“KAXCP” “İctimai Palata”nın 22 aprel mitinqində iştirak etməyəcək

Mirmahmud Fəttayev:

Almaq qeyri-mümkün siftə pintindən,

Hörmətmi gözləyim "İP"-də pintindən?

Mən də öz sözümü dedim indidən,

Növbəti mitinqə getməyəcəyəm.

Arzu Səmədbəyli:

İşi elə-belə çözə, fərqi yox,

İstəyirsən uçur-bəzə, fərqi yox,

Gəlirsən-gəlmirsən, bizə fərqi yox,

Səndən güclüləri edəcəyik cəm.

Mirmahmud Fəttayev:

Piket-mitinqini bizə az yama,

Gəlmərəm, əmr etsə Barak Obama,

Nə bildim, vermədim hətta babama,

"İP" nə diqtə edir, etməyəcəyəm.

Arzu Səmədbəyli:

Mitinq Qərb gözündə ucaldır "İP"-i,

22 apreldə olmaz bir ÇP,

İştirak etməsə "cırtdan" "KXACP",

Bizim mitinqlərə çökməz kədər, qəm.

Mirmahmud Fəttayev:

Bir qazanc da gəlmir düzlərdən bizə,

Xaric də buraxmır xəzlərdən bizə,

Onsuz da pay çatmır sizlərdən bizə,

Bosslarından maraq güdməyəcəyəm.

Arzu Səmədbəyli:

Muğandan gedənik, Mildən gedənik,

Qərbin pulu üçün əldən gedərik,

Atadan-babadan zildən gedənik,

Sənsə 20 ildir fırladırsan bəm.

Mirmahmud Fəttayev:

"Cırtdan" qurumlarda başlarda tacam,

Qrant qazanmaqçün sizdən də acam,

Sizin hoqqanıza inanmayacam,

Siyasi meydandan itməyəcəyəm.

Arzu Səmədbəyli:

Arxada Qərb durur, biz əsil dağıq,

Bosslardan pul allıq nə qədər sağıq,

Ciblərinə xeyli pul qoyacağıq,

Kim mitinqə gəlsə, edəcəyik dəm.

Mirmahmud Fəttayev:

Sən öz liderinlə az danış, mumla,

Bir hektar torpaq al, ək, becər, şumla,

Gedərəm irəli öz qurumumla,

Yolunuz üstündə bitməyəcəyəm.

Arzu Səmədbəyli:

Haray-həşir saldın, oldun saqqız, qır,

Heç vaxt göstərmədin bir həya, abır,

Son anda bizləri etdin biabır,

Çətin ki, tapasan bir üsul, yol, çəm.

Mirmahmud Fəttayev:

Qərb bizdən gen qaçıb sizləri tutur,

Batman gəlmək üçün get ağır otur,

"İP"-də liderləri basıbdı qotur,

Elçibəydən sonra mən əsil bəyəm.

Arzu Səmədbəyli:

Bizim hər uğura tökmüsən qəhər,

Qəmli sifətindən tökülür zəhər,

Xoruz banlamasa bircə gün səhər,

"İP"-də açılmazmı de səhər, bəyəm?

Mirmahmud Fəttayev:

Məni siz həmişə sayıbsız üzsüz,

İşığa xor baxıb qalaram gözsüz,

Növbəti mitinqə gəlmərəm, sözsüz,

Güman edirsən ki, tədbirə dəyəm?!

Arzu Səmədbəyli:

Sən oldun cəbhədə bayraq tək əsən,

İndi də olmusan inciyən-küsən,

Bəlkə sən aqillər cərgəsindəsən,

Sənin nəzərində bəlkə mən keyəm.

Mirmahmud Fəttayev:

"İP" alağı üçün orağım yoxdu,

Tədbirlərinizdə sorağım yoxdu,

Sizin mitinqlərə marağım yoxdu,

Bu yöndə sözüm yox, dəyişməz qayəm.

Arzu Səmədbəyli:

Kimsə də xətrinə, yəqin dəyib ki,

İsa bəy sayıbdı bunu eyib ki,

Nəzərdə tutaraq səni deyib ki,

Üstündə olubdu həmişə sayəm.

Mirmahmud Fəttayev:

İsa şux dayanıb, başımı əyib,

Qrant alanda da tək özü yeyib,

Çoxdan böyümüşəm, başa düşməyib,

Olmaq istəyibdi İsa bəy dayəm.

Arzu Səmədbəyli:

Gülmərəm, sən mənə lap gülsən belə,

"İP"-in pis gününü lap bilsən belə,

Növbəti mitinqə lap gəlsən belə,

Çətin ki, önündə çöküb baş əyəm.

Mirmahmud Fəttayev:

Göynəməz burnumun heç ucu belə,

Qrantçün açmaram ovucu belə,

Baxmaram mən "İP"-ə gözucu belə,

Hətta lap özümə desən ki, səyəm.

Arzu Səmədbəyli:

Məni başqan kimi bir kişi sayıb,

Plovun qaymağı, kişmişi sayıb,

Özünü siyasət bişmişi sayıb,

Mən sənə nisbətən demə ki, çiyəm.

Mirmahmud Fəttayev:

Qışqırıb meydanda azğın dəli tək,

20 il sordunuz Qərbi zəli tək,

Mən də istəyirəm İsa, Əli tək,

Bossların verdiyi qrantdan yeyəm.

Arzu Səmədbəyli:

Cibimi dolduran yadı sayıram,

Boss verən qrantı maddi sayıram,

Dediyin, sözləri adi sayıram,

Əlidi həmkarım, İsadı yiyəm.

MİRZƏ QƏRNƏFİL