YUNESKO-nun Hökumətlərarası Komitəsinin 17-ci iclası keçirilib

YUNESKO Baş Qərargahında Mədəni Dəyərlərin Mənsub Olduqları Ölkələrə Qaytarılmasının Təşviqi və ya Qanunsuz Mənimsəmə halında Geri Qaytarılması üzrə YUNESKO-nun Hökumətlərarası Komitəsinin (İCPRCP) 17-ci iclası keçirilib. Sessiyada nazirliyin Beynəlxalq əlaqələr və mədəniyyət proqramları şöbəsinin əməkdaşı iştirak ediblər.

Mədəniyyət və Turizm İdarəsinin Beynəlxalq əlaqələr şöbəsindən verilən məlumata görə, növbəti sessiya zamanı gündəlikdə duran məsələlər - Parfenon Mərmərləri (Böyük Britaniya Birləşmiş Krallığı - Yunanıstan), Boğazköy Sfinksi (Almaniya-Türkiyə) ilə bağlı restutisiya müraciələrinə baxılmış, üzv dövlətlər, YUNESKO-ya tərəfdaş qurumlar tərəfindən məruzələr dinlənilmişdir. İclas zamanı, həmçinin, məsələ ilə bağlı UNİDROİT, WCO, UNODC, İCOM beynəlxalq təşkilatlar, İnterpol və İtaliyanın xüsusi polis xidməti olan Karabinieri bu sahədə ən son fəaliyyətləri haqda məlumat vermiş, Avropa Komissiyasının "Hermes 2011" proqramı təqdim olunmuşdur.

Sessiyada Ermənistan Respublikasının Azərbaycana qarşı həyata keçirdiyi işğalçılıq siyasətinin təkcə ərazi iddiaları ilə məhdudlaşmadığı, belə ki, işğal olunmuş torpaqlarımızda yüz mindən çox eksponatın, zəngin mədəniyyət nümunələrinin oğurlanması, gündəlik dağıntılara məruz qalması, qeyri-qanuni arxeoloji qazıntıların aparılması və aşkar edilmiş obyektlərin mənimsənilməsi halları bir daha sessiyanın iştirakçılarının diqqətinə çatdırılmışdır.

İclas zamanı, Azərbaycan tərəfi zəbt olunmuş ərazilərdə mədəni irsin qorunması üçün praktik və konkret tövsiyələrin hazırlanması üçün YUNESKO-ya müraciət etmişdir.

Məlumat üçün qeyd edək ki, 1988-ci ildən başlanan erməni təcavüzü nəticəsində respublikanın 100 mindən artıq əşyanın toplandığı 22 muzey, 4,6 milyon kitab fondu olan 927 kitabxana, 808 klub müəssisəsi, 4 rəsm qalereyası, 4 teatr müəssisəsi, 2 konsert müəssisəsi, 8 mədəniyyət və istirahət parkı, 85 musiqi məktəbi, 103.2 min ədəd mebel avadanlığı, 5640 musiqi aləti, 481 kinoqurğu, 20 ədəd kinokamera, 423 müxtəlif texniki avadanlıq, 5920 dəst milli kişi və qadın geyimləri, 40 komplekt səsgücləndirici, 25 iri həcmli və 40 kiçik həcmli attraksion işğal altında qalmışdır.

1947-ci ildə Almaniyanın Bremen qalereyasından gətirilmiş və uzun müddət Azərbaycan Dövlət İncəsənət Muzeyində mühafizə olunmuş qiymətli qrafika əsərləri 1999-cu ildə Azərbaycan Respublikası Prezidenti cənab Heydər Əliyevin Fərmanı ilə Bremen qalereyasına qaytarılıb. Dünya tarixində nadir hallarda baş verən bu humanist hərəkət Almaniya ictimaiyyəti tərəfindən böyük razılıqla qarşılanıb.

Həmçinin, 2000-ci ildə Azərbaycana qeyri-qanuni yolla satılmaq məqsədilə gətirilən və İranın Səədəbad Muzeyinə məxsus olan iki ədəd qədim qılınc beynəlxalq tələblərə uyğun olaraq İran tərəfinə geri qaytarılıb.

2010-cu ildə isə Azərbaycan Sərhəd Qoşunları tərəfindən Rusiya qaçaqmalçılarından müsadirə edilmiş beş nadir, qədim ikona Rusiya tərəfinə qaytarılıb.