Vəhdət sədri müxalifəti ittiham edir

Tahir Kərimli:

"İP"-də toplaşıbdı dələduz, oğru,

Unudun qələbə adlı uğuru,

Gözucu da baxmaz xalq sizə doğru,

Gerçəkləşməyəcək sizin təxribat.

Qabil Hüseynli:

Radikal meyillər beyinə girib,

"Soros" üstümüzə xoş qanad gərib,

Qərbin bosslarını təəccübləndirib,

Avroyla, dollarla alarıq qrant.

Tahir Kərimli:

Sizdə qan qaynamır, ürəklər bumbuz,

Yığılıb oynağa, böyrəklərə duz,

Çətin qazanasız cüzi bir nüfuz,

Qərbə, Şərqə doğru səyirtməklə at.

Qabil Hüseynli:

Bizləri atıbsan, bir maraq eylə,

Bir az soyuqbaş ol, gəl az ağ eylə,

Oturub Vəhdətdə bizə lağ eylə,

20 il pul alır Qərbdən Müsavat.

Tahir Kərimli:

Su o su deyildir, xamır o xamır,

Sizin gözünüzdən qara qan damır,

Yeyin Qərb qidası siz xımır-xımır,

Sizlərdə çatışmır adi bir savad.

Qabil Hüseynli:

Dəstəkçinin sayı sonsuz tel kimi,

Qaçır üstümüzə kütlə yel kimi,

Qrant cibimizə axır sel kimi,

Qərbi işimizlə qoymaqdayıq mat.

Tahir Kərimli:

Yazıq, sürünürsən axı pol ilə,

Kəs əlaqəni də ibdar, nol ilə,

Uzağa getməzsən əyri yol ilə,

Özün də başından xam xəyalı at.

Qabil Hüseynli:

İcra eyləyərik hər əmri reski,

Qərbdə lazım gəlmir sözlər tureski,

Bossun qidasıyla içirik viski,

Bizə zövq gətirir bu sayaq həyat.

Tahir Kərimli:

Süfrəniz qurbağa, bağa qidası,

Sizi təmin edib dığa qidası,

Daim acı olub ağa qidası,

Bossun göndərdiyi içki də boyat.

Qabil Hüseynli:

Bizi pisləməyə başlardın bivaxt,

Səni aramızdan aparıbdı baxt,

Bizim sıramızda dururdun bir vaxt,

A yazıq, get yatmış beynini oyat.

Tahir Kərimli:

Sənə ağıl verən qrek olacaq,

Ən yüksək kürsündə bir JEK olacaq,

Avropada adın Con, Cek olacaq,

Sizi məşğul etmir bu milli soyad.

Qabil Hüseynli:

Tələs, nə qədər ki, dayanıb qatar,

Yoxsa sənə çatan qrant da batar,

Avrodan, dollardan sənə də çatar,

Qayıt "İP"-imizə, göstərmə inad.

Tahir Kərimli:

Başınıza nəhəg bir qaya düşüb,

Kütlə yox, şəklindi aynaya düşüb,

Sənin "İP"-in dərin quyuya düşüb,

İsada, Əlidə qırılıb qanad.

Qabil Hüseynli:

İlkin gözə çarpan pulları allıq,

Kürü atıb, sözsüz, Şolları allıq,

Özümüz avronu, dolları allıq,

İstəsən, biz sənə verərik manat.

Tahir Kərimli:

İsa, Əli oda qalayar səni,

Yeri gələndə də talayar səni,

Onlar daim fırlar, dolayar səni,

"İP"-in liderinə olma sən fanat.

Qabil Hüseynli:

Gördük qaranı da, şəffaf ağı da,

Yüklədi belimə İsa dağı da,

Bizi dəstəkləyir Akif Nağı da,

Onun arxasında mətin durub "QAT".

Tahir Kərimli:

Sənin liderindən qışda qar çıxmaz,

Qərbin bosslarından dövlət-var çıxmaz,

Əlidən, İsadan tərəfdar çıxmaz,

Mən dedim, qoy sənə olsun amanat.

Qabil Hüseynli:

Bir az qısa söylə öz qəzəlini,

"İP"-ə qoşulmaqçün söylə "bəli"ni,

Heç biri uzatmaz yardım əlini,

O zaman nə qədər qışqırsan: "İmdad!"

Tahir Kərimli:

Mümkün qapı döyüb "bəy"ə çıxasan,

Bağışlamaz sünni, şiə çıxasan,

İstər sən tərsinə göyə çıxasan,

Sənə düşməyəcək qurumda mandat.

Qabil Hüseynli:

Nitqini qəzetdən "as"ın oxusan,

Nərddə "İP"-çilərin tasın oxusan,

Üzə saqqal taxıb, "Yasin" oxusan,

Sənə çatmayacaq imam, imamat.

Tahir Kərimli:

Artıq "İP" olubdu bədnam məsəlli,

Baş çıxarmaq çətin şeir-qəzəlli,

Özünə arabir verib təsəlli,

Mən səndən əl çəkdim, özünü aldat.

Qabil Hüseynli:

Bu qurum son eşqi, son vüsalımdı,

Məni "İP"-dən atan qəddar, zalımdı,

İsa ilə Əli generalımdı,

"İP"-in tərkibində mən adi saldat.

MİRZƏ QƏRƏNFİL