Ermənistan Rusiya əleyhinə sanksiyalara qoşularsa... - ŞƏRH

Erməni nəşri: "Qərb Ermənistana məsləhət verməkdən çəkinmir, onlardan biri də anti-Rusiya sanksiyalarına qoşulmaqdır"

Ermənistanda dərc olunan "Gündəm-fakt" nəşri ölkənin Rusiya əleyhinə tətbiq olunacaq növbəti sanksiyalara qoşulacağı halda hansı problemlərlə üzləşə biləcəyi ehtimalları barədə yazıb.

“BVF-nin məlumatına görə, Ukraynada başlayan hərbi əməliyyatlar fonunda Qərbin Rusiyaya tətbiq etdiyi sanksiyalara və iqtisadi qarşıdurmaya baxmayaraq, Moskva çox da zərərə düşməyib. Avropa iqtisadiyyatı tətbiq etdiyi sanksiyalardan gözləniləndən daha çox zərər çəkib", - yazan erməni nəşri paralel olaraq Yaponiyanın əsas analitik mərkəzlərindən birinin qeydlərinə də toxunub: "Analitik mərkəz proqnoz verib ki, sanksiyalara baxmayaraq, Rusiya enerji daşıyıcılarının ixracından əvvəlkindən daha çox gəlir əldə edir. Əvvəllər Qərb bazarına enerji ixracının üçdəikisi indi Asiya və Yaxın Şərqə gedir".

"Bloomberg-in məlumatına görə, Avrozona iqtisadiyyatının yaxın 12 ayda tarixi tənəzzülə uğraması ehtimalı indi 50%-ə yaxınlaşır (45%-dən yuxarı). Ukrayna böhranından əvvəl bu ehtimal 20%, yay sorğusu zamanı isə 30% idi. Avropa Rusiyadan idxal olunan ucuz yanacaqdan və Belarusdan gətirilən kaliumdan imtina etdikdən sonra Avropada gübrə istehsalı, sadəcə, dayanıb", - deyə erməni nəşri əlavə edib.

"Gündəm-fakt" əlavə edib: "Ümumilikdə 50-dən çox istehsalat Avropanın qəbul etdiyi sanksiya siyasətinin qurbanı olub və bu da, öz növbəsində, artıq 2024-cü ildə avropalıların məhsul yetişdirməsində problem yaşayacaqları deməkdir. Avropada yaranmış bu vəziyyət, hətta sənayesizləşdirilməni sürətləndirəcək. Maraqlıdır ki, bütün bunlardan sonra öz səhvlərindən əziyyət çəkən Qərb Ermənistana məsləhət verməkdən çəkinmir, onlardan biri də anti-Rusiya sanksiyalarına qoşulmaqdır. Aydındır ki, Qərb bu işdə öz maraqlarını güdür və Ermənistanın iqtisadi çöküşlə üzləşə biləcəyi Qərb tərəfdaşları üçün o qədər də maraqlı deyil".

Bu arada xatırladaq ki, bir neçə gün bundan əvvəl Ermənistanın 2024-cü ildə Rusiyadan güzəştli qiymətlərlə qaz almağa davam edəcəyi bildirilmişdi.

Nəşr yazır: "Hazırda Ermənistan üçün sərhəddə Rusiya qazının qiyməti 1000 kubmetr üçün 165 dollar təşkil edir. Müqayisə üçün qeyd edək ki, məsələn, Azərbaycan öz müttəfiqi Türkiyəyə qazı təqribən 250 dollara satır, İran Türkiyəyə qazı 400 dollara satır və Ermənistan hakimiyyəti Rusiya qazını Azərbaycan və ya İran qazı ilə əvəz etməyə ümid edirsə, üç dəfə və ya daha çox ödəməyə hazır olmalıdır.

Əgər Ermənistan güzəştli şərtlərlə Rusiyadan qaz almağı dayandırsa, bu, birbaşa bütün sektorlara: nəqliyyat vasitələrinə, kənd təsərrüfatına, istehsala, elektrik enerjisinin qiymətlərinə təsir edəcək, çünki Ermənistanda elektrik enerjisinin 30-35 faizi Rusiyadan gələn qazla işləyən istilik stansiyalarında istehsal olunur. Başqa sözlə, qiymət artımı Ermənistanın bütün iqtisadiyyatına fəlakətli şəkildə yayılacaq ki, bu da bütün məhsulların qiymətinin artmasına səbəb olacaq. İqtisadçılar Aİİ-dən çıxacağı təqdirdə Ermənistanın yalnız qaz təchizatına ildə 360 milyon dollar xərcləyəcəyi və bunun ölkəmiz üçün böyük yük olacağı qənaətindədir. Ona görə də indiki halda Qərbin səhvlərindən dərs çıxarmalı, ayıq-sayıq olmalı və enerji sistemimizin təhlükəsizlik mövqelərini gücləndirməliyik ki, ölkəmiz artıq problemlərlə üzləşməsin”.

Afət Tahirqızı