Azərbaycanın dün­yadan tələb etdiyi ədalətli yanaşmadır - ŞƏRH

2024-cü il fevralın 28-də Azərbaycan Prezidenti İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyəti ilə görüşüb. Bildiyimiz kimi, Almaniya Federativ Respublikasının aparıcı şirkətlərinin rəhbərlərindən ibarət nümayəndə heyətinə Almaniya–Azərbaycan Xarici Ticarət Palatasının icraçı direktoru Tobias Baumann, “Falk” konsaltinq” şirkətinin icraçı direktoru Tomas Falk, “Uniper Global Commodities SE” şirkətinin birinci vitse-prezidenti Uve Fip, “Rhenus Group” beynəlxalq nəqliyyat şirkətinin layihələr üzrə idarə heyətinin direktoru Heinrix Kerstgens, “VNG” Səhmdar Cəmiyyətinin İdarə Heyətinin sədri Ulf Heitmüller və “HHLA International” şirkətinin icraçı direktoru Filip Sveens daxil idi. Əslində, Almaniyanın aparıcı biznes qurumlarının və iş adamlarının ölkəmizə gəlişi təzad yaradır. Bu təzadı Azərbaycanın liderinin fikirləri də təsdiqləyir.

Prezident İlham Əliyev Avropa Şurası Parlament Assambleyasında Azərbaycan nü­mayəndə heyətinin səs hüququndan məhrum edilməsi barədə qərarın qəbuluna diqqət çəkərək məsələnin təşəbbüs­karının Almaniya Parlamentinin üzvü Frank Şvabenin olduğunu bildirib. Həmin o Şvabenin ki, Kansler Olaf Şoltsun partiyasının təmsilçisidir. AŞPA isə qərarını insan hüquq və azadlıqla­rına etinasız yanaşma kontekstində əsaslandırır. Ümumiyyətlə, qurum elə rəy formalaşdırır ki, sanki, Azərbay­can ayaq basılası yer deyil. Əgər elədirsə Avropanın başlıca məmləkətinin biznes adamlarının ölkəmizdə nə işi var? Prezident İlham Əliyev də dola­yısı ilə bundan söz açıb. Prezidentölkəmizə qarşı olan ənənəvi təzyiq cəhdlərinin nədən qaynaqlandığı­nın təsvirini verib. Həm hazırkı neqativ təmayülləri dilə gətirib, həm də keçmişə nəzərsalıb. Nəticədə dövlətimizin başçısı hər iki dövrdəki xoşagəlməzliklər baxımın­dan vahid səbəb və nəticə əlaqəsinin varlığı reallığını ortaya qoyur. Belə ki, sə­bəb ermənipərəstlikdir, nəticə isə həmin ermənipərəstliyə görə özünü göstərən yanaşmalar. Azərbaycanın lideri bildirdikləri ilə həmin yanaş­maların qərəzli mahiyyətinin dolğun təsvirini çəkir. Bu təsvir heç bir halda bəraət qazanmaq, xarici iş adamla­rını ölkəmizə çağırmaq istəyi deyil. Yəni, onlarsız da keçinərik. Cənab İlham Əliyev, sadəcə, heç nəyə bax­mayaraq, Azərbaycana təşrif buyur­muş bu şəxslərin qərarının doğrulu­ğunu bildirir və əminlik yaradır. Eyni zamanda da, prinsipial xarakterli mesajlarını da çatdırır.

Prezident almani­yalı iş adamları ilə görüşdə bildirdikləri həm də Azərbaycanda investisiya mühiti­nin etibarlılığının və dayanıqlılğının ali səviyyədə bəyan edilməsidir. Təbii ki, mövcud cəhətlər respublikamızın gü­cündən və qüdrətindən xəbər verir. Bu güc və qüdrət özünəinamın məhsulu­dur. Özünəinam isə ədalət hissindən qaynaqlanır. Bəli, Azərbaycanın dün­yadan tələb etdiyi ədalətli yanaşmadır. O yanaşma ki, ikili standartlar siyasəti­nin arxasınca sürünür. Sanki, ölkəmiz sülh deyil, mühari­bə tərəfdarıdır. Ölkə rəhbəri İlham Əliyev isə bildirir ki, Azərbaycan sülh prose­sinə sadiqdir: “Məhz biz İkinci Qarabağ müharibəsi başa çatdıqdan sonra sülh danışıqları təşəbbüsü ilə çıxış etdik. Əslində, biz sülh yolu ilə həllin beş əsas prinsipini işləyib hazırladıq və sülh müqaviləsinin mətninin layihəsini təqdim etdik. Beləliklə, biz əgər sülh istəmiriksə, niyə bunların hamısını ha­zırlamışıq?!”Deməli, ərazi bütövlüyümü­zü və suverenliyimizi bərpa etdiyimizə görə heç bir ittihamla üzləşməməliyik. Həm də ona görə üzləşməməliyik ki, cənab İlham Əliyev çox doğru olaraq “beynəlxalq hüququn normaları bizim tərəfimizdədir”–deyir.

Bu gün Azərbaycan–Ermənistan münasibətlərinin nizam­lanması xüsusuna diqqət yetirəndə də durumu açıq şəkildə görmək mümkün­dür. Belə ki, bu yanaşmaya “nizam­lama” demək də olmur. Bunun bir adı var – qatı ermənipərəstlik. Acı həqiqət ortadadır – ermənipərəstlik ərazi bü­tövlüyümüzü və suverenliyimizi bərpa etməyimizə qənim kəsilib. Bu yolu tu­tanlar çalışırlar ki, 44 günlük İkinci Qarabağ müharibəsi ilə qazandığımız Zəfər, lokal xarakterli antiterror tədbirləri ilə əldə etdiyimiz uğur təntənəsi heçə ensin, erməni avantürizmi “mahiyyətini” qoruyub sax­lasın. Ən pisi isə odur ki, belə bir təma­yül özünü beynəlxalq hüquq prinsipləri­nin heçə sayılması ilə göstərməkdədir. Bu xüsusda aydındır ki, Fransa başda ol­maqla, kollektiv Qərb Ermənistanı Azərbaycana qarşı yeni müharibəyə təhrik etmək yolu tutmaqda, Cənubi Qafqazı anti-Rusiya mübarizəsi plat­formasının növbəti cəbhəsinə çevir­məkdə israrlıdır. Ermənistan alətdir və qeyd etdiyimiz niyyətin gerçəkləşdiril­məsi üçün silahlandırılmaqdadır. Qeyd edək ki, Prezident İlham Əli­yevin Almaniyanın biznes nümayən­dələrini qəbul edərkən üzərində da­yandığı ikili standartlar siyasəti və mövcud siyasətin üzdə olan ermənipərəstlik təzahürü o qədər riya­kardır ki, özünü hər anlamda göstərir. Prezident bu baxımdan Ru­siya–Ukrayna müharibəsinə toxunması heç də əbəs deyil. Öna görə ki, dünya birliyi Ukraynanı öz ərazi bütöv­lüyünü və suverenliyini bərpa etməyə çalışan haqlı tərəf kimi tanıyır. Təbii ki, iki qardaş xalq arasındakı qanlı müharibədə onlardan hansının haqlı, hansının haqsız olduğunu mü­bahisələndirmək fikrindən uzağıq. Ru­siyanın özünün haqq bildiyi məqamlar var. O cümlədən Ukraynanın da beynəlxalq hüquq tərəfindən qəbul edilmiş ərazi bütövlü­yü və suverenliyi də.

Diqqətə çatdırmaq istədi­yimiz başlıca məqam isə ərazi bütövlüyü və suverenlik məsələsinə xarici aləmin yanaşması ilə bağlıdır. Yanaşmada beynəlxalq hüquqla in­terpretasiya motivi var ki, bu da, bütöv­lükdə, dünya üçün son dərəcə qorxunc presedent yaradır. “Torpaqlarımızı işğal altında saxlayan Ermənistan bu müddətdə BMT Təhlükəsizlik Şurası­nın məlum qətnamələrinə, beynəlxalq hüququn normalarına, o cümlədən, hu­manitar normalara məhəl qoymadı. İki gün əvvəl ildönümünü qeyd etdiyimiz Xocalı soyqırımını törətdilər. İndi biz suverenliyimizi və ərazi bütövlüyümü­zü bərpa etdikdən və Qarabağda sepa­ratizm yuvasını dağıtdıqdan sonra hü­cumlara məruz qalmışıq. Biz Makron, Borrell və onlar kimi digər insanlar tərəfindən günahlandırılırıq”, – deyən Prezident İlham Əliyev Ukraynanın öz ərazi bütövlüyünü bərpa etmək istədiyini, Almaniyanın və digərlərinin ölkəni silahlandıraraq rəsmi Kiyevin apardığı mübarizəni dəstəklədiyini, ha­belə Azərbaycanın ərazi bütövlüyünün heçə sayıldığını, Cənubi Qafqazdakı durumun vaciblik baxımından Ukrayna məsələsindən geri qalmadığını bildirir. Azərbaycan Prezidenti ölkəmizdə iqtisadi islahatlarla bağlı böyük işlə­rin həyata keçirildiyini, yalnız ənənəvi enerji sektoru deyil, başqa sahələrdə də əməkdaşlıq üçün yaxşı imkanların olduğunu heç də əbəs yerə vurğula­mır. Bir növ, sərfəli perspektivi yada salır, hər kəsə “ağıllı olun!” mesajını verir. Deməli, bunu nəzərə almaq, ikili standartlardan çıxış etməkdənsə, ölkə­mizin səmimiyyətinə dəyər vermək la­zımdır.

Sonda Prezident İlham Əliyev Almaniya biz­nes dairələrinin Azərbaycanın Cənubi Qafqazda sülh proseslərinə sadiqliyini yüksək qiymətləndirib və bunun bü­tün regionda müsbət inkişafın əsasını qoya biləcəyini vurğulayıb. Yəni ki, Al­maniya da özünün iqtisadi maraqlarını düşünməli, kollektiv Qərbin ənənəvi anti-Azərbaycan oyunlarında iştirak­dan uzaq dayanmalı, obyektiv mövqe tutmalı, ən əsası isə Cənubi Qafqazda sülh mühitinin ədalətli əsaslarının for­malaşmasına və möhkəmlənməsinə töhfəsini verməlidir. Ümid edirik ki, Avropanın başlıca ölkəsinin iş adamları Bakıya gəliblərsə, gələcəyə nikbin yanaşmaq üçün səbəb var.

Fərid Mustafayev

YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini