İri birliklərdə dirilik nəzərə çarpmır

İqbal Ağazadə:

Ətalətdən Sərdar laxta qan qusur,

"Hərəkat"da belə çoxalıb qüsur,

"Palata" susmaqda, "Qarabağ" susur,

Sükutdan lal olan qulaqlar artıb.

Əhməd Oruc:

Şişib, əndazədən çıxıb kirişlər,

Bağlı "palata"da çıxış-girişlər,

Digər bloklarda əksilib işlər,

Bizim yan-yörədə qalaqlar artıb.

İqbal Ağazadə:

Açılıb-tökülüb "palata" dərzi,

Yoxdu "hərəkat"da sənətkar dərzi,

Xeyli dayazlaşıb təfəkkür tərzi,

Sıralarda yabı, ulaqlar artıb.

Əhməd Oruc:

Meydan bazarında artmaqda nırxlar,

Bütün bloklarda boşalıb çarxlar,

Çoxalıbdı çayı bulanıq arxlar,

Gözləri tutulan bulaqlar artıb.

İqbal Ağazadə:

Rəsulu gətirən sallar azalıb,

Meydanda qurulan vallar azalıb,

Xaricdən gur gələn yallar azalıb,

Hər addımbaşısa yalaqlar artıb.

Əhməd Oruc:

Lüzumsuz qurumlar gəlir ərsəyə,

Qərb lider adını verir hər səyə,

Cavanlar can atır yüksək kürsəyə,

Liderə verilən talaqlar artıb.

İqbal Ağazadə:

Əvəzin yanında qalıbdı madam,

Günbəgün artmaqda mənim şər-xatam,

Bizim "Qarabağ"da yoxdu bir adam,

"İP"-də, "hərəkat"da alaqlar artıb.

Əhməd Oruc:

İndi təmizlənib bizlərdən bulvar,

Hər lider xaricdə almaqda talvar,

Ərliyi çatmayan bəy geyir şalvar,

Forsdanmı, nədənsə balaqlar artıb.

İqbal Ağazadə:

Bir çox blokların sönüb çırağı,

İsaya azalıb Qərbin marağı,

"İP"-də yellənməkdə təslim bayrağı,

Aşağı sallanmış flaqlar artıb.

Əhməd Oruc:

Qərb oturdub məni lider postuna,

Çevirir özünün sadiq dostuna,

Ağıllı bir natiq çıxmaz rastına,

Falçı cadugərlər və maqlar artıb.

İqbal Ağazadə:

Xataya tuş gəlir xata iş görən,

Casus kimi gedər bada iş görən,

Uduzar pul alıb yada iş görən,

Bizi döyəcləyən şallaqlar artıb.

Əhməd Oruc:

Pis lider görəndə gəyir üzünə,

Daim tərəzini əyir özünə,

Çoxu siyasətçi deyir özünə,

"İP"-də, "hərəkat"da sallaqlar artıb.

İqbal Ağazadə:

İndi bloklarda alaq qalıbdı,

Liderlər əlində balaq qalıbdı,

Bir çoxu daxildə ulaq qalıbdı,

Zahirdə zebr tək zolaqlar artıb.

Əhməd Oruc:

Nitqi məntiqsizlər çaşıb qatıqlar,

Lider kürsüsündə ordu batıqlar,

Birlik, bloklarda ayran-qatıqlar...

Kərə azalıbdı, pis yağlar artıb.

İqbal Ağazadə:

Qərbdən gələn qrant ciblərə girmir,

İftira düzlüyün yerini vermir,

Dil deyən yalanı ürək sinirmir,

Qarınlarda şişkin dalaqlar artıq.

Əhməd Oruc:

Qalıb boş "palata" ürəyə həsrət,

Bir blok da bəndə-bərəyə həsrət,

Bəzi yetkililər çörəyə həsrət,

Bir-iki liderçün xoş çağlar artıb.

İqbal Ağazadə:

Heç yaxşı qavramır başlar dərini,

Qoca gəncə vermir kürsü yerini,

Liderlər didməkdə biri-birini,

Bərəlmiş gözlərdə həm ağlar artıb.

Əhməd Oruc:

İqbal "Ümid"ində yaman səyləyir,

Tənəzzül sürəti xeyli əyləyir,

"Solçuluq" get-gedə fəğan eyləyir,

Yalandan deyirlər ki, "sağlar" artıb.

İqbal Ağazadə:

Yalan danışmaqda mahirdi Əhməd,

İndi hər liderə düşür min töhmət,

Mərdliklə ölən hər ölüyə rəhmət,

Qərbə boyun əyən həm sağlar artıb.

Əhməd Oruc:

"Palata" meydanda qoyur baletlər,

Azalıb xaricə indi gəl-getlər,

Son vaxtlar alınmır mitinq, piketlər,

Lider qəlblərində həm dağlar artıb.

İqbal Ağazadə:

Çox zülmətli gecə səhər gətirmir,

Hər Qərbə yalmanan kəhər gətirmir,

İndi heç bir blok bəhər gətirmir,

Məhsulu azalan sıx tağlar artıb.

Əhməd Oruc:

Qərbi qane etmir lüzumsuz fəndlər,

"İP"-ə bağlanıbdı bərələr-bəndlər,

Liderlər önünə atılır sentlər,

Hər qərargahda boş çanaqlar artıb.

MİRZƏ QƏRƏNFİL