AMİP və AXP sədrləri “İctimai Palata” haqda danışırlar

Yusif Bağırzadə:

Etibara dedik sən get gəz hələ,

Bosslar da bizlərə irişməz hələ,

AMİP mitinqlərə girişməz hələ,

Verərik biz "İP"-ə kənardan diqqət.

Qiyas Sadıxov:

Əlini evində çulunda gördük,

İsanı Qərbin sıx kolunda gördük,

"İP"-i nəhs siyasət yolunda gördük,

Rəsul Quliyevə göstərdik riqqət.

Yusif Bağırzadə:

Müxalif durmağı eyləyib peşə,

Biz Etibar ilə başladıq işə,

Orda hər lideri vuraraq dişə,

"İP"-dən üz döndərdik onunçün, fəqət.

Qiyas Sadıxov:

Ya küncdə-bucaqda aslan oluruq,

Ya bosslar əlində Məstan oluruq,

Ya biz Müsavata başqan oluruq,

Bunu Pənah bəyə eyləmişik qət.

Yusif Bağırzadə:

Zakuska edərik kök, turp düzəldib,

Kilid sındırarıq şurup düzəldib,

Təsnif oxuyarıq qrup düzəldib,

Ya da bədahətən söyləyirik nət.

Qiyas Sadıxov:

Sıx birləşmək üçün gəzirik məftil,

Biz ciddi qurumuq, "İP"-çilər səfil,

Küçə-meydanlara axışıb qəfil,

Şüar söyləmərik nalayiq, pis, bəd.

Yusif Bağırzadə:

"İP"-i də AMİP-ə, sözsüz, səslərik,

İşıqlı sabaha ümid bəslərik,

Əlbəttə, özümüz seçmə kəslərik,

Əli də, İsa da sıravi bir fərd.

Qiyas Sadıxov:

Kim çəkmək istəmir ağrı-acını,

Çox isti saxlasın gərək sacını,

Tutub getmək çətin "İP"-in ucunu,

Pənah da, Rəsul da AXP-də mərd.

Yusif Bağırzadə:

Çoxdan başa çatıb Əlinin dəmi,

Artıq İsa dadıb kədəri, qəmi,

Kənarda durmasa "İP" bizim kimi,

Sarar qəlblərini min kədər, min dərd.

Qiyas Sadıxov:

Dedik izləməyin izləyənlərə,

Durub yerli-yersiz pisləyənlərə,

Bizi mitinqlərə səsləyənlərə,

Bizim cavabımız olacaqdı sərt.

Yusif Bağırzadə:

Nə qədər ki, Əli naxallıq edir,

Həmkarı İsa da cığallıq edir,

Qərb bu acgözlərə tavanlıq edir,

Kənarda durmağa eyləmişik əhd.

Qiyas Sadıxov:

Onlar aldadırlar yoxsul fağırı,

Daha pis olacaq bunun axırı,

Əgər səngiməsə çağır-bağırı,

"İP"-ə qoşulmağa eyləmərik cəhd.

Yusif Bağırzadə:

Hələ bağışlanar divanə səhvi,

Ondan daha pisdi biganə səhvi,

İsanın, Əlinin yeganə səhvi,

Qərbli bosslarını eyləməkdi mədh.

Qiyas Sadıxov:

İsanı dinməyə günah qoyarmı?

Əlini zirvəyə Allah qoyarmı?

Bizi səhv etməyə Pənah qoyarmı?

AXP-də yoxdu... "İP"-də çoxdu səhv.

Yusif Bağırzadə:

Qərb nə verirdisə Əli götürdü,

Qurumda vurhavur, ötür-ötürdü,

"İP" yolu nahamar, kələ-kötürdü,

İsa elə bilir çox hamarı səth.

Qiyas Sadıxov:

Əli bəy altına döşəyir saman,

İsanın başını örtübdü duman,

Bizi sırasına çağıran zaman,

"İP"-in liderləri edilibdi rədd.

Yusif Bağırzadə:

Bizlərə dəstəkdi çoxsaylı şirkət,

Xarici qrantda olmaz bərəkət,

Ürək bulandırar artıq hərəkət,

Addım atılmamış bilinməli hədd.

Qiyas Sadıxov:

Mühafizə edər, itlə təzyiqi,

Kompüter saytları "bit"lə təzyiqi,

Yaman ağır olur kütlə təzyiqi,

İsada, Əlidə əyiləcək qədd.

Yusif Bağırzadə:

"İP"-də liderləri yaş-qəhər boğur,

Şişirtmə rəqəmlər yalandan doğur,

Mitinqdə qazanmaz heç zaman uğur,

Mən qəti əminəm "İP" olacaq pərt.

Qiyas Sadıxov:

İsanız əlində pis əsa gedir,

Yolunuz şənliyə yox, yasa gedir,

Sizin planınız iflasa gedir,

Əsəbi olmayın, yeganədi şərt.

Yusif Bağırzadə:

Axar bədənindən mütəmadi tər,

Yolunun üstündə durar şeytan, şər,

Qapıları açsan görərsən zərər,

Görsən ki, "İP" gəlir, qapıları ört.

Qiyas Sadıxov:

Seç sığınmaq üçün sən yerin təkin,

Meydan tək nahamar olubdu səkin,

Ay Əli, bu işdən utanıb-çəkin,

İsa bəy, gir "İP"-də qıpqırmızı pört.

MİRZƏ QƏRƏNFİL