Laçın sərhəd-buraxılış məntəqəsi Azərbaycanın suverenliyini və təhlükəsizliyini qoruyur ŞƏRH

Laçın dövlət sərhədindən buraxılış məntəqəsinin yaradılması ölkəmizin suveren hüquqları çərçivəsində atılmış legitim addımdır. Laçın ölkəmizin ərazisində olduğundan burada həyata keçiriləcək tədbirlər, o cümlədən sərhəd-buraxılış məntəqəsinin yaradılması da müstəsna olaraq ölkəmizin daxili işidir. Ermənistanın və onun havadarlarının bu məsələ ilə bağlı apardığı çirkin kampaniyanın məqsədi bölgədə vəziyyəti gərginləşdirməkdir.
Sərhədimizin toxunulmazlığının təmin olunması məsələsi ölkəmizin milli təhlükəsizliyi ilə yanaşı, qanunun aliliyinin də tələbidir. Dövlət təhlükəsizliyinin pozulmasına yönəlik təhdidlərə qarşı suveren ərazimizdə sərhəd-buraxılış məntəqəsinin yaradılması beynəlxalq hüququn norma və prinsiplərinə uyğun olaraq tam qanuni addımdır. “Laçın” dövlət sərhədindən buraxılış məntəqəsinin yaradılması yaxın gələcəkdə Qarabağda qanunsuz yerləşdirilmiş erməni silahlı birləşmələrinin çıxarılması, həmçinin separatçıların tərk-silah olunması baxımından böyük önəm daşıyır. Bu məntəqə Azərbaycanın suverenliyini və təhlükəsizliyini təmin edir.

Sərhəd-buraxılış məntəqəsi Qarabağ separatçılarına silah, sursat, mina və xarici terrorçuların daşınmasının qarşısını alır. Eləcə də, bu post sayəsində ərazidən təbii sərvətlərimizin qanunsuz çıxarılmasının qarşısı alınır. Laçın dövlət sərhədindən buraxılış məntəqəsinin beynəlxalq legitimliyi öz təsdiqliyini tapır. Belə ki, Beynəlxalq Ədalət Məhkəməsinin 2023-cü il 6 iyul tarixli yekdil qərarı Ermənistanın nəzarət-buraxılış məntəqəsinin aradan qaldırılması ilə bağlı müvəqqəti tədbir görmək tələbini rədd edərək, Ermənistanın iddialarını qəti şəkildə təkzib edib. Azərbaycan humanitar məqsədlər üçün Ağdam-Xankəndi yolunu təklif edir. Ermənistan, həqiqətən də, bölgənin sadə sakinlərini düşünsəydi, heç vaxt Ağdam-Xankəndi yolundan Qarabağ bölgəsinə yüklərin çatdırılmasına etiraz etməzdi. Bu fakt onu göstərir ki, “humanitar” bəhanələrlə edilən manipulyasiyalar vasitəsilə Ermənistan hərbi təxribatlar üçün süni səbəblər yaradır. Hadisələrin gedişatı və erməni siyasətinin xisləti onu aşkar edir ki, Xankəndidə vəziyyətin pisləşməsi rəsmi İrəvanın və Fransa kimi ölkələrin marağındadır.

Amma kimin nə deməsindən asılı olmayaraq, Azərbaycan öz prinsipial mövqeyində haqlıdır və heç bir qüvvə dövlətimizin iradəsinə təsir edə bilməz. Prezident İlham Əliyevin hər dəfə Laçında olarkən dünyaya və ermənilərə xəbərdarlığı və ötürdüyü mesajlar da diqqətçəkəndir.

Laçında səsləndirilən mesajlarda Prezident İlham Əliyev xarici və beynəlxalq təxribatlar qarşısında dönməz mövqeyini ifadə etdi. Odur ki, hazırda bir sıra ölkələr, xüsusilə Fransanın təsiri ilə Laçın yoluna dair nə qədər anti-Azərbaycan mövqeli fikirlər səsləndirsələr və bəyanatlar qəbul etsələr də, Azərbaycan tamamilə beynəlxalq hüquqa uyğun olaraq öz sərhədinin təhlükəsizliyini təmin edir və bu mövqeyindən dönməyəcək. Təsadüfi deyil ki, Fransa bir sıra dövlətlərin ölkəmizdəki nümayəndələrini Laçın Şəhəri Günü münasibətilə keçirilən tədbirə qatılmamağa səsləsə də, bu mənfur çağırışlar cavabsız qaldı. Bundan sonra da Zəfər ildönümlərimiz daim ən yüksək ovqatda qeyd ediləcək.

Könül İbrahimova

YAP Yasamal rayon Elm və Təhsil Nazirliyinin

Fiziologiya İnstitutu üzrə Ərazi partiya təşkilatının sədri