“Şuşa Bəyannaməsi” Azərbaycanın siyasi, diplomatik və iqtisadi uğurudur ŞƏRH

Azərbaycan tarixində əlamətdar gün kimi qalacaq əlamətdar tarixi hadisələrdən biri də 15 iyun 2021-ci il tarixdə mədəniyyət beşiyimiz sayılan Şuşa şəhərində iki qardaş dövlət arasında imzalanan “Şuşa Bəyannaməsi”dir. Bu tarixi hadisə nəinki Azərbaycan və Türkiyənin, həmçinin, bütün Türk dünyasının həmrəylik təməli və təntənəsi deməkdir. Milli dövlətçilik tariximizdə mühüm əhəmiyyət kəsb edən, Azərbaycan Respublikası ilə Türkiyə Respublikası arasında müttəfiqlik münasibətləri haqqında Bəyannamənin imzalanması iki qardaş ölkənin birliyinin və sarsılmazlığının əsas göstəricisidir. Tarix təkrarlandı və yenə Azərbaycan Türkiyə birliyi və qardaşlığı yeni bir dönəmə keçid etdi. Bugünkü reallıq ondan ibarətdir ki, Azərbaycan və Türkiyə arasında əlaqələrin yüksək səviyyəsi ümumilikdə regionun tərəqqisinə, bölgədə sülhün və sabitliyin bərqərar olmasına mühüm töhfələr verir. Qeyd etmək lazımdı ki, 44 günlük şanlı Vətən Müharibəsi zamanı qardaş Türkiyənin dövlətimizə verdiyi siyasi-mənəvi dəstəyin hər birimiz şahidi olduq. 13 iyun tarixində Türkiyə Respublikasının Prezidenti Rəcəb Tayyib Ərdoğanın Azərbaycana səfəri ilə əlaqədar Prezident İlham Əliyev Türkiyə Prezidenti Rəcəb Tayyib Ərdoğanla mətbuata birgə bəyanatı zamanı bildirib ki, əldə edilmiş bütün uğurların təməlində Türkiyə və Azərbaycan arasında olan qardaşlıq əlaqələri dayanır. Prezident cənab İlham Əliyev bildirdi ki, “Şuşa Bəyannaməsi tarixi anlaşmadır. Bu Anlaşma nəticəsində Türkiyə və Azərbaycan rəsmən müttəfiq oldu”.Eyni zamanda Prezident cənab İlham Əliyev xüsusi vurğulayıb ki, imzalanmış Bəyannamədə Azərbaycan Respublikası Türkiyə Respublikasının suverenliyinə, ərazi bütövlüyünə, sərhədlərinin toxunulmazlığına, sabitliyinə və təhlükəsizliyinə qarşı yönəlmiş bütün fəaliyyətləri, o cümlədən terrorçuluğun bütün forma və təzahürlərini pisləyir və Türkiyə Respublikasının terrorçuluğa qarşı apardığı mübarizəni qətiyyətlə dəstəkləyir.Tərəflər müxtəlif ölkələrdə yaşayan Azərbaycan və türk diasporları arasında əməkdaşlığın daha sıx inkişaf etdirilməsi, onların məruz qaldıqları ümumi problemlər qarşısında birlikdə addımlar atılması və ardıcıl həmrəylik göstərilməsi məqsədilə səylərini birləşdirəcəklər. Tarixi Şuşa Bəyannaməsinin əhəmiyyəti ondan ibarətdir ki, bu gün Azərbaycan və Türkiyə arasında olan müttəfiqlik və dosluq əlaqələri ən yüksək səviyyəyə qalxmış oldu və bütün dünya iki qardaş ölkənin birliyinin sarsılmaz olduğunun şahidi oldu.

Qeyd etmək lazımdır ki, Türkiyə-Azərbaycan münasibətləri daha artıq dəyərlərə sahibdir. Azərbaycan Türkiyə dostluğu və qardaşlığı bundan sonra da əbədi olaraq yaşayacaq və yeni-yeni birgə uğurlara, zəfərlərə imza atacaqdır.

Mansur Quliyev

YAP Ağdam rayon təşkilatının sədri