Şəhid Məhəmməd Cəlal oğlu Quluzadənin doğum günü qeyd olunub FOTOLAR

Avqust ayının 7-də Biləsuvar rayonunun Bəydili kəndində Vətən müharibəsi şəhidi Quluzadə Məhəmməd Cəlal oğlunun doğum günü ilə əlaqədar ailəsi ziyarət edilib. Mərasimdə YAP Biləsuvar rayon təşkilatının sədr müavini Aqşin Qasımov və 2 saylı şəhər ərazi partiya təşkilatının sədr əvəzi Mirsultanov Mirhənifə iştirak ediblər. Ziyarətçilər Şəhidimizin keçdiyi döyüş yolundan, göstərdiyi xidmətindən və şücaətindən bəhs edərək şəhidimizin başsağlığı veriblər.

Məlumat üçün qeyd edək ki, Azərbaycan Ordusunun müddətdən artıq həqiqi hərbi xidmət hərbi qulluqçusu olan Quluzadə Məhəmməd Cəlal oğlu 7 avqust 1999-cu ildə Biləsuvar rayonunun Bəydili kəndində anadan olmuşdur. 2007-2018-ci illərdə Bəydili kənd tam orta məktəbində təhsil almış və 2018-2019-cu illərdə müddətli həqiqi hərbi xidmətdə olmuşdur. Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlayan II Qarabağ müharibəsində iştirak etmiş və Tərtər rayonunun Suqovuşan kəndi istiqamətində gedən döyüşlərdə qəhrəmancasına şəhid olmuşdur. 29 sentyabr 2020-ci il tarixində Bəydili kənd qəbiristanlığında dəfn olunmuşdur.

Azərbaycan Respublikası Prezidentinin müvafiq sərəncamlarına əsasən şəhid Quluzadə Məhəmməd Cəlal oğlu ölümündən sonra “Vətən uğrunda”, “Laçının azad olunmasına görə” və “Suqovuşanın azad olunmasına görə” medalları ilə təltif edilib. Ölümündən sonra adı əbədiləşdirilərək Bəydili kənd küçələrindən birinə verilib.

Allah şəhidlərimizə rəhmət eləsin!