Sosdemlərin mövcud "İP" və "ACP" qrupuna göstərdikləri münasibət

Araz Əlizadə:

Yeni gələn köhnələri pisləyir,

Hər biri də məqsədini gizləyir,

"ACP" də "İP"-i yenmək istəyir,

İndi əsil sosdemlərin çağıdı.

Arzu Səmədbəyli:

Abrı ətəyinə bükdü Müsavat,

İsanın əlində çökdü Müsavat,

"İP"-in dəstəkçisi - yekdi Müsavat,

Qərargahı əsil cənnət bağıdı.

Araz Əlizadə:

Bürünübdü qaranlığa dost dəmlər,

"İP"-də xeyli azalıbdı qədəmlər,

İndi sürət götürübdü sosdemlər,

Bizə dəstək "QAT"-da Akif Nağıdı.

Arzu Səmədbəyli:

Müsavat da yıxmayacaq mənimi?

Başqan özü qovmaz başda çənimi,

"ACP"-di "İP"-in əsil qənimi,

Özümüzünkünə İsa yağıdı.

Araz Əlizadə:

İsa, Əli çox yedilər haramı,

Boss yeminin bizə qalmaz qramı,

Köhnəlməkdə partiyanın məramı,

Saralan da gözümüzün ağıdı.

Arzu Səmədbəyli:

Qərargahda hamı çıxıb mazağa,

Cənnət əhli üz tutubdu düzağa,

Müsavatdan Əkbər gedib uzağa,

"ACP"-ylə üstümüzə şığıdı.

Araz Əlizadə:

Artıq xeyli pisləşibdi durumlar,

Əsəblərə çəkilibdi tarımlar,

Solçuluğa meyl etməkdə qurumlar,

Getdiyi yol Sülhəddinin sağıdı.

Arzu Səmədbəyli:

Boss qoxusu tükənibdi kasanın,

Üstlərində bir hissəsi tasanın,

İndi "İP"-də Əli ilə İsanın,

İçdikləri zəhər ilə ağıdı.

Araz Əlizadə:

Rəsulun da bollu şabaş əlində,

"İP"-çilərin qalıbdı daş əlində,

Həm İsanın, Əlinin boş əlində,

Qalan iplik ayaqqabı bağıdı.

Arzu Səmədbəyli:

"İP"-də görmək mümkün deyil naqqalı,

"ACP"-yə cəlb edirlər baqqalı,

Qırxılıbdı Sülhəddinin saqqalı,

Ona qalan Rəsulun cod bağıdı.

Araz Əlizadə:

Mənzilləri çatmaqdadı sonlara,

Müsavatın əli çatmır conlara,

İndi Qərb də qrant vermir onlara,

Əllərində qalan qoyun qığıdı.

Arzu Səmədbəyli:

Düşdükləri uçurumun dibi boş,

Sülhəddinin özünün də təbi boş,

Nyu-Yorkda Rəsul qalıb cibi boş,

"İP"-də qrant sanki təzək tığıdı.

Araz Əlizadə:

Adlarına tuş gəlmədi ucalan,

Demək olmaz hətta Qərbdən bac alan,

İsa, Əli "palata"da qocalan,

Bu qurumun bayquşudu, vağıdı.

Arzu Səmədbəyli:

Ağarıbdı saç-saqqalı, birçəyi,

Bu vaxtında çıtlayıbdı çiçəyi,

Bu addımı Sülhəddinin gerçəyi,

Rəsulun da bu gedişi lağıdı.

Araz Əlizadə:

Alkaqolik sayılmamış hər içən,

20 ildi yorulmaqda yol keçən,

İsa, Əli vampir kimi qaniçən,

Müsavat, "İP" xalis qan çanağıdı.

Arzu Səmədbəyli:

Sözsüz, şirin su çıxmaz hər quyudan,

Lider olmaz canavardan, ayıdan,

Bizi "İP"-dən, həm İsadan soyudan,

Heç bir şey yox, adi el qınağıdı.

Araz Əlizadə:

Əli dəstək deyib, bosslara mələr,

Hay-harayı, mələrtisi daş dələr,

İsanı da döyməkdədi kütlələr,

Yaralanan həm sol, sağ yanağıdı.

Arzu Səmədbəyli:

Yetkililər "İP"-i ediblər bazar,

Liderlərin qarnını alıb azar,

Yüksək həddə qrant verən boss ki var,

Sosdemlərin sevimli qonağıdı.

Araz Əlizadə:

Xaric artıq doldurmayır hər kasa,

İndi qaçır altlarından həm masa,

Əli, İsa düçar olub iflasa,

"İP", "ACP" bunun son sınağıdı.

Arzu Səmədbəyli:

Heç kəsin yox, indi mənim turumdu,

Sədr olardım, əsəblərim tarımdı,

"Palata"mız nümunəvi qurumdu,

Əli, İsa liderlər qaynağıdı.

Araz Əlizadə:

Meydanlarda yürüşləri yaz anıb,

Bu cür liderləri ancaq qaz anıb,

İsa, Əli uğursuzluq qazanıb,

İflas etmiş "palata" oylağıdı.

Arzu Səmədbəyli:

Bişmiş əti sınıq dişi aşırmır,

Sosdemlər də bişi-düşü aşırmır,

Maliyyəçi artıq işi aşırmır,

Zədələnən Arazın oynağıdı.

MİRZƏ QƏRƏNFİL