Rauf Arifoğlu qurultayın tez keçirilməsini istəyir

Rauf Arifoğlu:

Ay İsa, yerini müəyyən et, tanı,

Çəkil kənarda dur, qaraltma qanı,

Təyin etmək üçün yeni başqanı,

Gərək keçirilsin tezcə qurultay.

Qubad İbadoğlu:

Mənə dəstək verin nikbin, şən olum,

Çalışın İsaya yaxın, tən olum,

Nə olar, bu dəfə başqan mən olum,

Yoxsa salmalıyam bollu hay-haray?

Rauf Arifoğlu:

Şər deyənin ürəyinə ox işlər,

Qərb pul versə, "İP" də qarnı tox işlər,

Başqan olan az danışıb, çox işlər,

Bu məsələ əməl eylə, az baltay.

Qubad İbadoğlu:

Bosslardan üz döndərməsin bir alçaq,

Düyünlənsin çox ürəkdə qara bağ,

Şan dığada qalsın bizim Qarabağ,

Bizim olar Dağıstanla dağ Altay.

Rauf Arifoğlu:

Dalaşsaq, o, bizi ayırıb təklər,

İsa əleyhinə bizdə istəklər,

Qərb də, Vaşinqton da "İP"-i dəstəklər,

Bizim dalımızda dayanar Kitay.

Qubad İbadoğlu:

Sevərəm, narıncı mastından getsə,

Onu əvəzlərəm, mostundan getsə,

İsa qurultayda postundan getsə,

Bil ki, başqan mənəm, sən belə şitay.

Rauf Arifoğlu:

Mən çox sevinərdim, çox yatsa İsa,

Halın pis olacaq, babatsa İsa,

Qurultay vaxtını uzatsa İsa,

Sənin baxtına fal açacaq babay.

Qubad İbadoğlu:

Bir az bənzəri var nadinc məstana,

İsa qoy iş üçün getsin bostana.

Olsun qurultayın yeri Astana,

Bunu müdrikliklə deyibdi Abay.

Rauf Arifoğlu:

Başqanı yıxardım əzmlə, eşq ilə,

İsada maraq var bölkə kəşkülə,

Qurultayın işi düşüb müşkülə,

Məncə, yığıncaqçün pis olmaz Dubay.

Qubad İbadoğlu:

Gəlmədi əynimə narıncı geyim,

Həmişə zirvəyə çatıb bədliyim,

Dəstəklənsə idi namizədliyim,

Kefim kökələrək olardı qolay.

Rauf Arifoğlu:

Mən onu sayardım əsil toy günü,

İclas baş tutsaydı, cari may günü,

Tez təyin edilsə qurultay günü,

Məni sevindirər xoşməram olay.

Qubad İbadoğlu:

Əldə etmək üçün başqanlıq taxtı,

Gərəkdir adamın olsun bir baxtı,

İsa da günbəgün uzadır vaxtı,

Yəqin çaşdıracaq məni bu dolay.

Rauf Arifoğlu:

Bossa göz vuraraq, tərpənib əlli,

Edibdi özünü aləmə bəlli,

Yapışıb postundan İsa dördəlli,

Elə bil, olubdu Yuli Sezar Qay.

Qubad İbadoğlu:

Özü vəziyyətdən yaxşı halıdı,

İndi bəd gətirən nəhs iqbalıdı,

İsa sıravi bir üzv olmalıdı,

Təki mənə qalsın qərargah, saray.

Rauf Arifoğlu:

Bosslar da eşitmir bizim harayı,

Hamı anlamaqda olubdu ayı,

Tezcə keçirməsək biz qurultayı,

Bürokrat İsaya olacağıq tay.

Qubad İbadoğlu:

20 il çürüdür hələ qələti,

Özünə güldürüb İsa milləti,

Başqanlıq fikrindən dönmərəm qəti,

Sən də get özünün saydığını say.

Rauf Arifoğlu:

Düzü, hərəkətdə dalı-dalıyıq,

Hay-haray aşiqi, qilü-qalıyıq,

Təcili İsanı çıxarmalıyıq,

Bu gün astanada dayanıbdı may.

Qubad İbadoğlu:

Axı Müsavatda adi veyiləm,

İsa kimisinə çətin əyiləm,

Başqanlıq fikrimdən dönən deyiləm,

Göstərsə üstümə İsa bir alay.

Rauf Arifoğlu:

Bizə oturacaq İsa bəy baha,

Onu bağışlardım hətta Pənaha,

Başqan seçmək olmaz İsanı daha,

Bu post başqasına veriləcək pay.

Qubad İbadoğlu:

İnanma taleyə, baxta bir qədər,

İsa sınıb olub taxta, bir qədər,

Sərin su içərək toxta bir qədər,

Gedib vuracağam mən pürrəngi çay.

Rauf Arifoğlu:

Çətin başqanlıqdan İsa əl çəkər,

Nə olsun beş ildi boşalıb təkər,

Əlimiz kürsüdən çıxarsa əgər,

Oxuyaq Poladla gərək "Dolalay".

Qubad İbadoğlu:

Sədr mən olardım alqış, fəxr ilə,

Qrant buraxardım falçı fakirə,

İsa qurultayı salsa təxirə,

Tərs gələn işimiz olacaqdı bay,

İşıq salmayacaq üstümüzə Ay.

Mirzə QƏRƏNFİL