Müxalifətdə süstlük müşahidə edilir

Yusif Bağırzadə:

Meydan axtarırıq, AMİP dar bizə,

Nə "DUİ", başqası qarışar bizə,

Nə "İP" tək bir qurum yaraşar bizə,

Nə İsa-Əli tək radikal olmaz.

Nurəddin Məmmədli:

Boss desə də yerdən durmuş "leş"imiz,

Çoxlu qrant kəsir balta dişimiz,

Yəqin xoşa gəlmir zəif işimiz,

Qərbin çevirdiyi daldan dal olmaz.

Yusif Bağırzadə:

"İP"-in hər üzvünün yosun əlində,

Az qalır qərblinin qussun əlində,

Hətta canınız da bossun əlində,

Sizdə nə səviyyə, nə kamal olmaz.

Nurəddin Məmmədli:

Bir işə yaramır o şikəst qollar,

Londonda önündə bağlanıb yollar,

Nə Etibar bəyin cibində dollar,

Nə də ki,AMİP-də dövlət-mal olmaz.

Yusif Bağırzadə:

Londonda Etibar əlində on sex,

Onun əli altda işlər polyak, çex,

Baxıb Aqramunta, Debono Qrex,

Dedi bu Leylada xoş amal olmaz.

Nurəddin Məmmədli:

Saçı ağarıbdı, əyilibdi qədd,

Heç vaxt iştahına qoymamışdı hədd,

İsa Əli ilə danışıbdı bəd,

Onun yuxusu çin, ağzı fal olmaz.

Yusif Bağırzadə:

Bossun yalı donub bumbuz kasanda,

Yoxdu oturan da kürsü, masanda,

Nə sənin Əlində, nə də İsanda,

Etibarınkı tək xoş camal olmaz.

Nurəddin Məmmədli:

Nahaqdan ucaltma hasar-barını,

Dəyiş bizimkinə öz kaftarını,

Çox da tərifləmə Etibarını,

Hər saçı ağaran ağsaqqal olmaz.

Yusif Bağırzadə:

Qərbə, fərəhlənib sən az qanad aç,

Arabir üzvlərə göndər busə, maç,

Gözünlə görərsən, düşər qaçaqaç,

Görərsən ki, "İP"-də bir çaqqal olmaz.

Nurəddin Məmmədli:

Bədxahlar bədxahdı, başlarına kül,

Sərsəm kübar olmaz, geydirsən də tül,

Həllini vaxtında tapar hər müşkül,

Etibar timsallı bir baqqal olmaz.

Yusif Bağırzadə:

Soyudu əliniz də vurhavurda,

Sizlər uduzdunuz o tur-bu turda,

Mümkündü AMİP-də hər cür qüsur da,

Ancaq "İP"-dəki tək bir naqqal olmaz.

Nurəddin Məmmədli:

Bu kolun özü də deyildir o kol,

Liderlər oynardı verilsəydi rol,

Əgər müdrikləşib Qərb qoyarsa qol,

Arzu-ümidlər də heç pamal olmaz.

Yusif Bağırzadə:

Əfqan ellərində yar-yarağı var,

Onun Kosovosu, həm İraqı var,

Qərb Qərbdi, onun da öz marağı var,

Dönüb nə Şərq olar, nə Şimal olmaz.

Nurəddin Məmmədli:

Toya döndərmədi AMİP bir yası,

"İP"-də udmamışdı kimsə bir tası,

Zərindən tanınar hər nərd ustası,

Hər şahmat oynayan dönüb Tal olmaz.

Yusif Bağırzadə:

Cibində qalmayıb birinin pulu,

Liderlərini də döyübdü dolu,

Kələ-kötürdüsə "İP"-inin yolu,

Qayıdıb təzədən o, şümal olmaz.

Nurəddin Məmmədli:

Əgər olmasaydı əsəbləri dar,

Açardıq onunla mağazalar, bar,

Keçsə sıramıza "İP"-də Etibar,

Nitqi səlistləşər, dili lal olmaz.

Yusif Bağırzadə:

Bəzən isti keçir hava, gah sərin,

Batıb qucağında "İP" ləpələrin,

"İP"-in qarşısında uçurum dərin,

Sizin liderlərdə xoş əhval olmaz.

Nurəddin Məmmədli:

AMİP-dən kənara az tulla bizi,

Cəlb eylə münasib üsulla bizi,

Təmin eyləsəydi boss pulla bizi,

Arada bir dənə nəhs sual olmaz.

Yusif Bağırzadə:

Həmişə məhsuldar Qərbin zəmisi,

Bizi alqışlayır bossun cəmisi,

Möhkəm, həm möhtəşəm AMİP gəmisi,

Bizi batırmağa qadir sal olmaz.

Nurəddin Məmmədli:

İşləsək, Qərb özü bizi dindirər,

Sağlığa içilən dost sevindirər,

Gec, ya tez bizləri boss sevindirər,

Bizimçün bundan da xoş misal olmaz.

Yusif Bağırzadə:

Problem cəlb edir, sözsüz, hər kəsi,

AMİP liderinin şuxdu nəfəsi,

Etibar istəsə gur çıxsın səsi,

Çiy yumurta içsə, səsi kal olmaz.

Nurəddin Məmmədli:

Bosslar da çox tutub bizi bal-yağa,

Söykəndik Qərb kimi güclü dayağa,

Qaldıra bilsələr "İP"-i ayağa,

Liderlər qəlbində qara xal olmaz.

Mirzə QƏRƏNFİL