə düşmənsən, vermə büruzə,

A yazıq, quruyub gəlmisən gözə,

Tez inan yalandan deyilən sözə,

Kim dostam deyirsə, sən sinəni aç.

Araz Əlizadə:

Sizi satqın görüb dirilibdi Qərb,

Bir vaxt eşidərsən devrilibdi Qərb,

Gördün təhlükəyə çevrilibdi Qərb,

O vaxt "İP"-i qırıb ADP-yə qaç.

Sərdar Cəlaloğlu:

Niyə danışırsan, türk demiş, böylə,

Sən get iştahanı möhkəm bülöylə,

Bizi pisləyirsən, düzünü söylə,

Bununçün kim səni edəcəkdi maç?

Araz Əlizadə:

A boss, qoy bizdəki ov tulan qorxsun,

Qurşaqdan aşağı ovulan qorxsun,

Sədr kürsüsündən qovulan qorxsun,

Sərdarı qurumda üzməkdə təlaş.

Sərdar Cəlaloğlu:

Söylə, nə olubsan bizim "İP"-ə paz?

Bəlkə, mən etmişəm Ayazına naz?

Uzaqsa çirkli Kür, bulanıq Araz,

Xəzərə tökülən çirkaba bulaş.

Araz Əlizadə:

Lotudan-potudan dilən, qənd dilə,

Sallaqxanalarda əl aç, ət dilə,

İsadan, Əlidən mərhəmət dilə,

Pul üçün yenidən bosslara əl aç.

MİRZƏ QƏRƏNFİL