İldən-ilə möhkəmlənən dostluq

Ötən illər ərzində bir sıra uğurlara imza atan Azərbaycan və Orta Asiyanın türk dövlətləri, o cümlədən Qırğız Respublikası istər regional, istərsə də qlobal məsələlərdə həmişə eyni mövqedən çıxış ediblər. Qırğızıstan ilə ölkəmiz arasında əlaqələr daim yüksək strateji tərəfdaşlıq səviyyəsinə qalxıb və gündən-günə inkişaf etməkdədir.

Eyni kökə, qədim tarixə, mədəniyyətə və ənənələrə malik Azərbaycan ilə Qırğız Respublikası arasında diplomatik əlaqələr 1993-cü ilin yanvar ayında qurulub. 1996-cı ilin ortalarında Azərbaycan Respublikasının Qırğızıstan Respublikasında, 1998-ci ilin may ayında Qırğızıstan Respublikasının Azərbaycan Respublikasında səfirlikləri fəaliyyətə başlayıb. Ölkə Prezidenti İlham Əliyevin rəhbərliyi dövründə Azərbaycan-Qırğızıstan münasibətləri yeni inkişaf mərhələsinə qədəm qoydu, hər iki ölkənin siyasi-iqtisadi və mədəni əlaqələri getdikcə genişləndirildi.
Dövlətlərarası münasibətlərin inkişafında dövlət və hökumət başçılarının intensiv xarakter alan qarşılıqlı səfərləri mühüm rol oynayır. Aprelin 24-də Qırğız Respublikasının Prezidenti Sadır Japarovun ölkəmizə səfəri ikitərəfli əlaqələrin yeni bir mərhələyə qədəm qoyduğunu bir daha gündəmə gərirdi. Ölkələrimiz arasında yüksək səviyyədə olan əlaqələrin daha da inkişafına və qarşılıqlı maraq doğuran sahələrdə əməkdaşlığın gücləndirilməsinə töhfə verən səfər zamanı hər iki ölkə rəhbərlərinin mətbuata bəyanatları da onu nümayiş etdirdi ki, Azərbaycanın Qırğız Respublikası ilə dosrluq əlaqələri daha da inkişaf etməkdədir.
Prezident İlham Əliyev mətbuat bəyanatında bildirdi ki, bizim hər il qarşılıqlı səfərlərin həyata keçirilməsi üzrə yaxşı ənənəmiz formalaşıb: “Mən ötən il, ondan əvvəlki il Qırğızıstanda olmuşam, həmçinin keçən il və ondan əvvəlki il Sadır Nurqojoyeviç bizi ziyarət edib. Bizim hələ yayda Şuşada Türk Dövlətləri Təşkilatının qeyri-rəsmi Zirvə görüşünün keçirilməsi zamanı Azərbaycanda görüşmək imkanımız olacaq. Həmçinin Sadır Nurqojoyeviçi noyabr ayında COP29 beynəlxalq konfransında iştiraka dəvət etdim. Hər bir görüş qarşılıqlı fəaliyyətin, ünsiyyətimizin gücləndirilməsi, eləcə də ikitərəfli və çoxtərəfli əməkdaşlığın mühüm məsələlərinin həlli baxımından əhəmiyyətli və dəyərlidir.”
Azərbaycan və Qırğızıstan prezidentlərinin məhdud tərkibdə görüşü, Azərbaycan və Qırğızıstan Dövlətlərarası Şurasının 2-ci iclası, Azərbaycan-Qırğızıstan sənədlərinin imzalanması, mətbuata verilən bəyənatlar, Bakıda görkəmli qırğız yazıçısı Çingiz Aytmatovun abidəsinin açılış mərasimi, Füzuli və Ağdam rayonlarına səfər hər iki ölkə arasında əlaqələrin ildən-ilə möhkəmlənməsinin bariz nümunəsidir.
Füzuli və Ağdam rayonlarına səfər zamanı Azərbaycan Respublikasının Prezidenti İlham Əliyev və Qırğız Respublikasının Prezidenti Sadır Japarov erməni işğalçılarının dağıtdıqları yerlərinə baxıblar, şəhərlərin baş planıları ilə tanış olublar. Dövlət başçıları Ağdam rayonunun Xıdırlı kənd tam orta məktəbinin birgə təməlqoyma mərasimində iştirak ediblər. Qırğızıstan Prezidentinin təşəbbüsü ilə Qırğızıstan dövləti adından bu ilin sonunadək başa çatdırılması planlaşdırılan məktəb binasının tikintisi iki ölkə arasında sarsılmaz qardaşlıq münasibətlərinin göstəricisi oldu.
Azərbaycanın da, Qırğızıstanın da milli maraqlarına xidmət edən rəsmi səfər hər iki dövlətin. əsas məqsədinin türk dünyasının inkişafına, siyasi və mədəni birliyinə layiqli töhfə vermək olduğunu bir daha nümayiş etdirdi. Azərbaycan-Qırğızıstan münasibətləri, qardaşlıq və dostluq əlaqələri bundan sonra yüksələn xətlə davam edəcək, türk dünyasının inkişafına, siyasi və mədəni birliyinə yeni töhfələr verəcək.

Bayram Aslanov
YAP İdarə Heyətinin üzvü, YAP Gəncə şəhər təşkilatının sədri