Sarsılmaz Azərbaycan Özbəkistan birliyi ŞƏRH

Əminliklə söyləyə bilərik ki, hazırda Özbəkistan və Azərbaycan ara­sındakı münasibətləri heç vaxt olmadığı səviyyəyə qalxıb. Əsasən də, Tarixi Zəfərimizdən sonrakı 4 il ərzində iki ölkənin dövlət və hökumət nümayəndələ­ri arasında əməkdaşlığın bütün sahələrini əhatə edən qarşılıqlı səfərlərin sayı onlar­cadır. Azərbaycan Prezidenti İlham Əliyev və Özbəkistan Prezidenti Şavkat Mirziyoyevin səmimi dostluq və qardaşlıq atmosferində keçən rəsmi görüşləri də intensiv xarakter daşı­yır. Bunun da səbəbi iki qardaş ölkəni və xalqları birləşdirən ortaq dəyərlərin olmasıdır.

Avqustun 23-ü Daşkənddə Prezident İlham Əliyev və Prezident Şavkat Mirziyoyev “Azərbaycan Respublikası ilə Özbəkistan Respublikası arasında müttəfiqlik müna­sibətləri haqqında Müqavilə” imzaladı­lar. Həmin müqavilənin imzalanmasını tarixi məqam saydığını deyən dövlətimizin başçısı onu iki ölkənin imzalaya biləcə­yi ali səviyyəli beynəlxalq sənəd kimi dəyərləndirdi. Və bununla da hər iki ölkə arasındakı münasibətlərinin yeni fəslinin deyil, yeni kitabının yazıldığını bəyan edən Prezident İlham Əliyev bu gün iki qardaş xalqın, iki müstəqil, suveren, qüd­rətli dövlətin eləcə də rəsmi müttəfiqə çev­rilmələrini məmnunluqla qeyd etdi: “Bu, çox mühüm xarici siyasət addımıdır və gələcək illərdə münasibətlərimizi, həm­çinin bir çox hallarda, regional siyasəti müəyyən edəcək”.

Mətbuat üçün açıqlamasında son illər ölkələrimiz arasında genişlənən əməkdaşlıq­dan söz açan dövlətimizin başçısı işğaldan azad edilimiş Füzuli rayonunda Özbəkista­nın maliyyəsi ilə Mirzə Uluqbəy adına orta məktəbin inşasını qardaşlıq rəmzi, özbək xalqının töhfəsi kimi yüksək qiymətlən­dirdi. Həmin məktəbdə 500-ə yaxın şagirdin təhsil alacağını nəzərə çatdıran Azərbay­can Prezidenti iki ölkə arasında imzalanan yeni sənədlərin əməkdaşlığın daha geniş üfüqlərini müəyyənləşdirdiyini söylədi.
Çıxışında dövlətimizin başçısı İlham Əliyev bu gün Özbəkistanın təkcə bölgədə deyil, həm də dünya miqyasında yüksək siyasi nüfuza malik ölkəyə çevril­diyini və buna səmimi-qəlbdən sevindiyi­ni vurğulayaraq, Şavkat Miromonoviçin müdrik siyasətinin son təzahürü kimi öz­bək idmançılarının Yay Olimpiadasında tarixi uğurunu diqqətə çatdırdı.

“Onlar çoxlu medal qazandılar, on­lardan 8-i qızıldır. Həmçinin müsəlman ölkələri arasında birinci, dünyada 13-cü yeri tutdular. Bu, tarixi nailiyyətdir”– qeyd edən Prezident İlham Əliyev bundan bütün Türk dünyasının sevindiyini və qürur duyduğu­nu xüsusi vurğuladı.

Mərkəzi Asiyanın yük­sək templə irəliyə doğru addımlayan res­publikasına çevrilmiş Özbəkistan bütün sahələrdə, həmçinin idmanda da rekord nailiyyətlərə imza atır. Onu da qeyd edək ki, Özbəkistanın dünyada gündən-günə artan nüfuzu həm də onun üzvü olduğu Türk Dövlətləri Təşkilatının regionda və beynəlxalq arenada güclən­məsini şərtləndirən amillərdəndir. Azərbaycanın burada oynadığı önəmli rolu unutmaq olmaz. Özbəkistan və Azərbay­can rəhbərlərinin imzalarını atdıqları müt­təfiqlik münasibətləri haqqında müqaviləni sanbalına və miqyasına görə Azərbaycanla Türkiyə arasında imzalanmış Şuşa Bəyan­naməsi ilə müqayisə edə bilərik.

Dövlətimizin başçısının Özbəkistana səfərini tarixi adlandıran Şavkat Mirzi­yoyev xüsusi məmnunluqla qeyd etdi ki, İlham Əliyevin Daşkəndə dövlət səfəri çoxəsrlik dostluq münasibətlərimizin inki­şafı baxımından tarixi hadisədir: “Bu gün biz müttəfiqlik münasibətləri haqqında müqavilə imzaladıq. Bu sənəd dövlətləra­rası qarşılıqlı fəaliyyətin möhkəmləndiril­məsində yeni fəslin başlanğıcını simvolizə edir”. Özbəkistan liderinin sözlərinə görə, bununla da Azərbaycan-Özbəkistan arasında çoxplanlı tərəfdaşlığın hərtərəfli inkişaf etdirilməsi kursuna qəti sadiqlik təsdiqlənib. Özbəkistan Prezidenti çıxışında 2025-ci ili iqtisadi əməkdaşlıq ili elan etdiklərini və iki ölkə arasında ticarət dövriyyəsinin həcmini 2 dəfə artırmaq üçün əsasların olduğunu dedi. O, bu istiqamətdə də müs­bət dinamikanın güclənəcəyinə əminliyini bildirdi. Dövlətimizin başçısı İlham Əliyev özbəkistanlı həmkarının sözünə qüvvət olaraq bun­ları dedi: “İkitərəfli gündəliyi və üçüncü ölkələrə investisiyalarla çıxışı artıracağıq. Qardaş ölkələr, müttəfiqlər kimi inamla, layiqincə, çiyin-çiyinə addımlayırıq və irə­liləməyə davam edəcəyik”.
Bütün Türk dövlətləri inamla, çi­yin-çiyinə addımlamalıdır. İki qardaş xalqı bir-birinə bağlayan, doğmalaşdıran dəyərlər möv­cuddur. Özbəkistan və Azərbaycanın oxşar cəhətlərindən danışanda, qardaş və artıq müttəfiq ölkələrin çağdaş dövrün çağı­rışlarına cavab verən sivil və demokratik quruluşa malik, dünyaya açıq və inkişafa meyilli ölkələr olmalarını qeyd etməliyik. Mərkəzi Asiya, Cənubi Qafqaz, Xəzərətrafı ölkələr bu gün vahid geosiyasi regio­na çevrilir. Cənubi Qafqazın intizarında olduğu müsbət proseslər Özbəkistan ilə Azərbaycan arasında səmərəli əməkdaşlıq­dan da asılıdır. Əminliklə qeyd edək ki, möhkəm tellərə malik qardaşlıq ittifaqı bu missiyanın öh­dəsindən uğurla gələcək. Elə yaxın tarixə nəzər salanda görürük ki, özbək xalqı və mədəniyyəti ilə Azərbaycan xalqını və mə­dəniyyətini birləşdirən cəhətlər, bir-birinə bağlayan tellər az deyil. Hələ Sovet döv­ründə Özbəkistan və Azərbaycanın elm, mədəniyyət, ədəbiyyat və incəsənət adam­ları arasında yaradıcılıq, dostluq, qardaşlıq əlaqələri geniş idi.
Bu gün iki müstəqil, suveren Türk dövləti böyük fərəh və doğmalıq hissi ilə bir-birinə qucaq açır, arxa-dayaq olur. Ona görə ki biz bir yolun yolçularıyıq, hədəflərimiz də eyni­dir. Gözlərimiz önündə rəngarəng özbək ipəyinə bürünmüş müjdəli səhərlər canla­nır. Sarsılmaz qardaşlıq birliyi və möhkəm müttəfiqlik üzərində inşa edəcəyimiz xoş­bəxt gələcəyi təkcə oğuz türkləri – özbək­lər və azərbaycanlılar deyil, Turan elləri, bütün Türk dünyası haqq edir.

Fərid Mustafayev

YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini