Eldar Namazov və onun “reneqat ziyalılar” dəstəsi

Eldar Namazov:

Sənətində salmayıbdı biri diş,

Siyasəti edib özünə giriş,

Neyləyim ki, əllərindən gəlmir iş?

Reneqatlar mənimlədir həmişə.

Razi Nurullayev:

Bizim xeyrimizə olar isbatlar,

"Beşinci kalon" da dizini qatlar,

Bizə dəstək versin qoy reneqatlar,

Bir əncam çəkəcək "İP" də bu işə.

Eldar Namazov:

Bunlara keçirəm üç dəfə təlim,

Şairin başını sığallar əlim,

Çoxdu içlərində yazıçı, alim,

Onlara nə versəm, çəkəcək dişə.

Razi Nurullayev:

Hər biri meylini sənə salıblar,

Reneqat təlimi səndən alıblar,

Kitabları çıxmır, boşda qalıblar,

İndi siyasəti ediblər peşə.

Eldar Namazov:

Uğur qazanmayıb sələmlə bunlar,

Eyni bir şeydilər kələmlə bunlar,

Bir şey qazanmadı qələmlə bunlar,

Mən verdim onlara siyasi tişə.

Razi Nurullayev:

Sözdə Ramiz özü sanki bir Kərəm,

Yazıçı Rüstəmin qarnında vərəm,

Erməni dilində danışır Əkrəm,

Gözlə, salmasınlar səni qəmişə.

Eldar Namazov:

Reneqatlar xeyli Qərbi yanıdı,

Rafiq Evklidi sonra tanıdı,

Mehman agentliyin gül vuranıdı,

Cəmilin bənzəri vardı Məmişə.

Razi Nurullayev:

Əkrəmin əlindən düşübdü ruçka,

Cəmil bəy yazmağa qoyubdu toçka,

Rafiq hər şey bilir məntiqdən başqa,

Rüstəmin ayağı dəyib nəmişə.

Eldar Namazov:

Onun Elçibəyə bir himni vardı,

İsa Qəmbərov da bu himnə yardı,

Ramiz bəy daha çox varlı olardı,

Salsaydı zeynini qarpız-yemişə.

Razi Nurullayev:

Rüstəmə siyənək, çəki verərdim,

Mehmana mən zərdə yeki verərdim,

Əkrəmə inşadan iki verərdim,

Nəğməkar bibisi layiqdi beşə.

Eldar Namazov:

Rüstəm cümləbaşı sındırmaqda diş,

Yaza bilmir roman, nə də elmi iş,

Görmədim Cəmildə cüzi tərpəniş,

Mehmanın bəzəri vardı tam leşə.

Razi Nurullayev:

Dəstək verəcəkdi İsa, ya Əli,

Onun printerə yatmır heç əli,

Son vaxtlar Ramizin dolaşır dili,

Nə qədər yalandan gəlsə də cuşə.

Eldar Namazov:

Ona qərargahı verdim lağ üçün,

Sino gedir daça, ya da bağ üçün,

Erməni dostlarla konuşmaq üçün,

Əkrəm bəy axtarır gizli bir guşə.

Razi Nurullayev:

Onun nə günahı, neyləsin yazar?

Elçibəyin olub o zaman bazar,

Ramizin o məşhur himnləri ki var,

Yaxşı misralardı, yatırlar döşə.

Eldar Namazov:

Onlara kök, xiyar, kələm də verdim,

Bir qədər pul tapıb, sələm də verdim,

Kompüter, makina, qələm də verdim,

Reneqat ziyalı, döşə ki, döşə.

Razi Nurullayev:

Şeir, nəsr dəyməz bir adi bara,

Bunların cibində artıb pul-para,

Qərb pul buraxırsa reneqatlara,

Çətin ki, iynəylə onlar gor eşə.

Eldar Namazov:

Rövşənin dediyi kobud kəlmədi,

Rüstəm rusca yazır, o, bir gəlmədi,

Rafiqin beyninə düstur gəlmədi,

Yazdıra bilmədim Mehmana köşə.

Razi Nurullayev:

Yeyirlər viskidən sonra şor kələm,

Cəmili, Əkrəmi bir əlləm-qəlləm,

Bunları bezdirib dar otaq, qələm,

Hər biri axtarır saf bulaq, meşə.

Eldar Namazov:

Hər biri yönlənib şərə şər kimi,

Çoxlu pul alarlar bir bəhər kimi,

Saqqal buraxıblar qərblilər kimi,

İndi bir çoxunun bığları şeşə.

Razi Nurullayev:

İstedad kanıyla əzəldən varam,

Bossdan pul alaraq olarlar aram,

Özüm reneqata çox inanıram,

İstərəm meydanda onlar tez bişə.

Eldar Namazov:

Qərargahda yatıb qalıbdı tirlər,

Reneqat yığını ən çox baş girlər,

Puldan xumarlanıb yeyib-içirlər,

Artıq güc veriblər şaqraq gülüşə.

Razi Nurullayev:

Heç xoşuma gəlmir məşum adları,

Burda yola verin bu bratları,

Qərbə buraxmayın reneqatları,

Ehtiyat edirəm orda ilişə.

Mirzə QƏRƏNFİL