Dumanın komitə sədri: Azərbaycan AŞPA ilə bağlı düzgün qərar qəbul edib – MÜSAHİBƏ

Leonid Kalaşnikov: İlham Əliyev Azərbaycana təzyiq göstərmək, manipulyasiya etmək, onu Qərb oyunlarına sürükləmək cəhdlərinin qarşısını alır

Rusiya Federasiyası Dövlət Dumasının MDB İşləri, Avrasiya İnteqrasiyası və Həmvətənlərlə Əlaqələr Komitəsinin sədri Leonid Kalaşnikov “Moskva-Baku” portalına müsahibəsində Azərbaycanın Avropa Şurası Parlament Assambleyasının (AŞPA) son sessiyası çərçivəsində strukturda bir sıra antiazərbaycan təxribatlarından sonra ilə bu təşkilatla qarşılıqlı fəaliyyəti dayandırmaq qərarını şərh edib. Müsahibəni oxucularımıza təqdim edirik.

- Leonid İvanoviç, bir neçə gün əvvəl Azərbaycan nümayəndə heyəti Avropa Şurası Parlament Assambleyasının sessiyasının ortasında strukturla qarşılıqlı fəaliyyəti dayandırmaq və sessiyanı tərk etmək qərarına gəldi. Bu addımın səbəbi, deyildiyi kimi, Azərbaycana təzyiq cəhdləri, AŞPA-nın Qarabağ məsələsinə qeyri-taraz münasibəti, Qarabağda antiterrror əməliyyatı ilə bağlı Bakının tənqid edilməsi idi. Səs çoxluğu ilə AŞPA Azərbaycan nümayəndə heyətinin statusunu ratifikasiya etməməyə qərar verdi, deyirlər ki, Azərbaycan guya strukturun tələblərini yerinə yetirmir...

- Bakının bu qədər ədalətli və sərt reaksiya verməsi diqqət və hörmətə layiqdir. Bu gün suveren ölkələr üçün belə cavabların vaxtıdır.

Bildiyiniz kimi, Rusiya da Qərbin, xüsusən də AŞPA-nın davamlı təzyiqlərinə məruz qalır. Nəhayət, bir neçə il əvvəl, son nəticədə bu struktura ödəniş etməməyə qərar verdik. Sonra da Avropa Şurası Parlament Assambleyası “ödə, qayıt” deyərək işə qarışmağa başladı. Demək olar ki, “biz sənə hər şeyi bağışlayacağıq” kimi təkliflər. Axı onun məmurları böyük maaş alırlar. Həqiqətən bağışlanacaq heç nə yoxdur. Nəhayət, etimadnamələrimiz təsdiqləndi və biz qayıtdıq.

Və mən inanıram ki, Azərbaycan istəsəydi, haqlı olaraq eyni şeyi edə bilərdi- sadəcə olaraq, ödənişləri dayandırın.

Qərb təkcə Rusiyaya münasibətdə deyil, həm də Azərbaycan, Türkiyə və “qeyri-demokratik” kimi qələmə verdikləri suveren ölkələrlə münasibətdə həmişə açıq şəkildə qeyri-bərabər nəfəs alıb. Onlar bizə qarşı bu münasibəti davamlı olaraq qeyri-dost qətnamələr qəbul etməklə nümayiş etdirirlər. Yadımdadır, biz Rusiya nümayəndə heyəti bir dəfə Qərb platformasında Azərbaycan əleyhinə qətnamənin qəbulunu yekdilliklə necə dayandırmışdıq. İlyas Maqomed-Salamoviç Umaxanov artıq hava limanına gəlmişdi, lakin biz onu geri gətirdik və bu, bir səs əlavə etməklə Azərbaycana qarşı yönəlmiş sənədin qəbulunu dayandırmağa imkan verdi.

Bu gün Qərb üçün, Amerika və onun Avropada tabeliyində olanlar üçün Cənubi Qafqazı qızışdırmaq vacibdir. Ona görə də bu cür təzyiq cəhdləri xüsusilə fəal şəkildə, o cümlədən parlamentlərin qarşılıqlı fəaliyyəti səviyyəsində edilir. Avropa ölkələri yuxarıdan gələn bu “direktivi” kifayət qədər intizamlı şəkildə həyata keçirirlər. Bu gün, o cümlədən AŞPA-da müxtəlif ölkələrin nümayəndələri var ki, yuxarıdan icazə verilsə, qaçır, komissiyaları narahat edir və nəticədə Parlament Assambleyası ədalətsiz qərarlar qəbul edir. Bu gün də əvvəlki kimi heç nə dəyişməyib, AŞPA həm də bir növ “çubuq”, suveren ölkələrə təzyiq aləti kimi çıxış edir.

Azərbaycan AŞPA ilə bağlı qərarından qətiyyən peşman olmamalıdır. Biz oradan ayrıldıq və vəziyyət daha da pisləşmədi. Niyə təzyiqə dözməliyik- bunun üçün heç bir səbəb yoxdur. Bunun qarşısını almaq üçün bu təzyiq və ədalətsizlikdən, ikili standartlardan danışmalıyıq. Bakı tərəfindən bu düzgün verilmiş qərardır.

Mən həmişə təəccüblənmişəm: AŞPA sessiyasının yarısı əksər hallarda hansısa ölkəni, çox vaxt Rusiyanı “ləkələmək”, “qarlamaq”la keçir. Biz Parlament Assambleyasından çıxanda fikirləşdim: “Onlar, indi nə edəcəklər”. Sonda tapdım: indi də başqalarını "yaxalayacaqlar". Beləliklə, Azərbaycan AŞPA ilə qarşılıqlı fəaliyyət taktikasında Rusiyanın oxşar təcrübəsindən öyrənə bilər.

- Bəs niyə AŞPA (eləcə də bir çox digər Qərb strukturları və ölkələri) Qarabağ ətrafında yaranmış vəziyyətdə, buranın beynəlxalq hüquq baxımından Azərbaycanın suveren ərazisi olmasına baxmayaraq, nədənsə inadla Ermənistanın tərəfini tutur.

- Onlar, dediyim kimi, Bakıya münasibətdə həmişə qeyri-bərabər nəfəs alıblar. Onlar Rusiya kimi Azərbaycanı da “maarifləndirilməli” dövlətlər sırasına daxil ediblər. Ermənistan isə burada ancaq alətdir, detonatordur. Sadəcə istifadə edirlər.

Bu gün təzyiq edənlərin heç biri nə Azərbaycanın, nə də Ermənistanın heç vaxt dostu olmayıb və olmayacaq. Onlar üçün prinsipcə dost deyə bir şey yoxdur. Tapşırıqları yerinə yetirirlər. Düşünürəm ki, indi Azərbaycana təzyiqləri artırmaq siqnalı yeni gəlib.

Prezident İlham Əliyev hər şeyi mükəmməl görür, bütün bunların niyə edildiyini görür. Bu yaxınlarda Azərbaycan dövlətinin başçısının Qərbdə ikili yanaşmadan, ikili əxlaqdan danışdığı müsahibəsinə baxdım. O, bütün bunları mükəmməl başa düşür və Azərbaycana təzyiq göstərmək, manipulyasiya etmək, onu Qərb oyunlarına sürükləmək cəhdlərinin qarşısını alır. Azərbaycan niyə ona qarşı bu cür təzyiq cəhdlərinə daha açıq cavab verməyə başladı? Çünki ədalətliolaraq Azərbaycanın statusu son vaxtlar artıb və o, təzyiqlərə təzyiq edənləri öz yerinə qoymağa hesablanmış addımlarla cavab verə bilir.

Mən dəfələrlə demişəm ki, əgər qonşular arasında, xüsusən də Azərbaycanla Ermənistan arasındakı vəziyyətdə hər hansı məsələ varsa, o zaman qonşular özləri razılığa gəlməlidirlər. ATƏT-in Minsk Qrupu 30 ildə heç nə qərar verməyib. O, prosesi yavaşlatdı. Rusiya, Azərbaycan və Ermənistan bu sahədə nəticə göstərən kimi Qərb dərhal əl yelləməyə başladı: “Biz, biz və biz!” Onlar bölgəyə qaçaraq gəldilər, orada nəsə etməyə çalışırdılar... Yenə də bu tarazlığı saxlamaq yox, region ölkələri arasında sabitliyin pozulmasına, qıcıqlanmasına səbəb olur.

Qərbdə deyirdilər: “Bizə gəlin, hər şeyi həll edəcəyik”. Bakı bundan imtina edib: “Niyə, qoyun özümüz razılaşarıq” deməyə başlayanda o, düşmən oldu. Və bu şəkildə cavab verməklə doğru olanı edir. İlham Əliyev müdrik siyasətçidir.

- Fevralın 7-də Azərbaycanda növbədənkənar prezident seçkiləri keçiriləcək. Dövlət Dumasından kimlər monitorinq üçün göndəriləcək?

- Dumanın nümayəndə heyətinə Dövlət Dumasının MDB işləri üzrə komitəsinin birinci müavini Kazbek Taisayev başçılıq edəcək. Duma Şurası keçirildi və nümayəndə heyətinə hər fraksiyadan bir nümayəndə təyin edildi. Əminəm ki, Azərbaycanda seçkilər şəffaf keçiriləcək və hər şey yaxşı olacaq.

Yeri gəlmişkən, AŞPA ilə bağlı sualınıza qayıdaq. Qərbin qeyri-demokratik hesab etdiyi ölkələrdə, əgər seçki keçirsələr, Qərb müşahidəçiləri seçki prosesinin nəticəsindən asılı olmayaraq, adətən, öz mənfi nəticələrini əvvəlcədən hazırlayırlar. Bir qayda olaraq, seçkilərin ertəsi səhər yekun elan edilir ki, orada seçkilər qeyri-demokratik kimi tanınmalıdır. Eyni şey Özbəkistan, Qazaxıstan və bir çox digər postsovet ölkələrində də olub. Azərbaycanda da. İndi də oxşar vəziyyətin olacağına və artıq “dəhşət hekayəsi”nin hazırlandığına şübhəm yoxdur.

Üstəlik, mən Qərb müşahidəçiləri ilə danışdım və soruşdum: “Mənə deyin, siz ki, bir dənə də olsun pozuntu tapmadınız. Yaxşı, qeyri-demokratik seçkilər haradadır?” Fakt yoxdur. Amma konkret heç nəyə cavab verə bilmirlər. Bu gün AŞPA ilə bağlı danışdıqlarımız seçki müşahidəsinə də aiddir. Və Azərbaycan Avropa Şurası Parlament Assambleyasının nümayəndələrini seçkilərə dəvət etməməklə düzgün addım atdı. Onların qarşısında hamımızın geri çəkilməsinə ehtiyac yoxdur. Onlar Rusiya və Azərbaycanla münasibətdə çoxdan özlərini belə mövqeləndiriblər. Və bütün bu hekayənin Azərbaycanın münaqişəni hərbi yolla həll etməsi ilə heç bir əlaqəsi yoxdur. Onlar sadəcə olaraq ölkələrin nəzarətçisi olmaq istəyirlər. Və bu cəhdlər nəticə vermədikdə, əsəbiləşirlər. Biz buna diqqət yetirməyi dayandırmalıyıq. Sonra özləri səndən bir yerə gəlməyini xahiş edəcəklər”.

Tərcümə - Elçin Bayramlı