AMİP "İP"-i, "İP" də AMİP-i bəyənmir

Yusif Bağırzadə:

İsa deyir Qərbdə bir ocaq qurum,

Bosslarla aranı çox sıcaq qurum,

"İP" Qərbdən pul uman oyuncaq qurum,

Araz aşığından, Kür topuğundan.

Gülağa Aslanlı:

İçdiyiniz belə yalan and oldu,

Liderin gözündə bir qrant oldu,

Etibar da dönüb kommersant oldu,

Sizlər də AMİP-in küt lopuğundan.

Yusif Bağırzadə:

Sizlərə yapışan "VİP"-inizin də,

İsa, Əlik kimi tipinizin də,

Bir zaman "möhtəşəm" "İP"-inizin də,

Qorxun siz çatından və qopuğundan.

Gülağa Aslanlı:

"İP"-in süfrəsində boldu məzə-mey,

Bizim məqsədimiz, sözsüz ki, ley-pey,

Gözləmək də olmaz bundan artıq şey,

Sizin tək gözləri kor qıpığından.

Yusif Bağırzadə:

Az qalır Əlinin, "İP"-in sonuna,

Dəyər liderinin, hətta onuna,

Bax bir Etibarın vid-fasonuna,

Kübarlıq yağmaqda bir papağından.

Gülağa Aslanlı:

"İP" özü AMİP-dən iri qalıbdı,

Həm də qurumumuz diri qalıbdı,

AMİP düz 20 il geri qalıbdı,

Çox "VİP" ayrılıbdı bir çapığından.

Yusif Bağırzadə:

Kişisən, qurum tap, orda ad çıxar,

Akif Nağını da "İP"-ə qat, çıxar,

Yüzlərlə "İP" çıxar, Müsavat çıxar,

AMİP-in lüzumsuz üst qapağından.

Gülağa Aslanlı:

Bəlkə də piyan, tir kommersant olub,

Londonda pələng, şir kommersant olub,

Etibar böyük bir kommersant olub,

Yapışdıq qrantın biz ufağından.

Yusif Bağırzadə:

Serj hamının olsun, Ter birinizin,

Xeyir bizim olsun, şər birinizin,

Bədnam yerinizdən hər birinizin,

Tük çıxıb özü də lap apağından.

Gülağa Aslanlı:

Sizin kimilərə yoxdu sözümüz,

Qaldıq Etibara məətəl özümüz,

Su içməyib bizim "İP"-dən gözümüz,

AMİP-in dağınıq o tifağından.

Yusif Bağırzadə:

Gülağa, deyirəm, olaydı toyun,

"Yurd"u, ətrafını sayıbdı qoyun,

İsa kimisinə əyməmiş boyun,

Etibar yeməmiş heç qabağından.

Gülağa Aslanlı:

İsanın, Əlinin gözləri bədnam,

Gəlsin Etibara, AMİP-ə qadam,

"İP"-ə qoşulandan sonra hər adam,

Təhqir gözləməzdi öz uşağından.

Yusif Bağırzadə:

Axdım sizləri çuxur yuxarı,

Bizdə ilğım belə axır yuxarı,

AMİP-də yetkili baxır yuxarı,

"İP" gələr sənin də lap aşağından.

Gülağa Aslanlı:

Sizdə danışmaqdan genəlibdi əng,

"İP"-ə üzvlərdən çoxalmaqda zəng,

Bizim "İP"-də olan adi bir pələng,

Yaxşıdı AMİP-in yüz vaşağından.

Yusif Bağırzadə:

"İP"-də yüz mərəkə qoparır sabah,

Lüzumsuz məkana həm varır sabah,

Bizlərdə Londona aparır sabah,

Qorx süquta gedən öz sabahından.

Gülağa Aslanlı:

Sizdə qalmayıbdı namus, ar belə,

Adınız aləmə olub car belə,

Sən özün cəhənnəm, Etibar belə,

Bilmir nə asılıb "İP" tabağından.

Yusif Bağırzadə:

Sənə çox demişəm gülmə qonşuna,

Təpmisən özünü "İP"-də qoşuna,

O gün də danışdın sən boş-boşuna,

Səni asacağıq biz qurşağından.

Gülağa Aslanlı:

Siyasi durumu izləmək olmaz,

Ulaq yerimirsə, bizləmək olmaz,

Vallah, ciddi nəsə gözləmək olmaz,

AMİP-in sizin tək balqabağından.

Yusif Bağırzadə:

Çox olub "İP"-ində qarışığın da,

Küskünlük çaları barışığında,

Müəmma-nitqin də, danışığın da,

Bir şey baş açmıram dal-qabağından.

Gülağa Aslanlı:

10-15 il əvvəl mən sənə taydım,

Adını obaya, ellərə yaydım,

Səni görən kimi AMİP-çi saydım,

Tanıdım narıncı yar-yamağından.

Yusif Bağırzadə:

İstər mənə qəlbən söy, qrijasan,

Başı daşdan-daşa döy, qrijasan,

Başa düşdüm başdan key qrijasan,

Bildim bunu fikrə tez cummağından.

Gülağa Aslanlı:

Pambığa daraşan həm sovka şeysən,

Yoşka yox, sən adi bir Vovka şeysən,

Nitqindən qavradım deşovka şeysən,

Payın azalacaq çox ummağından.

MİRZƏ QƏRƏNFİL