8 aprel mitinqi baş tutmaya bilər

Arzu Səmədbəyli:

Ələkçi bizlərə qıl verəcəkdir,

Bizə gizlənməyə kol verəcəkdir,

Hər bir mitinq üçün pul verəcəkdir,

Xarici səfirlər vəd verib bizə.

Nurəddin Məmmədli:

Dollar dağarcığı bu kifir bosslar,

Həm səxavətlidi bu kafir bosslar,

Pul verməkdən qaçmır bu səfir bosslar,

Onlar bol içkilər, ət verib bizə.

Arzu Səmədbəyli:

Bossla dursaq da tet-a-tet, alınmır,

Qursaq da yüz xülya, maket, alınmır,

Çoxdandı bir mitinq, piket alınmır,

Tale bəxtimizi bəd verib bizə.

Nurəddin Məmmədli:

Bizlərə otel, holl verməyəcəklər,

Pul nədi, hətta nol verməyəcəklər,

Mitinq pis keçsə, pul verməyəcəklər,

Xaric də məxsusi sədd verib bizə.

Arzu Səmədbəyli:

Mərkəzi meydana biz girək gərək,

Kütlələrə viski içirək gərək,

Möhtəşəm aksiya keçirək gərək,

Yaradan şux qamət, qədd verib bizə.

Nurəddin Məmmədli:

İndi kütlələr də lap asiləşib,

Çox yalançı vədlər qiyabiləşib,

Din də gözümüzdə siyasiləşib,

Mirmahmud qismində cədd verib bizə.

Arzu Səmədbəyli:

Biz deyil onlardı siyasi "as"lar,

Bizlər ayaqları altında koslar,

Birləşib möhkəmcə xarici bosslar,

Vacib bir komanda: rədd verib bizə.

Nurəddin Məmmədli:

Onlarla mitinqin üzü bir yürüş,

Fikrimiz-zikrimiz, düzü, bir yürüş,

İstərdik alınsın cüzi bir yürüş,

Bosslar yüz ölçülü hədd verib bizə.

Arzu Səmədbəyli:

Mənəm tünd narıncı o zərli oğlan,

Boss da sayır bizi dəyərli oğlan,

Bizlərin əksəri ciyərli oğlan,

Yaradan xoşifraz öd verib bizə.

Nurəddin Məmmədli:

Bossların sütunu möhkəm, uçulmaz,

Mitinqdə uğursuz final qaçılmaz,

İllərlə üz sürtsək, rəngi açılmaz,

Xaric dollar adlı büt verib bizə.

Arzu Səmədbəyli:

Heç lüzum da yoxdu şübhə, şəkk üçün,

Xaric imkan istər bizdən ərk üçün,

Meydanda polad tək bərkimək üçün,

Bosslar yem üstündən süd verib bizə.

Nurəddin Məmmədli:

Piketdə hücumda ülgüc görərik,

Pul gəlsə, arxada həm güc görərik,

Meydanda biz biri on üç görərik,

Yaradan gözləri cüt verib bizə.

Arzu Səmədbəyli:

Bizlər pulsuzluqdan sinəsi dağlı,

İtidən də iti bossların ağlı,

Oteldə viskinin ağzını bağlı,

Qadın töhfəsini lüt verib bizə.

Nurəddin Məmmədli:

Yatmadıq nədənsə bossun döşünə,

Xaric çox vursa da bizi dişinə,

Çox vaxt yaramadıq bossun işinə,

Yaradan ağlı da küt verib bizə.

Arzu Səmədbəyli:

Həmişə çalmışıq çəpik, quruşla,

Bizə vurmaq olar təpik quruşla,

Ulduza da hürrük qəpik-quruşla,

Zaman xasiyyəti tünd verib bizə.

Nurəddin Məmmədli:

Xaricin fikrinə daim şərik biz,

Küçədə-meydanda sözdə nərik biz,

Vaxtında yerinə bərkidərik biz,

Boss qrant yerinə vint verib bizə.

Arzu Səmədbəyli:

Söyüşlə deyərik öz sözümüzü,

Kobud apararıq həm özümüzü,

Dərhal sarıyarıq üz-gözümüzü,

Çünki bosslar çoxlu bint verib bizə.

Nurəddin Məmmədli:

Xaric nə verirsə, gərək hap edək,

Köhnə maşını da təzə "RAF" edək,

Pul cüzi olsa da, etiraf edək,

Boss narıncı çadır, çit verib bizə.

Arzu Səmədbəyli:

Kül üfürdük gözə, çəkdik mil əvvəl,

Göstərdik rəqibə ordan dil əvvəl,

Küçədə çox yatdıq 20 il əvvəl,

Meydan xeyli birə, bit verib bizə.

Nurəddin Məmmədli:

Piketdə polislə dirənmək üçün,

Ağızda dişimin əllə çək üçün,

İybilməni yaxşı öyrənmək üçün,

Xaric də afçarka it verib bizə.

Arzu Səmədbəyli:

Çoxlu pulda gördük ancaq faydanı,

Yaxşı anlayırıq pullu qaydanı,

Çevirrik bir anda küçə-meydanı,

Həsrətik sürəkli, möhkəm fit üçün.

Nurəddin Məmmədli:

Mitinq keçirərik ayinbaz kimi,

Xaric tanınıbdı qoyunbaz kimi,

Biz rola girərik oyunbaz kimi,

Bosslar əldən gedir təlxək, şit üçün.

Mirzə QƏRƏNFİL