"ACP", yoxsa "Qarabağ"?

Rəsul Quliyev:

Durmasın önündə nə "DUİ", nə "QAT",

Verərdi "Qarabağ" bloku da çat,

Ona həmlə edir böyük "hərəkat",

"Palata" odlara qalansın gərək.

Sərdar Cəlaloğlu:

Sınanda ağrılı sizlər sınasız,

Sülhəddin naxırda qalar danasız,

Rəsul "hərəkat"ı "İP"-dən mənasız,

"ACP" qanına bulansın gərək.

Rəsul Quliyev:

"İP" tükənib, qalıb artıq bazasız,

Mənim "hərəkat"ım gəlir qəzasız,

Əli yol üstündə qalsın vizasız,

İsanın büdcəsi talansın gərək.

Sərdar Cəlaloğlu:

Mən öz blokumdan görərəm xeyri,

Çökər "hərəkat"ın hər iki böyrü,

Baxıb Sülhəddinə "ACP" əyri,

Görüb "Qarabağ"ı odlansın gərək.

Rəsul Quliyev:

"ACP" doyunca yeyib gəyirə,

Keçə yavaş-yavaş ceyran-cüyürə,

Əli ilə İsa böyür-böyürə,

Durub, pişik kimi yaaşsın gərək.

Sərdar Cəlaloğlu:

Hədəfimiz rəvan, aydın, duru yol,

Nəsibi qoy olsun ağır quru yol,

Rəsulun özü də gəlib yarı yol,

Bədnam blokuna culansın gərək.

Rəsul Quliyev:

Qoxusun anaşa, tütün qurumlar,

Girsin "ACP"-yə üstün qurumlar,

İçi "İP" qarışıq bütün qurumlar,

Fırlanıb başıma dolansın gərək.

Sərdar Cəlaloğlu:

Tapılsalar belə uzaq Heratda,

Gəlsin "Qarabağ"a Dürat, Qıratda,

Əzmkar, nüfuzlu elektorat da,

Mənim blokumda sınansın gərək.

Rəsul Quliyev:

Heç vaxt əyilməsin şux qəddin, Əkbər,

Gərək bir az billə öz həddin Əkbər,

Hamısı da deyib Sülhəddin Əkbər,

Mənim "ACP"-mə inansın gərək.

Sərdar Cəlaloğlu:

Meyili bloka həm qəti olsun,

Kütlənin çox iti sürəti olsun,

Dilində "Qarabağ" şöhrəti olsun,

Rəsul, Sülhəddini həm dansın gərək.

Rəsul Quliyev:

Hər üzvü sevərəm əsil göz-qaş tək,

Peşkəş də verərəm müftə, daş-baş tək,

Başlardan tökərəm pulu şabaş tək,

"ACP" deyərək, o, yansın gərək.

Sərdar Cəlaloğlu:

Küçələr, meydanlar bəhrəsiz şumdu,

"Hərəkat"ın önü sərt uçurumdu,

Rəsul "ACP"-si zəif qurumdu,

Mənim blokuma calansın gərək.

Rəsul Quliyev:

Nəşəm viskidəndi, təmiz meydəndi,

Nemət sovetlərdən, pulum göydəndi,

Bilsinlər Rəsulam, yolum göydəndi,

Maddi durumumu həm qansın gərək.

Sərdar Cəlaloğlu:

Başda bircə yumruq, dalda diz azdı,

Partiyalar çoxdu, stul, miz azdı,

Daxili potensial qüvvəmiz azdı,

Gücü dərk olunsun boss Hansın gərək.

Rəsul Quliyev:

Bərəlsin "ACP" üzvünün gözü,

Pul qapazlayanda qızarsın üzü,

Mənim qurumuma girməkçün, düzü,

Olsun mərhəmətin və şansın gərək.

Sərdar Cəlaloğlu:

Həm İsanın altdan, Əlinin altdan,

Hər çıxan gəlməsin dəlinin altdan,

"Qarabağ"a gələn, əlinin altdan

Keçsin qadir bosslar- Sem, Consun gərək.

Rəsul Quliyev:

Kimin dəryalarda batsa gəmisi,

Əliyə, İsaya qənim kimisi,

Heç də incimərəm, mənim kimisi,

Gəlib ciblərimə tez qonsun gərək.

Sərdar Cəlaloğlu:

Zəncirdən üzvlərin onu açılsın,

Talesiz, bəxtsizin sonu açılsın,

Mənim qurumumda donu açılsın,

Rəsulun yanında o, donsun gərək.

Rəsul Quliyev:

Çevrilmək istəsə kimsə qənimə,

Əlbəttə, tuş gələr nifrət, kinimə,

Mənim xatirimə, mənim şənimə,

Əlilə heykəlcik tez yonsun gərək.

Sərdar Cəlaloğlu:

Rəsulu puludu Rəsul eyləyən,

Həm də qurumunu məqbul eyləyən,

Məni "Qarabağ"da qəbul eyləyən,

İsanı, Rəsulu tez dansın gərək.

Rəsul Quliyev:

Maraq göstərənlər minər atıma,

Həyatı bənzəyər xoş həyatıma,

Kim ki, yaxınlaşır "hərəkat"ıma,

Özünü əjdaha, div sansın gərək.

Sərdar Cəlaloğlu:

Yerlərə enməyən çarter atı var,

Küskün taleyi tək pis həyatı var,

Rəsulun natəmiz, çirkli adı var,

Bir təmiz adımı o, ansın gərək.

MİRZƏ QƏRƏNFİL