Xaricdə təhsil alan və səsverməyə ilk dəfə gedəcək seçici: “Vətənimizin çiçəklənməsinə səs verəcəyəm”

“Əlamətdar haldır ki, bu il ilk dəfə olaraq Konstitusiyamızda təsbit olunmuş öz səsvermə hüququmdan istifadə edərək, 7 fevral növbədənkənar prezident seçkilərində iştirak edəcəyəm”. Bunu secki-2024.az saytına açıqlamasında hazırda Litva Respublikasının Kaunas Texnologiya Universitetində təhsil alan Səfiyyə Babazadə bildirib.Onun sözlərinə görə, ötən illər ərzində Azərbaycanda şahidi olduğu inkişaf və tərəqqi, sabitlik, sülh və əmin-amanlıq gənclər qarşısında yeni vəzifələr qoyur: “Bunlar arasında başlıca vəzifə Vətənimiz Azərbaycanın ictimai-siyasi və mədəni həyatında fəal iştirak etməkdir. Odur ki, qarşıdan gələn növbədənkənar prezident seçkilərində iştirak etməklə Azərbaycan Respublikasının həyatında qlobal dəyişikliklərə, Qarabağda geniş vüsət almış bərpa-quruculuq işlərinə, keçmiş məcburi köçkünlərin yenidən tikilmiş evlərinə qayıdışlarına, bir sözlə Azərbaycanın çiçəklənməsi və dinamik inkişaf edən ölkəyə çevrilməsinə səs verəcəyəm. Hamını bu mühüm prosesdə fəal iştirak etməyə dəvət edirəm”.