Xınalıq kəndində arxeoloji qazıntılar aparılır
Xınalıq kəndində 112 evin dam örtüyü Mədəniyyət və Turizm Nazirliyinin vəsaiti hesabına bərpa edilir. Kompleks görülən işlərdə məqsəd kəndin tarixi görkəmini qoruyub saxlamaqdır.
Nazirliyin mədəni irs şöbəsinin müdiri Rüfət Nuriyevin məlumatına görə, bugünədək qəza vəziyyətində olan 85-ə yaxın evdə təmir-bərpa işi başa çatdırılıb. R.Nuriyev bildirir ki, Xınalığa müasir tələblərə uyğun yol çəkildikdən sonra kənd sakinləri öz evlərini müxtəlif üsullarla fərdi şəkildə təmir etməyə başlamışlar. Bu da kəndin unikal tarixi görkəminin itməsi ilə nəticələnə bilərdi. Mədəniyyət və Turizm Nazirliyi vəziyyətin ciddiliyini nəzərə alaraq xüsusi komissiya yaratmış, Xınalıqdakı təmirə ehtiyacı olan evlərin tarixi görkəmini saxlayaraq, bərpa olunması üçün zəruri addımlar atmışdır. Kənddəki qəza vəziyyətində olan Cümə məscidinin bərpası üçün "Azərbərpa" Elmi-Tədqiqat Layihə İnstitutunun mütəxəssisləri tərəfindən layihə hazırlanıb. Təmir-bərpa işlərinin bu ilin sonunadək başa çatacağı bildirilir. Xınalıq kəndində həm də Mədəniyyət və Turizm Nazirliyi tərəfindən kəşfiyyat tipli arxeoloji qazıntı işləri aparılır.
Xınalıq Dövlət tarix-memarlıq və etnoqrafiya qoruğunun ərazisində qədim yaşayış məntəqəsi və 1 ədəd kurqan aşkarlanıb. Ərazidə işləyən arxeoloq İdris Əliyevin bildirdiyinə görə, tapıntıların tunc dövrünə aid olması ehtimal edilir. Arxeoloq tapıntıların böyük əhəmiyyətə malik olduğunu deyib. Onun sözlərinə görə, yaşayış məntəqəsi və kurqanın tədqiqindən sonra Xınalıq kəndi ilə bağlı bəzi mübahisəli məsələlərə aydınlıq gətirilə bilər.
