Prezident İlham Əliyevin fəaliyyəti müasir şəraitdə rasional idarəçilik nümunəsidir ŞƏRH

Azərbaycan xalqı öz səsini 2003-cü ilin 15 oktyabr tarixində keçirilmiş seçkilərdə İlham Əliyevə vermişdir. Beləliklə, Heydər Əliyevin siyasi kursunun layiqli davamçısı İlham Əliyev xalqımızın etimadını qazanaraq Azərbaycan Respublikasının Prezidenti seçildi və bununla da ölkəmizin inkişafında yeni bir mərhələ başlandı. Azərbaycan xalqı İlham Əliyevi Prezident seçməklə Heydər Əliyevin siyasi kursuna sadiqliyini, sevgisini və inamını bir daha sübut etdi.

İlham Əliyev Prezidentliyinin ilk günündən etibarən dayanıqlı inkişaf üçün əsaslı addımlar atdı. Müstəqilliyimizin və ideoloji dayaqlarımızın daha da möhkəmləndirməsinin, vətəndaş həmrəyliyinin bərqərar olmasının təməlində Azərbaycan dövlətinin milli maraqlarının qorunması dayanır. İlham Əliyev ölkə iqtisadiyyatını gücləndirmək üçün siyasi xətti davam etdirdi. Çünki Ümummilli Liderin “İqtisadiyyatı güclü olan dövlət hər şeyə qadirdir” tezisini daim rəhbər tuturdu. İqtisadiyyatın şaxələndirilməsi siyasətinin uğurla həyata keçirilməsi üçün regionların malik olduğu potensialdan səmərəli istifadə qarşıya prioritet məsələ kimi qoyuldu. Nəhəng infrastruktur layihələri həyata keçirildi. Dövlət başçısı daim bu fikri bildirir ki, neftlə zəngin ölkələr çoxdur. Lakin onlarda heç də bu resurslar inkişafa, tərəqqiyə xidmət etmir. Bu ölkələrdə əhali arasında təbəqələşmə sürətli hal alır. Ölkəmizdə isə, iqtisadi strategiyanın dünya təcrübəsinə əsasən işlənib hazırlanması Azərbaycanda bu problemin yaşanmamasını şərtləndirdi. Neft gəlirlərinin idarə olunmasında şəffaflığın qorunması mühüm sosial-iqtisadi layihələrin icrasını sürətləndirdi.

Azərbaycanda həyata keçirilən sosial siyasət nümunəvi xarakter daşıyır. Dövlət başçısı İlham Əliyev çıxışlarında daim bu çağırışı da edir ki, ən ucqar kəndlər də iqtisadi inkişafı öz həyat tərzində hiss etməlidir. Yalnız bütün əhalimiz özünün daha yaxşı yaşadığını hiss etdiyi bir vaxtda hökumətimiz vəzifəsini yerinə yetirmiş hesab edə bilər. Budur, bizim məqsədimiz - vətəndaşlara eyni şərait yaratmaq. Regionların, həmçinin Bakı və Bakıətrafı qəsəbələrin sosial-iqtisadi inkişafına dair Dövlət proqramlarının uğurlu icrası dövlət başçısı İlham Əliyevin rayonlara səfərləri çərçivəsində açılışı və təməlqoyma mərasimləri keçirilən sosial obyektlərin say tərkibindən də daha aydın görünür. Ölkə Prezidenti bildirir: “Regionların inkişafı daim diqqət mərkəzində olmuşdur... Mən hər il bölgələrə səfərlər edirəm. Bu, əlbəttə ki, həm mənim üçün çox əhəmiyyətlidir, çünki mən yerlərdə vəziyyətlə tanış oluram və müvafiq göstərişlər verirəm. Bilirəm ki, bu, bölgələrdə yaşayan vətəndaşlar üçün də çox önəmlidir. Əlbəttə ki, bu, nizam-intizamın möhkəmləndirilməsi üçün də çox önəmlidir”

Bu gün böyük əminliklə və qürurla qeyd edirik ki, nəinki işğaldan azad edilmiş ərazilərimizin, bütün bölgələrimizin həyatında yeni mərhələ başlayıb. Dövlət başçısı İlham Əliyev mütəmadi olaraq bölgələrə səfərlər edir. Hər bir səfər yeni sosial obyektlərin açılışı və təməlqoyma mərasiminin keçirilməsi ilə tarixə yazılır ki, bu da öz növbəsində həmin bölgənin sosial-iqtisadi inkişafının daha da yaxşılaşdırılması, əhalinin rifah halının yüksəlməsi deməkdir.

Ümummilli Lider Heydər Əliyevin hər kəlamı, hər nəsihəti, hər sözü bir işıq kimi öz davamçısına yol göstərdi sanki. Azərbaycanda ordu quruculuğunun, iqtisadiyyatın, daxili və xarici siyasətin inkişafı nizamlanmış xətt üzrə davam etdirirlirdi. Davamlı inkişafın hər kəs şahidi oldu, bununla da xarici ölkələr Azərbaycana maraq göstərməyə başladılar. Azərbaycanda neft və qaz hasilatı əhəmiyyətli dərəcədə artdı. 2006-cı ildə Cənubi Qafqaz Boru Kəməri fəaliyyətə başladı. “Cənub Qaz Dəhlizi” layihəsinin təməli 2014-cü il sentyabrın 20-də qoyuldu. Bu layihə Azərbaycan qazının Avropaya nəql olunmasına şərait yaradır. Azərbaycan Avropanın enerji təhlükəsizliyinin qorunmasında mühüm rol oynadı. Bakı-Tiblisi-Qars dəmir yolunun açılışı Asiyanı Avropa ilə birləşdirməyə xidmət etmək üçün nəzərdə tutulub. Azərbaycan neftinin birbaşa dünya bazarına çıxaran Bakı-Tbilisi-Ceyhan neft kəməri kimi nəhəng layihələrin icrası böyük əhəmiyyətə malikdir.

Ali Baş Komandan İlham Əliyev Hərbi sahədə gördüyü işlərlə Azerbaycana yeni nefəs verdi. Peşəkar hərbçilərimiz dünya ölkələrinin təcrübəsini öyrənmək üçün müxtəlif təlimlərə qatılıb peşəkarlıqlarını daha da artırdılar. Bunun nəticəsini həm 2016-cı ildə “Aprel döyüşləri”ndə , həm də 2020-ci ildə 44 günlük II Qarabağ müharibəsində gördük. Cənab İlham Əliyev, Heydər Əliyevin elə bir arzusunu gerçəkləşdirdi ki, bu, tariximizin ən şanlı, zəfər dolu səhifəsi oldu. 30 ilə yaxın müddətdə aparılan siyasi mübarizələr , nəhayət, öz bəhrəsini verdi. Ali Baş Komandan Qarabağın düşmən tapdağından azad olunmasından ötrü əmr verdi. Müzəffər ordumuz hərəkətə keçdi. Prezident İlham Əliyev 44 gün ərzində beynəlxalq təzyiqləri layiqincə dəf etdi. Bir zamanlar Ümumilli Liderin güvəndiyi xalq bütün varlığı ilə cənab Ali Baş Komandan İlham Əliyevin ətrafında sıx birləşdi. Nəticədə Qarabağ azad olundu və cənab İlham Əliyevin “Qarabağ Azərbaycandır!” şüarı bütün dünyaya səs saldı.

Cari ilin 15 oktyabrında Müzəffər Ali Baş Komandan İlham Əliyevin hakimiyyətdə olmasının 20 ili tamam oldu. Azərbaycan xalqı bir gün belə seçimindən peşman olmadı. Tam əksinə hər zaman qürur duyduq. Cənab Prezidentimiz İlham Əliyev öz siyasəti və ordumuzun qüdrətilə yeni dövrün müasir Lider obrazını yaratdı. Ali Baş Komandan 30 illik həsrətə son qoyduğunu və ata vəsiyyətini yerinə yetirdiyi üçün xöşbəxtliyini böyük qürur hissi ilə qeyd edir. Ölkəmizin davamlı uğurları, Qarabağda görülən yenidenqurma abadlıq işləri göz önündədir. Əminliklə deyə bilərik ki, Azərbaycanı hələ gələcəkdə bundan da çiçəkli, möhtəşəm günlər gözləyir. Xalqınız hər zaman sizi dəstəkləyir yeni dövrün müasir Lideri Cənab Prezidentimiz İlham Əliyev!

ARZU ƏLİYEVA

YAP Pirallahı rayon təşkiatı Aparatının məsul əməkdaşı