Mədəniyyətlərarası dialoqun gücləndirilməsi əsas hədəfdir

Hər bir beynəlxalq əhəmiyyətli tədbir əhatə etdiyi mövzu ilə yanaşı, keçirildiyi məkan baxımından da xüsusi diqqətdə olur. Bu baxımdan mayın 1-də Azərbaycanın ev sahibliyi etdiyi VI Ümumdünya Mədəniyyətlərarası Dialoq Forumu xüsusi diqqət çəkdi. “Sülh və qlobal təhlükəsizlik naminə dialoq” mövzusunda keçirilən Forumun gündəliyi zənginliyi ilə diqqətdə oldu. Cənab İlham Əliyev bildirdi ki, Forum çox mühüm beynəlxalq platformadır və orada mədəniyyətlərarası dialoq məsələləri müzakirə olunur: “Biz indi qısa videoçarx seyr etdik, orada “Bakı Prosesi” haqqında bəhs olunur. Əslində, biz prosesi başlayanda heç təsəvvür edə bilmirdik ki, onun nəticəsində insanları - ziyalıları, siyasətçiləri, qərar qəbul edənləri, media nümayəndələrini, vətəndaş cəmiyyətinin nümayəndələrini, vətəndaş cəmiyyətini bir araya gətirəcəyik, bir məqsəd ətrafında toplayacağıq ki, necə edək bizim dünyamız daha təhlükəsiz olsun. Çünki bunun əsasında mədəniyyətlərarası dialoq dayanır.”

Gündəliyə mədəniyyətlərarası dialoq, müxtəliflik, iqlim dəyişmələri, miqrasiya, sülh və təhlükəsizlik, postmünaqişə vəziyyəti, turizm, süni zəka və sair məsələlər daxil edildi və məhsuldar müzakirələr aparıldı. Mədəniyyətlərarası dialoqun gücləndirilməsi əsas hədəfdir. Bu çağırış həm dövlət başçısı İlham Əliyevin, həm də tədbirə qatılan digər iştirakçıların çıxışlarında özünün aydın ifadəsini tapdı. Bu, mühüm məqam da xüsusi vurğulandı ki, Ümumdünya Forumu “Bakı Prosesi”nin hissəsi olaraq mədəniyyətlərarası dialoqu qlobal şəkildə təşviq edir. Forum fərqli etnik, mədəni, dini və dil mənşəyi olan insanları bir araya gətirir, qarşılıqlı anlaşmaya doğru açıq və hörmətcil mübadilə üçün platforma yaradır. Prezident İlham Əliyev tərəfindən 2008-ci ildə başlanmış, aparıcı beynəlxalq təşkilatların dəstəklədiyi “Bakı Prosesi” 250-dən artıq tədbirdə 180 ölkədən olan 10 mindən artıq iştirakçını salamlamış, bölgədə yeni mədəniyyətlərarası təşəbbüsləri ilhamlandırmışdır. Dünya VI Ümumdünya Mədəniyyətlərarası Dialoq Forumuna toplaşdığı zaman gələcəyimizi öz əllərimizdə saxlayırıq. Burada - Bakının mərkəzində dünyanın gələcəyinə təsir etmək fürsətimiz var. Bu, ümid, anlaşma və dirçəlmə gətirə biləcək dinlərarası dialoq dünyasıdır. Burada dayanıqlı inkişaf, təhsil və turizm bizi bir-birimizə yaxın edir. Burada sosial media və süni intellekt bəşəriyyəti parçalamır, birləşdirir. Bakı COP29 Sammitinə ev sahibliyi edəcəyi vaxtda iqlim dəyişmələrinin yaratdığı çətinliyi aradan qaldırmaq üçün millətlərin bir araya gələcəyi dünyanı formalaşdırmaq istəyirik. Əsas məqsədlərimiz dialoq vasitəsilə sülhü təşviq etmək, qlobal təhlükəsizliyi gücləndirmək və əməkdaşlığı möhkəmləndirməkdir.
Forumda əsas diqqət göstərilən məsələlərdən biri də Azərbaycanın bu ilin noyabr ayında COP29-a ev sahibliyi oldu. COP29-un ölkəmizdə keçirilməsi dünya ictimaiyyəti tərəfindən Azərbaycana göstərilən böyük hörmət və rəğbətin nümayişidir. Eyni zamanda, yaşıl enerjiyə keçidimizə olan böyük qiymətdir.
Qeyd edək ki, yaşıl enerji keçidi bizim prioritet məsələmizdir. Ötən il Azərbaycanda bölgənin ən böyük bərpaolunan elektrik enerjisi stansiyası istifadəyə verilmişdir. 230 meqavat gücündə günəş elektrik stansiyası artıq enerji sistemimizə tam inteqrasiya edilmişdir. İmzalanmış kontraktlar və anlaşma memorandumları əsasında yaxın bir neçə il ərzində Azərbaycanda 10 min meqavat bərpaolunan enerji növləri, enerji mənbələri yaradılacaq və bu sahədə də Azərbaycan dünyada liderlər sırasında olacaq. İqlim dəyişikliyinə həsr edilmiş bu beynəlxalq konfransın Azərbaycanda keçirilməsi bir daha bu sahədə uğurlarımızı əyani şəkildə göstərir. Cənab İlham Əliyev sözügedən Forumdakı çıxışında bildirdi ki, Azərbaycan COP29-a yekdil qərarla ev sahibliyi edən ölkə seçildi. İndi öz rolumuzu körpülərin salınmasında görürük. Tariximiz, coğrafiyamız, qarşılıqlı əlaqələrimiz, Avropa təsisatları ilə olan münasibətlərimiz, eyni zamanda, coğrafi baxımdan Qərb ilə Şərq arasında yerləşməyimiz, bu amillər çox iş görməyə əsas verir: “Əlbəttə ki, iqlim dəyişmələrinə aid olan məsələlərə gəldikdə, bizə maliyyə vəsaiti lazımdır. Bəli, maliyyə məsələsi öz növbəsində COP29-un əsas mövzusu olacaq. Lakin bizə həmrəylik və qarşılıqlı etimad lazımdır. Biz bir-birimizi günahlandırmalı deyilik ki, kim planetə daha çox zərbə vurub. Yaxud da qlobal istiləşməyə görə kimin daha çox məsuliyyət daşıması ilə bağlı mübahisə etməməliyik. Əgər biz bu davranışı davam etdirsək, onda bunun sonu faciə olacaq.” Dövlətimizin başçısı daim çıxışlarında bu məqama diqqəti yönəldir ki, neft-qazımızın olması bizim günahımız deyil. Bu çağırış Forumdakı çıxışında da yer aldı: “Başqalarının da belə təbii sərvətləri var və əlbəttə ki, onların öz təbii sərvətlərindən ölkələrinin faydası üçün istifadə etmək imkanı var. Azərbaycana gəldikdə, bu imkan nəinki Azərbaycana aiddir, biz təbii qazımızı səkkiz ölkəyə çatdıraraq onların enerji təhlükəsizliyinə töhfə veririk. Əgər biz bu gün məhz yol təchizatlarına, enerji təchizatlarına baxsaq görərik ki, onlar çox müxtəlifdir. Ona görə bizim səylərimiz körpülərin salınmasına yönələcək.”
Azərbaycan bütün sahələrdə zəngin potensiala və təcrübəyə malikdir. İstənilən mövzunun ölkəmizdə müzakirə edilməsi də bunun bariz nümunəsidir. Möhkəm təməl daim davamlı uğurları şərtləndirir. Azərbaycanın hərtərəfli inkişafı, düşünülmüş və məqsədlönlü siyasətinin zamanın tələblərinə uyğun olaraq yenilikləri özündə əks etdirməsi, təkmil islahatları gələcəyə daha böyük inamla addımlamasını təmin edir. Bu gün dünyanın gələcəyinin ölkəmizdə müzakirə olunması xarici siyasət uğurlarımızın əsas tərkib hissəsidir. Azərbaycanın ədalətə və beynəlxalq hüquqa söykənən siyasətinin uğurlu nəticələri hər birimizi qürurlandırır. ABŞ-ın Corc Meyson Universitetinin Sülh və Münaqişələrin Həlli üzrə Cimmi və Rozalin Karter Məktəbinin dekanı, professor Alpaslan Özerdem böyük inamla qeyd etdi ki, Prezident Əliyev uzaqgörən lider, mədəniyyətlərarası dialoqun və multikulturalizmin qlobal carçısıdır. 2008-ci ildə Prezident Əliyev müxtəlif mədəniyyətlər və sivilizasiyalar arasında dialoqun və əməkdaşlığın gücləndirilməsi üçün məxsusi təşəbbüsü – “Bakı Prosesi”ni irəli sürdü. Bu cür uzaqgörən yanaşma sərhədləri aşaraq və parçalanmanı aradan qaldıraraq millətlər arasında da daha böyük anlaşma və qarşılıqlı hörmətə yol açdı.

Fəxrəddin Vəliyev
YAP Şəmkir rayon təşkilatının sədri