Heydər Əliyev fenomeni –müdriklik və qətiyyət örnəyidir - ŞƏRH

1 may 2024-cü il tarixdə YAP Samux rayon təşkilatında ümummilli lider Heydər Əliyevin 101-ci ildönümü münasibətilə ərazi partiya təşkilat sədrlərinin də iştirakı ilə “Heydər Əliyev fenomeni- müdriklik və qətiyyət örnəyidir” mövzusunda iclas keçirildi.

Əvvəlcə ümummilli liderimiz Heydər Əliyevin və torpaqlarımızın bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad olundu.

Daha sonra YAP Samux rayon təşkilatının Gündüz Bayramov çıxış edərək bildirdi ki, bu gün müstəqil Azərbaycan hüquqi-demokratik ölkə kimi gələcəyə doğru uğurla addımlayır. Qazanılan hər bir uğur hər bir soydaşımızda hədsiz qürur doğurmaqla bərabər, başqa bir həqiqəti – Ümummilli Lider, müstəqil Azərbaycan dövlətinin memarı və qurucusu, dünya şöhrətli siyasətçi və dövlət xadimi Heydər Əliyevin şəxsiyyətinin ucalığını və böyüklüyünü də dərindən dərk etmək imkanı yaradır. Bir daha əmin oluruq ki, həqiqi xalq lideri Heydər Əliyevin dühasının, mənalı ömür yolunun hər anı, hər səhifəsi gələcək nəsillər üçün mükəmməl bir nümunədir. Ulu Öndər Heydər Əliyev müstəqil Azərbaycana rəhbərlik etdiyi hər iki tarixi dövrdə həm sovet zamanında həm də müstəqillik dövründə tarixi ənənə və yurd sevgisi təməlləri üzərində milli ideologiyanın formalaşması və ölkəsinin tərəqqisi naminə müstəsna xidmətlər göstərmişdir. Ulu öndər azərbaycançılığı milli ideologiyaya çevirməklə, vətəndaş həmrəyliyinə və ölkəsinin mənəvi bütövlüyünə nail olmuşdur. Ötən hər il Heydər Əliyev dühasının böyüklüyünü, möhtəşəmliyini bir daha təsdiqləyir.

Daha sonra iclasda iştirak edən ərazi partiya təşkilat sədrlərindən Şəmistan Yusibov, Mirzəmməd Orucov, Vidadi İsayev, Rasim İmamquliyev çıxış edərək Ulu Öndərin ölkəmizin çətin zamanlarında Azərbaycanın xilaskarı olduğundan və ölkəmizin inkişafı istiqamətindəki əvəzsiz xidmətlərindən, bu dahi şəxsiyyətin tariximizdəki əvəzsiz rolundan geniş söz açdılar. Natiqlər həmçinin bildirdilər ki, Heydər Əliyev Azərbaycanın dövlət müstəqilliyinin dönməzliyini təmin etməklə yanaşı, millətimizin və dövlətimizin ideoloji xəttini müəyyənləşdirən dahi Liderdir.