"Heydər Əliyev ideyaları Azərbaycana möhtəşəm uğurlar qazandırır" - FOTOLAR

28 mart 2024-cü il tarixdə YAP Samux rayon təşkilatında “Heydər Əliyev ideyaları Azərbaycana möhtəşəm uğurlar qazandırır” mövzusunda tədbir keçirildi. Dəyirmi masada YAP Samux rayon təşkilatı aparat üzvləri və ərazi partiya təşkilat sədrləri edirdilər.Əvvəlcə Ulu Öndərimizin və Vətən uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edildi.Tədbiri açıq elan edən YAP Samux rayon təşkilatının sədri Gündüz Bayramov mövzu ilə bağlı ətraflı çıxış edərək respublikamızın tərəqqisində, iqtisadi, siyasi, mədəni uğurlarında, beynəlxalq əlaqələrin genişlənməsində, ümumiyyətlə, dövlət müstəqilliyimizin möhkəmlənməsində, daimi və əbədi olmasında ümummilli lider Heydər Əliyevin müstəsna xidmətlərindən söhbət açdı. Ümummulli Liderin miras qoyduğu uğurlu daxili və xarici siyasətin bu gün də ölkə başçısı cənab İlham Əliyev tərəfindən uğurla davam etdirildiyini vurğuladı.

Sədr qeyd etdi ki,hər birimiz Heydər Əliyevin dövlətçilik amallarına sadiq qalaraq Ulu öndərin yüksək ideyalarını yaşatmaq və inkişaf etdirmək, Azərbaycan tarixinin yeni şanlı səhifələrini yazmaq naminə möhtərəm Prezidentimiz cənab İlham Əliyevin ətrafında sıx birləşərək, əlimizdən gələni əsirgəməməli, dövlət başçısının yüksək etimadına uyğun olaraq ölkəmizin hərtərəfli tərəqqisi üçün öz vəzifələrimizi layiqincə yerinə yetirməli və daha əzmkarlıqla çalışmalıyıq. Ulu Öndərin mənalı ömür yolunun hər anı, hər səhifəsi bugünkü və gələcək nəsillərə nümunə olacaq canlı və unudulmaz tarixdir. Ulu Öndər Heydər Əliyev ömrünü bütövlükdə doğma Azərbaycanımızın çiçəklənməsinə, mənsub olduğu xalqın inkişafına sərf edib, bütün varlığı ilə sevdiyi Vətənini, xalqını, onun dövlətçiliyini tarixin çox çətin sınaq və imtahanlarından böyük məharətlə çıxarıb.

Daha sonra tədbirdə iştirak edən ərazi partiya təşkilat sədrlərindən Şəmistan Yusibov, Namiq Cəfərov, Ramin Bayramov, Musa Əsədov çıxış edərək bildirdilər ki, bu gün ümummilli lider Heydər Əliyev ideyaları əsasında dinamik inkişaf edən, qüdrəti və beynəlxalq nüfuzu getdikcə artan Azərbaycan yeni zirvələr fəth edir. Qazanılan bütün nailiyyətlərin əsasında ulu öndər Heydər Əliyevin siyasi kursunun Prezident İlham Əliyev tərəfindən uğurla davam etdirilməsi dayanır.