Müxalifəti Qərbə bağlayan maliyyə vəsaitidir

Araz Əlizadə:

"İP"-di ayaqlara düşüb ağlayan,

Əlidi, İsadı cibi yağlayan,

Hamı bilir sizi Qərbə bağlayan,

Qrantdı, maliyyə vəsaitidi.

Arif Hacıyev:

Bosslar pul vəd edir əsil maq kimi,

Bu ümid İsaya kərə yağ kimi,

Açıbdı ağzını yalquzaq kimi,

"İP" avro qapanda dişi itidi.

Araz Əlizadə:

Nə qədər gur axır Araz, Həkəri,

Uğursuz hərlənsin çərxin təkəri,

Sizin Əli, İsa bossun nökəri,

"İP"-də hər yetkili qapı itidi.

Arif Hacıyev:

Bir "İP"-di Qərbin də təzə atdığı,

Bizik bossun çəkib düzə atdığı,

Qərbin Keyptaundan bizə atdığı,

Kenquru ətidi, pinqivin ətidi.

Araz Əlizadə:

Nahaq min il keçə haqqı əyəmməz,

Müdriklərin başı yerə dəyəmməz,

Sizin yolunuzu Tanrı bəyənməz,

Yeriniz cəhənnəm, sözüm qətidi.

Arif Hacıyev:

Qərbindi üstümdə olan hər şeyim,

Özüm də lüm-lütəm, yalan nə deyim,

Əynimizdə olan narıncı geyim,

Bossun göndərdiyi yardım çitidi.

Araz Əlizadə:

Sığal da çəkmədin saçı qulaca,

Çaxırdan, viskidən gözün alaca,

Pulu boss versə də, boyu balaca,

Sənin başındakı bossun bitidi.

Arif Hacıyev:

İzini naqafil saldın keçmişdə,

Dərin xəyallara daldın keçmişdə,

Sən öz ASDP-lə qaldın keçmişdə,

Səni qabaqlayan qanmaz yetidi.

Araz Əlizadə:

Xarici bosslardan alıb pay belə,

Heç vaxt qanmadınız haqqı-say belə,

Mövcud olmazdınız bircə ay belə,

Sizi dingildədən bossun fitidi.

Arif Hacıyev:

Eşidən dəqiqə rəqibdən hədə,

Sən öz qurumunla getmisən bədə,

Bizim qurumlarla müqayisədə,

Partiyan çox dayaz, həm də şitidi.

Araz Əlizadə:

Küçələr, meydanlar hürüş yeriniz,

Bakı meydanları örüş yeriniz,

Paris, Vaşinqtondu görüş yeriniz,

Etibar bəyinki London-sitidi.

Arif Hacıyev:

Əli də, İsa da zülmünü çəkdi,

Onun toxumunu, sözsüz, Qərb əkdi,

Bizim "İP" bloklar içində təkdi,

Müxalif qurumun yeki-xitidi.

Araz Əlizadə:

Duruşunuz əsla deyil alınan,

Gedəndə gedərsiz yolun solunan,

Sizə xalq adından təklif olunan,

Siyasi meydandan tezcə getidi.

Arif Hacıyev:

Bir zaman salmısan bizi qana da,

Özün də tanındın ən pis mənada,

Sənin özünə də, partiyana da,

Ayazın son sözü qəti netidi.

Araz Əlizadə:

Qəti itələyib bizlərə çulu,

Aldınız bizlərdən qrantı, pulu,

Özünüz xaricin buyuruq qulu,

Bizlərə sözünüz acı, kötüdü.

Arif Hacıyev:

Özünə toxtaq ver, bizi az yanı,

Bizlərdən ayrılıb qorudun canı,

Sən güzgüyə baxıb özünü tanı,

Yanında "İP"-çilər - bizlər ötüdü.

Araz Əlizadə:

Qərbə də, Şərqə də oğru getdilər,

Özləri qranta doğru getdilər,

Türmənin küncünü otel etdilər,

Səni qınayanlar "İP"-in lütüdü.

Arif Hacıyev:

Sıranızda dığa kirvə çatmışmır,

Partiyanda qüllə türbə çatışmır,

Başına da güclü zərbə çatışmır,

Səninki stulda isti ütüdü.

Araz Əlizadə:

De ki, tərk eləsin İsa mizini,

Nə qədər tökməyib kütlə gözünü,

Təkrar əzbərləyin mitinq sözünü,

Küçələr, meydanlar "İP"-in bütüdü.

Arif Hacıyev:

Merkuri, Venera, Mars götürmüşük,

Bəyazid, İstanbul, Qars götürmüşük,

Qərbə, Vaşinqtona kurs götürmüşük,

Sən geridə qaldın, qatar şütüdü.

Araz Əlizadə:

Nəsibin İsanın cırıq torbası,

İstəyiniz ancaq qrant zorbası,

Bölünməz əlinlə eşşək arpası,

Sevdiyin liderlər səndən kütüdü.

Arif Hacıyev:

Ürək bulandırıb daima şirman,

Bizlər mitinqlərə vermişik fərman,

Qurumun bir gülə olmadı dərman,

Ayazın önündə Araz mütidi.

Mirzə QƏRƏNFİL