Əli Kərimov İsa Qəmbərovu AXCP (i)-də öz egidası altında birləşməyə çağırır

Əli Kərimov:

Sən dərsi bir məndən götürəcəksən,

Dərhal da bosslara ötürəcəksən,

Başqanlıq kürsünü itirəcəksən,

Səni həmkarların atır bayıra.

İsa Qəmbərov:

Gerçəkliyə söykən, gəl şaman olma,

Bədxah ol, gözündən qan daman olma,

Özündən bu qədər bədgüman olma,

"Yurd"da bənzədirlər səni çayıra.

Əli Kərimov:

"İP"-də İsanın yox, Əlinin dəmi,

Qarnına yerləşər təyyarə, gəmi,

Mədəndi dibiboş dərin cib kimi,

Çətin hansısa boss səni doyura.

İsa Qəmbərov:

Deyirsən ki, guya əngin egidan,

O qədər də deyil zəngin egidan,

Özünə bənzəyir yəqin egidan,

Kimdi "Yurd"da gəlib nəsə qayıra?!

Əli Kərimov:

Başqanlıqda qalmaq onun davası,

Onda ölüncədir qrant havası,

Çox da dolu deyil İsa qafası,

O, iti pişikdən çətin ayıra.

İsa Qəmbərov:

Mənə bənzəyənlər meyvəni dərib,

Siyasət beyinə işləyən qrip,

Bu tamaşa deyil, içəri girib

Əli də orada ağız ayıra.

Əli Kərimov:

Narahat da etmir indi heç kəsi,

Batıb Müsavatda İsanın səsi,

"No"-"net"di ruscası, ingiliscəsi,

Bunlar çox bənzəyir türkcə "xayır"a.

İsa Qəmbərov:

Tale bunu mənə pis dost eyləyib,

Mənə bədəməli tez rast eyləyib,

Cəbhəni dağıdıb zapçast eyləyib,

Bəlkə Müsavata özü buyura.

Əli Kərimov:

İclasda başına çevriləcək taxt,

Himayəçi məni göndəribdi baxt,

Başının üstündə olaram hər vaxt,

Dərdi-qəmi olsa mənə duyura.

İsa Qəmbərov:

"Yurd" Əli tamarzı zəli ətindən,

Heç bozbaş da çıxmaz dəli ətindən,

Gəlib cəhənnəmdə Əli ətindən,

İblis öz əlilə kabab qoyura.

Əli Kərimov:

Bir xeyir görmədi masadan isə,

Çoxlu zövq alardı Kosadan isə,

Mən lider olaram, İsadan isə

Düzəldərəm sədr, katib, sairə.

İsa Qəmbərov:

Bossdan alıb verdim, "Yurd" Əli tıxdı,

Qanadlı dəvə tək dam-divar yıxdı,

Əlidən nə lider, nə də sədr çıxdı,

Qoyaram içinə, çəkib dairə.

Əli Kərimov:

Başqan kürsüsünə tərsinə mindi,

"Ərəb baharı"nı alıbdı indi,

Tunisi, Misiri görüb sevindi,

Çəkdi onu qanlı Dəməşq, Qahirə.

İsa Qəmbərov:

İndi istər gəlsin o, cik-cik mənə,

"Gəl yanımda öyrən" dedi dik mənə,

İstəyir eyləsin rəhbərlik mənə,

Bənzər siyasətdə nadan bakirə.

Əli Kərimov:

Basıb dil altına, hap-gopa kimi,

Əl açıb rəvvinə və popa kimi,

Tükənib qocalmış Avropa kimi,

Mənəm siyasətdə yetkin, bakirə.

İsa Qəmbərov:

Oxşar öz "Yurd"unda səy xanaçıya,

Onun oxşarı yox bəy xanaçıya,

Əli heç bənzəmir meyxanaçıya

Bənzədir özünü dahi şairə.

Əli Kərimov:

Danışır o, düşük tumanlar kimi,

Minib Müsavatı yamanlar kimi,

Aparır özünü şamanlar kimi,

Deyir ki, bir mənəm bənzər fakirə.

İsa Qəmbərov:

Əli də toylarda çox tosta gəldi,

Zərəri mən kimi tox dosta gəldi,

"Yurd" Əli əməldə çox astagəldi,

Çəkibdi mən kimi dildə mahirə.

Əli Kərimov:

Min bossun önündə çökər təzimə,

İndi üz çevirib süqut, çezimə,

Necə mən bənzərəm Seyid Əzimə,

O da o cür bənzər şair Zakirə.

İsa Qəmbərov:

Olmaz "Yurd"dan da çox bir betər çirkab,

Əli kimilərə də yetər çirkab,

Üst-başım olmadı o qədər çirkab,

Batıb qulağacan Əli pas-kirə.

Əli Kərimov:

Yeyib yağlı ehsan aşını sənin,

Bağladım biryolluq tasını sənin,

Keçirib əməli yasını sənin,

Səni üzüqoylu qoyum qəbirə.

İsa Qəmbərov:

Siyasət yolunda sən barbar, yam-yam,

Artıq kitabın da, bağlanıb tamam,

"Yurd"un da hamamlar içində hamam,

Yerləşdirə billəm səni xəlbirə.

MİRZƏ QƏRƏNFİL