Qəbələ rayonunun Nic kəndi YUNESKO-nun Qeyri-maddi mədəni irs siyahısına daxil ediləcək

Azərbaycanda udinlərin yaşadığı Qəbələ rayonunun Nic kəndinin Azərbaycanın digər mədəniyyət məkanları ilə yanaşı, YUNESKO-nun Qeyri-maddi mədəni irs siyahısına salınması təklif edilir. Bu məqsədlə artıq müvafiq sənədlər təşkilata göndərilib, hazırda bu istiqamətdə danışıqlar aparılır.

Vatikan arxivlərində Azərbaycan tarixinə aid materiallar da araşdırılır. Mədəniyyət və Turizm Nazirliyi ilə Vatikanın müvafiq qurumu arasında imzalanmış müqaviləyə əsasən, nazirlik tərəfindən Vatikan arxivlərində olan, Azərbaycan tarixinə və Qafqaz Albaniyası dövrünə aid bütün materiallar araşdırılacaq. Bunun üçün Azərbaycan Milli Elmlər Akademiyasının nümayəndələri həmin ölkəyə dəfələrlə ezam edilib və hazırda bu proses davam etdirilir.